ខេត្តស្វាយរៀងៈ លោក ម៉ែន វិបុល អភិបាលខេត្តស្វាយរៀង អមដំណើរដោយលោកនាយកទីចាត់ការហិរញ្ញវត្ថុសាលាខេត្ត លោកប្រធានមន្ទីរសាធារណការនិងដឹកជញ្ជូនខេត្ត នាព្រឹកថ្ងៃទី១៣ ខែសីហា ឆ្នាំ២០១៩នេះ បានអញ្ជើញពិនិត្យមើលការស្ថាបនាច្រាំងទន្លេវ៉ៃគោ ក្រុងស្វាយរៀង (ទំនប់តាណេង) ក្នុងនោះមានការរៀបចំប្រព័ន្ធលូបង្ហូរទឹក សួនច្បារ ការ៉ូឡា ពង្រីកផ្លូវ និងរៀបចំកន្លែងអង្គុយសម្រាប់បងប្អូនប្រជាពលរដ្ឋទស្សនាការប្រណាំងទូក។
គួររំលឹកផងដែថា ក្នុងរយៈពេលដែល លោក ម៉ែន វិបុល បាន ចូលកាន់មុខតំណែងជាអភិបាលខេត្តស្វាយរៀងបីឆ្នាំកន្លងមកនេះ លោកបានកសាងនូវសមិទ្ធផលធំៗជាច្រើននៅក្នុងខេត្ត ដែលបានចូលរួមចំណែកក្នុងការអភិវឌ្ឍជាមួយរាជរដ្ឋាភិបាលកម្ពុជា រួមមានការរៀបចំហេដ្ឋារចនាសម្ព័ន្ធ ក្នុងខេត្តឲ្យកាន់តែមានភាពស្រស់បំព្រង ការរៀបចំការ៉ូឡានៅតាមបណ្តោយផ្លូវសំខាន់ៗ ក្នុងក្រុង និងសួនច្បារសាធារណៈ កន្លែងហាត់ប្រាណជាដើម។
ហើយបច្ចុប្បន្នសមិទ្ធផលដែលកំពុងកសាង និងលេចរូបរាងឡើង សម្រាប់ទុកជាកេរមរតកឲ្យបងប្អូនប្រជាពលរដ្ឋនោះគឺច្រាំងទន្លេវ៉ៃគោក្រុងស្វាយរៀង ហើយក្រោយការស្ថាបនារួចរាល់ ក៏ជាទីកន្លែងទស្សនាការប្រណាំងទូក ជាទីកម្សាន្ត លំហែអារម្មណ៍ ទាក់ទាញភ្ញៀវទេសចរ និងកន្លែងហាត់ប្រាណរបស់បងប្អូនប្រជាពលរដ្ឋទូទៅផងដែរ៕ ដោយ៖ វ៉ៃកូ
