ប្រធានាធិបតីតួកម៉េនីស្ថាន បានលេចមុខជាសាធារណៈគួរឲ្យភ្ញាក់ផ្អើល ក្រោយពេលមានពាក្យចចាមអារ៉ាមថា គាត់បានស្លាប់ដោយសារជំងឺកាលពីខែមុន។ នេះបើតាមការចុះផ្សាយរបស់ BBC ។
កាលពីថ្ងៃច័ន្ទ ប្រធានាធិបតីតួកម៉េនីស្ថាន លោក Gurbanguly Berdymukhamedov បានបើកវេទិការសេដ្ឋកិច្ចដែលមានការចូលរួមពីមេដឹកនាំក្នុងតំបន់ នៅទីក្រុង Caspian Sea។
នេះគឺជាការលេចមុខជាសាធារណៈលើកដំបូង ចាប់តាំងពីមានការអះអាងថា គាត់បានស្លាប់ដោយសារតែជំងឺក្រលៀន ដែលមានការចុះផ្សាយនៅលើប្រព័ន្ធផ្សព្វផ្សាយជាភាសារុស្សីយ៉ាងច្រើន។
ចំណែកប្រព័ន្ធផ្សព្វផ្សាយតួកម៉េនីស្ថាន ក៏បានព្យាយាមចុះផ្សាយដែរ ដើម្បីបំផ្លាញពាក្យចចាមអារ៉ាមទាំងនោះ ដោយបង្ហាញពីរូបភាពរបស់ប្រធានាធិបតីវ័យ ៦២ឆ្នាំ នៅថ្ងៃឈប់សម្រាក។
ប៉ុន្តែការលេចមុខនៅថ្ងៃច័ន្ទនេះ ធ្វើឲ្យពាក្យចចាមអារ៉ាមនៃការស្លាប់របស់លោក ត្រូវស្លាប់វិញ។
សូមបញ្ជាក់ថា សេចក្តីរាយការណ៍នៃការស្លាប់របស់ប្រធានាធិបតីតួកម៉នីស្ថាន ត្រូវបានគេមើលឃើញថា បានចុះផ្សាយនៅលើប្រព័ន្ធផ្សព្វផ្សាយនៅលើបណ្តាញសារពត៌មានដែលមានមូលដ្ឋាននៅបរទេស ដែលប្រព័ន្ធផ្សព្វផ្សាយនោះជាឧបករណ៍ប្រឆាំងរបបតួកម៉េនីស្ថាន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC