ខេត្តស្វាយរៀងៈ លោក សរ វណ្ណា នាយកសាខាកាកបាទក្រហមកម្ពុជាខេត្តស្វាយរៀង និង លោក ឱម វុឌ្ឍរ៉ូ មន្ត្រីសម្របសម្រួលគម្រោង ការិយាល័យការពារជំងឺឆ្លង និងមិនឆ្លង នាយកដ្ឋានសុខភាព កាកបាទក្រហមកម្ពុជានៅថ្ងៃទី ១២ ខែ សីហា ឆ្នាំ ២០១៩ បានអញ្ជើញជាអធិបតីនៅក្នុងកម្មវិធីបើកវគ្គបណ្តុះបណ្តាលស្តីពីការថែទាំ និងជួសជុលឧបករណ៍ សម្ភារ អនាម័យដល់គណៈកម្មការថែទាំ និងជួសជុលឧបករណ៍សម្ភារអនាម័យ ដែលបានរៀបចំឡើងនៅទីស្នាក់ការអនុសាខាកាកបាទក្រហមកម្ពុជាស្រុកចន្ទ្រា គម្រោងបង្កើននិរន្តរភាពការប្រើប្រាស់ទឹកស្អាត និងអនុវត្តន៍អនាម័យ នៃសាខាកាកបាទក្រហមកម្ពុជាខេត្តស្វាយរៀង ។
ពិធីនេះ បានការអញ្ជើញចូលរួមផងដែរពី សំណាក់ លោក លោកស្រី ជាអ្នកទទួលផលពីគម្រោង សរុបចំនួន ២៥ នាក់ មកពីឃុំគោលដៅទាំង ៣ ក្នុងស្រុកចន្ទ្រា គឺឃុំទួលស្តី ចន្ទ្រា និងឃុំសំរោង ។
សូមបញ្ជាក់ផងដែរថាៈ ក្រោមការឧបត្ថម្ភពីមូលនិធិសប្បុរសធម៌ កាទ្យេ តាមរយៈសហព័ន្ធអន្តរជាតិ កាកបាទក្រហម អឌ្ឈចន្ទក្រហម បានបើកវគ្គបណ្តុះបណ្តាលស្តីពី ការថែទាំ និងជួសជុលឧបករណ៍ សម្ភារអនាម័យ ដល់គណៈកម្មការថែទាំ និងជួសជុលឧបករណ៍សម្ភារអនាម័យ ដែលវគ្គបណ្តុះបណ្តាលនេះមានរយៈពេល ១ ថ្ងៃ ក្រោមការសម្របសម្រួលពីមន្ត្រីគម្រោង សហការជាមួយមន្ត្រីមកពីមន្ទីរអភិវឌ្ឍន៍ជនបទខេត្ត ក្រោមប្រធានបទ ការប្រើប្រាស់ទឹកស្អាត និងការធ្វើឲ្យប្រសើរឡើង នូវការផ្គត់ផ្គង់ទឹកស្អាត និងអនាម័យ និយមន័យទឹកស្អាត ស្នប់អាហ្វ្រីដែវ ការប្រើប្រាស់ និងការថែទាំអណ្តូងទឹក របៀបស្តារអណ្តូងពេលមានទឹកជំនន់ ។ ដោយក្នុងគោលបំណងដើម្បីផ្តល់ចំណេះដឹងដល់ក្រុមគាំទ្រសហគមន៍ ស្តីពីការថែរទាំ និងជួសជុលឧបករណ៍ សម្ភារអនាម័យ ដើម្បីឲ្យឧបករណ៍ សម្ភារអនាម័យទាំងនោះមាននិរន្តរភាព និងប្រើប្រាស់បានយូរអង្វែង ។
លោក សរ វណ្ណា នាយកសាខា បានប្រសាសន៍បញ្ជាក់ពីសារសំខាន់នៃវគ្គនេះ ក្នុងការថែរក្សាសម្ភារ ដែលបានទទួលពីគម្រោង ។ ហើយវគ្គបណ្តុះបណ្តានេះសិក្ខាកាមនឹងទទួលបានចំណេះដឹងជាមូលដ្ឋាន គឺអនាម័យទឹកស្អាត ការថែទាំ និងជួសជុលឧបករណ៍ សម្ភារអនាម័យ ហើយនៅពេលបញ្ចប់វគ្គនេះ សិក្ខាកាមត្រូវយកចំណេះដឹងទាំងនេះ ទៅធ្វើសកម្មភាពនៅតាមមូលដ្ឋាន ឲ្យមានប្រសិទ្ធភាព ត្រូវរួមសហការគ្នា ដើម្បីផ្តល់សេវាកម្មមនុស្សធម៌ដល់ប្រជាពលរដ្ឋនៅក្នុងសហគមន៍ឲ្យបានទាន់ពេលវេលា ។ លោកនាយកសាខាក៏បានបញ្ជាក់ផងដែរ អំពីការជ្រើសរើស និងគ្រប់គ្រងកម្លាំង អ្នកស្ម័គ្រចិត្ត ដែលជាប្រភពធនធានមនុស្សកំពុងរស់នៅជាមួយសហគមន៍នៅពេលជួបគ្រោះភ័យ ហើយសកម្មភាពនេះ ឆ្លើយតបទៅនឹងអនុសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលត្រូវពង្រឹងកម្លាំងធនធានមនុស្ស និង សមត្ថភាព ដល់អ្នកស្ម័គ្រចិត្តឲ្យបានទាំងបរិមាណ និងគុណភាព ។ លោកនាយកសាខា បានផ្តាំផ្ញើទៅដល់សិក្ខាកាមទាំងអស់ ក្រោយពីបញ្ចប់វគ្គនេះ ទៅត្រូវយកចិត្តទុកដាក់ ក្នុងនាមជាអ្នកស្ម័គ្រចិត្ត ជាអ្នកសង្គ្រោះ ឆ្លើយតបទៅនឹងគោលការណ៍គ្រឹះទាំង ៧ របស់ចលនាកាកបាទក្រហម ហើយត្រូវយកវិជ្ជានេះទៅអប់រំបន្តដល់ប្រជាពលរដ្ឋ នៅសហគមន៍ដែលខ្លួនកំពុងរស់នៅ ៕ដោយ៖ វ៉ៃកូ
