ភ្នំពេញ ៖ ៦ខែដើមឆ្នាំ២០១៩ មានកម្ពុជាទទួលបានទេសចរជប៉ុនជាង ១០មុីននាក់ក្នុងកំណើន ៣%។ លោក ថោង ខុន រដ្ឋមន្ត្រីក្រសួងទេសចរណ៍បានស្នើ ដល់ភាគីជប៉ុនជួយអភិវឌ្ឍន៍វិស័យទេសចរណ៍នៅកម្ពុជាបន្ថែម ពិសេសគឺតាមរយៈការវិនិយោគលើការបង្កើតផលិតផលទេសចរណ៍ថ្មីៗ លើការបង្កើតតំបន់ទេសចរណ៍សម្រាប់ទេសចរចូលនិវត្ត ក៏ដូចជាការជួយកសាងផ្លូវចំនួនចូលទៅកាន់សហគមន៍ទេសចរណ៍ សំខាន់ៗផងដែរ។
ការស្នើនេះធ្វើឡើងតាមរយៈលោក Hidehisa HORINOUCHI ឯកអគ្គរាជទូតជប៉ុននៅកម្ពុជាចប់អាណត្តិ នាឱកាសដែលឯកឧត្តមអគ្គរាជទូតជួបជាមួយឯកឧត្តមរដ្ឋមន្ត្រី ថោង ខុន នៅទីស្ដីការក្រសួងទេសចរណ៍ នារសៀលថ្ងៃទី១២ ខែសីហា ឆ្នាំ២០១៩ ដើម្បីជម្រាបជាចុងក្រោយ ក្រោយពេលបំពេញបេសកកម្មនៅកម្ពុជាប្រមាណ៣ឆ្នាំមកនេះ។
នាឱកាសនោះលោករដ្ឋមន្ត្រី ថោង ខុន បានលើកឡើងពីការរីកចម្រើនមួយចំនួនលើវិស័យទេសចរណ៍ ក្រោមកិច្ចសហប្រតិបត្តិការល្អជាមួយស្ថានទូតជប៉ុនប្រចាំកម្ពុជា ក៏ដូចជាជាមួយរដ្ឋាភិបាល និងប្រជាជនជប៉ុនផងដែរ ក្នុងនោះ នៅក្នុងឆ្នាំ២០១៨ ក្នុង ៦ គំរោង វិនិយោគ របស់ជប៉ុន មាន២គំរោង វិនិយោគលើវិស័យទេសចរណ៍ ដែលមានទុនវិនិយោគ ដល់ជាង ៨០០លានដុល្លារ អាមេរិក ។ដោយឡែក ចំនួនទេសចរជប៉ុនដែលមកទស្សនានៅកម្ពុជា ក៏នៅតែមានការកើនឡើងពីមួយទៅមួយឆ្នាំ។ឆ្នាំ២០១៨ មានចំនួនជាង ២១មុីននាក់ ក្នុងកំណើន ជាង៣,៥% ។ ៦ខែដើមឆ្នាំ២០១៩ មានកម្ពុជាទទួលបានទេសចរជប៉ុនជាង ១០មុីននាក់ក្នុងកំណើន ៣%។ព្រមជាមួយនោះកាលក្នុងឆ្នាំ២០១៨កន្លងមក ក៏មានទេសចរកម្ពុជា ជាង២២.០០០នាក់ទៅទស្សនាប្រទេសជប៉ុនផងដែរ។
បច្ចប្បន្ននៅភ្នំពេញ មានសណ្ឋាគារដែលវិនិយោគដោយជប៉ុនមាន ៩ ដែលមានសរុបជិត១.០០០ បន្ទប់ មានភោជនិយដ្ឋាន ចំនួន ៥៦ ដែលមានជាង ៣.៣០០ កៅអី ផងដែរ។
