មេដឹកនាំហុងកុងគឺអ្នកស្រី Carrie Lam បានធ្វើការព្រមានក្រុមបាតុករប្រឆាំងរដ្ឋាភិបាលថា កុំឲ្យរុញច្រានទីក្រុងធ្លាក់ចូលក្នុងអន្លង់ដ៏សែនជ្រៅ។
ក្នុងសន្និសិទសារព័ត៌មានថ្ងៃអង្គារនេះ អ្នកស្រីថ្លែងថា “ទីក្រុងហុងកុងបានឈានដល់ស្ថានភាពដ៏គ្រោះថ្នាក់ ហើយអំពើហឹង្សាក្នុងអំឡុងពេលតវ៉ា នឹងរុញច្រានទីក្រុងឲ្យធ្លាក់ចូលដល់ផ្លូវមួយដែលមិនអាចត្រឡប់ក្រោយវិញបាន”។
ទីក្រុងកំពុងត្រូវញាំញីដោយការតវ៉ា និងភាពចលាចលអស់រយៈពេល ១០សប្តាហ៍មកហើយ ហើយមិនមានបង្ហាញសញ្ញាស្រាកស្រាន្តសោះ។
ការផ្ទុះការតវ៉ាដ៏ធំដែលមិនធ្លាប់មាន កើតឡើងដើម្បីឆ្លើយតបទៅនឹងច្បាប់ធ្វើបត្យាប័ន ដែលច្បាប់នេះត្រូវបានរដ្ឋាភិបាលហុងកុង ធ្វើការព្យូរហើយនាពេលបច្ចុប្បន្ន។ ទោះយ៉ាងណា ក្រុមបាតុករ បានទាមទារឲ្យរដ្ឋាភិបាលបោះបង់វាចោលទាំងស្រុង និងទាមទារឲ្យមេដឹកនាំហុងកុងដែលគាំទ្រទីក្រុងប៉េកាំងចុះចេញពីដំណែង។
ការតវ៉ាបានផ្ទុះជាអំពើហឹង្សាជាច្រើនដង ក្រោយប៉ះទង្គិចគ្នារវាងក្រុមបាតុករ និងប៉ូលីស។ ប៉ូលីសក៏មានការបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រដាក់បាតុករផងដែរ។
សូមរំលឹកថា ទីក្រុងហុងកុង ត្រូវបានអង់គ្លេសប្រគល់ត្រឡប់ទៅឲ្យចិនវិញនៅឆ្នាំ ១៩៩៧ ក្រោមកិច្ចព្រមព្រៀង “ប្រទេសមួយ ប្រព័ន្ធដឹកនាំពីរ” ដែលធ្វើឲ្យហុងកុងមានសេរីភាពក្នុងការបញ្ចេញមតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
