បាត់ដំបង៖ ឥទ្ធិពលជំនន់ទឹកភ្លៀងជិត១សប្តាហ៍កន្លងមកនេះមិនបង្កឲ្យមានការប៉ះពាល់ធំដុំឡើយ ដល់ផលដំណាំរបស់ប្រជាកសិករក្នុងខេត្តបាត់ដំបង។
កសិករឈ្មោះ កោ សុថា អាយុ៤៩ឆ្នាំ ជាម្ចាស់ចម្ការត្របែករស់ក្នុងភូមិថ្មី ឃុំកន្ទឺ១ ស្រុកបាណន់ បានប្រាប់ឲ្យដឹងនៅថ្ងៃទី១៣ ខែសីហា ឆ្នាំ២០១៩នេះថា ចម្ការត្របែករបស់លោកជិត១ហិកតា បានលិចលង់យ៉ាងឆាប់រហ័សដោយសារទឹកភ្លៀងបន្តធ្លាក់ជាប់ៗគ្នាជាច្រើននៅប៉ែកខាងលើតំបន់ស្រុកសំឡូត ចាប់តាំងពីថ្ងៃទី៦ សីហាមក ប៉ុន្តែបានស្រកយ៉ាងលឿនទៅវិញដែរ ដែលវាមិនបានបង្កឲ្យមានការប៉ះពាល់ធ្ងន់ធ្ងរឡើយ។
ចំណែកឯលោក ឈឹម វជិរា ប្រធានមន្ទីរកសិកម្មរុក្ខាប្រមាញ់ និងនេសាទខេត្តបាត់ដំបង បានបញ្ជាក់ថា ក្នុងអំឡុងមន្ត្រីជំនាញបើកទ្វាទំនប់ទឹកពហុបំណងបាត់ដំបង និងទ្វាទឹកបង្ហតរយៈពេល២-៣ថ្ងៃកន្លងមកនេះ មិនបង្កបញ្ហាធ្ងន់ធ្ងរឡើយ ប៉ុន្តែទឹកបានហូរចូលតាមព្រែកនានា នៃតំបន់វាលទំនាបក្នុងស្រុកឯកភ្នំ បានអំណោយផលទៅវិញទេ ដល់ដំណាំចម្ការ និងដំណាំស្រូវជាង៤០០០ហិកតា ដែលកំពុងប្រឈមការខ្វះខាតទឹកត្រូវបានស្រោចស្រង់ឲ្យប្រសើរឡើង និងនៅតាមតំបន់នៅប៉ែកខាងក្រោមមួយចំនួនទៀត គ្រាន់តែលិចលង់តិចតួចតែប៉ុណ្ណោះ។
គួរបញ្ជាក់ថា ទឹកភ្លៀងដែលជោរជន់ពីផ្នែកខាងលើ នៃស្រុកសំឡូត បានហូរចាក់ចូលក្នុងស្ទឹងសង្កែ បណ្តាលឲ្យទឹកហក់ឡើងយ៉ាងខ្ពស់នៅថ្ងៃទី៩ ក្នុងកម្ពស់១០,៦០ម៉ែត្រ ថ្ងៃទី១១ កម្ពស់ទឹកស្ទឹងឈានដល់ចំណុចប្រកាសអាសន្ន១៣,៧៥ម៉ែត្រ និងបានស្រកចុះទៅវិញគិតត្រឹមព្រឹកថ្ងៃទី១៣ ខែសីហា ឆ្នាំ២០១៩នេះទឹកស្ទឹងសង្កែមានកម្ពស់១០,៩៥ម៉ែត្រ៕ដោយ៖កូឡាប