លោករដ្ឋមន្ត្រីបានរំលឹកពីការជួយជ្រោមជ្រែងពីសំណាក់មិត្ត ជប៉ុន ក្នុងកិច្ចការអភិរក្សតំបន់បេតិកភណ្ឌអង្គរ ក្នុងនាមជា សហប្រធានគណៈកម្មាធិការអន្តរជាតិ ICC-Angkor ជាមួយបារាំង និងបច្ចប្បន្ននៅតំបន់ប្រាសាទសំបូរព្រៃគុក ខេត្តកំពង់ធំផងដែរ ដែលក្រសួងទេសចរណ៍ និងខិតខំបន្តសហការ ជាមួយ អាជ្ញាធរ អប្សរា អាជ្ញាធរសំបូរព្រៃគុក និងក្រសួងវប្បធម៌ និង ICC អង្គរ ដើម្បីនិរន្តរភាពនៃការអភិវឌ្ឍន័តំបន់បិតិកភណ្ឌទាំងពីរនេះ។
ដើម្បីជំរុញកិច្ចសហប្រតិបត្តិការលើវិស័យទេសចរណ៍រវាងកម្ពុជា និងជប៉ុនឱ្យកាន់តែល្អ ប្រសើរឡើងថែមទៀត លោក ឯកអគ្គរាជទូតជប៉ុនបានបញ្ជាក់ថា រដ្ឋាភិបាល និងប្រជាជនជប៉ុន នៅតែបន្តកិច្ចសហប្រតិបត្តិការលើវិស័យនេះជាមួយកម្ពុជាបន្តទៅទៀត ទោះបីថាឯកឧត្តម បានត្រូវចប់អាណត្តិបេសកកម្ម ទៅហើយក្ដី។
ជាមួយគ្នានោះ លោករដ្ឋមន្ត្រី ថោង ខុន ក៏បានស្នើតាមរយៈ ឯកអគ្គរាជទូតជប៉ុនទៅកាន់រដ្ឋាភិបាល និងវិនិយោគិនជប៉ុន សូមជួយបង្កើនការវិនិយោគបន្ថែមទៀតនៅកម្ពុជា ដូចជា ការវិនិយោគលើការបង្កើតផលិតផលទេសចរណ៍ថ្មីៗ ការវិនិយោគ លើការបង្កើត តំបន់ទេសចរណ៍ថ្មីៗ ពិសេសសម្រាប់ទេសចរ ជប៉ុនដែលកំពុងមានការចូលនិវត្តច្រើន ហើយដែលប្រទេសមួយ ចំនួនក្នុងអាស៊ាន បានអនុវត្តន៍ដោយជោគជ័យកន្លងមក ដូចជានៅ ប្រទេស ម៉ាឡេស៊ី និងថៃជាដើម និងក៏អាចលើផ្នែកមួយចំនួនទៀតដែលជប៉ុនគិតថាអាចវិនិយោគទៅបាន ហើយរាជរដ្ឋាភិបាលកម្ពុជាចាំស្វាគមន៍វិនិយោគិនជប៉ុនជានិច្ច។
លោកថោង ខុន ក៏បា នស្នើដល់ស្ថានទូតជប៉ុនសូមបន្តជួយក្នុងការកសាងផ្លូវចូលទៅកាន់សហគមន៍ទេសចរណ៍សំខាន់ៗមួយចំនួនបន្តទៀត ដែលស្ថិតក្នុងកំរិតនៃសិទ្ធសំរេចរបស់ស្ថានទូតផ្ទាល់ផងដែរ។
ចំពោះសំណើទាំងនេះ ត្រូវបានលោកORINOUCHI ឯកអគ្គរាជទូតដ៏មានសណ្ដានចិត្តប្រពៃ ទទួលយកទៅជម្រាបប្រាប់រដ្ឋាភិបាលរបស់លោកបន្ត ។ឯកឧត្តមឯកអគ្គរាជទូតបានបញ្ជាក់បន្ថែមថា រដ្ឋាភិបាលជប៉ុននៅតែបន្តកិច្ចសហប្រតិបត្តិការល្អជាមួយកម្ពុជា ក្នុងភាពជាមិត្តជិតស្និទ្ធដ៏យូរអង្វែង៕ដោត៖បញ្ញាស័ក្តិ
