ខេត្តព្រះវិហារ ៖ អគ្គស្នងការរងនគរបាលជាតិ រួមជាមួយអាជ្ញាធរខេត្តព្រះវិហារ បើកកិច្ចប្រជុំផ្សព្វផ្សាយស្តីពី ការងារបង្ការ ទប់ស្កាត់ និងបង្ក្រាបការនាំចូលដោយខុសច្បាប់នូវសារធាតុញៀន នៅតាមបណ្តោយព្រំដែនកម្ពុជា-ឡាវ នៅសាលប្រជុំសាលាខេត្តព្រះវិហារ នាថ្ងៃទី ១៣ ខែសីហា ឆ្នាំ ២០១៩ ។
ក្នុងឱកាសនោះ លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងជាអគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន ក៏បានលើកយកទិសដៅបន្តរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លើកទិសដៅ ៤ចំណុច៖
១-បញ្ចប់ទាំងស្រុងនៅតំណាច់ឆ្នាំ ២០១៩ នេះនូវរាល់បទល្មើសគ្រឿងញៀន តាមតាមបណ្តាខ្លឹបកម្សាន្ត និងទីសប្បាយដ្ឋាននានា។
២-ត្រូវរឹតបន្តឹងការត្រួតពិនិត្យដើម្បី ទប់ស្កាត់ បង្ក្រាប លំហូរគ្រឿងញៀនចូលមកកម្ពុជានាទិសឦសាន តាមព្រំដែនកម្ពុជា-ឡាវ។
៣-ខិតខំស្រាវជ្រាវបង្ក្រាប រាល់ទីតាំងលួចលាក់កែឆ្នៃគ្រឿងញៀន។
៤-មិនត្រូវការពារ មិនត្រូវពាក់ព័ន្ធ មិនត្រូវអត់អោន មិនត្រូវអន្តរាគមន៍ ចំពោះរាល់បទល្មើសគ្រឿងញៀន។
ជាចុងបញ្ចប់ លោកនាយឧត្តមសេនីយ៍ ម៉ក់ ជីតូ បានមានមតិផ្តាំផ្ញើដល់មន្ទីរអង្គភាពពាក់ព័ន្ធជុំវិញខេត្ត ត្រូវធ្វើការប្រជុំផ្សព្វផ្សាយដល់មន្ត្រីក្រោមឱវាទរៀងរាល់ ១ខែម្តង និងមហាជនអោយបានយល់ជ្រួបជ្រាប អំពីគ្រោះថ្នាក់នៃគ្រឿងញៀន ដំឡើផែនទី កំណត់ទីតាំង កំណត់មុខសញ្ញា នៅក្នុងភូមិសាស្ត្រគ្រប់គ្រងរបស់ខ្លួន ដើម្បីធ្វើការបង្ក្រាបអោយបានទាន់ពេល ជាពិសេសត្រូវ យកចិត្តទុកដាក់ត្រួតពិនិត្យចំពោះការចេញចូលរបស់ប្រទេសជិតខាង ៕ ដោយ៖កូឡាប
