ភ្នំពេញ ៖ ករណីអំពើឃាតកម្មមួយបានកើតឡើង បង្កដោយក្មេងទំនើងមួយក្រុម បានវាយទៅលើបុរសម្នាក់បណ្តាលឲ្យស្លាប់ក្នុងថ្លុកឈាម ។ ហេតុការណ៍នេះកើតឡើងនៅវេលាម៉ោង១រំលងអធ្រាត្រ ឈានចូលថ្ងៃទី ១៤ ខែសីហា ឆ្នាំ ២០១៩ នៅលើផ្លូវទំនប់កប់ស្រូវ(វិថីវិមានឈ្នះ-ឈ្នះ) ស្ថិតក្នុងភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ ។
សាកសពពុំស្គាល់ឈ្មោះ ទីលំនៅ ភេទប្រុស សពសប្បុរខ្មៅស្រអែម មាឌល្មម កំពស់១,៦៥ ម៉ែត្រ ។
ភិនភាគពិសេស ៖ ១.នៅដើមដៃឆ្វេងមានចាក់សាក់រូបតុក្កតាពណ៌ខៀវ, មានចាក់សាក់រូបក្បាលខ្លានៅដើមដៃឆ្វេងពណ៌ខៀវ និងនៅចង្កេះស្តាំមានចាក់ដាក់រូបមនុស្សប្រុសស្រី ។ សមត្ថកិច្ចបានធ្វើការបូមយកទឹកនោមចេញពីសាកសពចំនួន១០ccយកមកវិភាគរកឃើញសារធាតុញៀនប្រភេទ មេតំហ្វេតាមីន ។
សម្ភារៈបន្សល់នៅកន្លែងកើតហេតុ ៖ ១.ម៉ូតូសង់ពណ៌ខ្មៅពាក់ផ្លាកលេខ ភ្នំពេញ 1AE-5817, មួកសុវត្ថិភាព១, ស្បែកជើង១គូដុំថ្ម១ដុំ និងដបជ័រដាក់សាំងចំណុះកន្លះលីត្រចំនួន២ដប (សម្ភារៈទាំងនេះប៉ុស្តិ៍រក្សាទុក)។
តាមការបំភ្លឺពីឈ្មោះ ថោង វុទ្ធី ភេទប្រុស អាយុ៥៦ឆ្នាំ (អ្នកលក់សាំងនៅលើផ្លូវទំនប់កប់ស្រូវ) បានឲ្យដឹងថា នៅវេលាម៉ោង១រំលងអធ្រាត្រ ឈានចូលថ្ងៃទី១៤ ខែសីហា ឆ្នាំ២០១៩ គាត់កំពុងអង្គុយលក់សាំង ឃើញជនរងគ្រោះជិះម៉ូតូម៉ាកសង់ពណ៌ខ្មៅមកពីទិសខាងជើងមកចាក់សាំងកន្លះលីត្រ និងទិញ១លីត្រទៀត ដាក់ដបទឹកសុទ្ធចំនួន២ដប ពេលនោះគាត់ឃើញមានមនុស្សប្រុសមួយក្រុមក្មេងៗជិះម៉ូតូ៤គ្រឿង ឈប់ចាំនៅខាងជើងចំងាយពីកន្លែងលក់សាំងប្រហែល១០០ម៉ែត្រ ។ ពេលជនរងគ្រោះជិះចេញទៅវិញ ស្រាប់តែប្រុសមួយក្រុមក្មេងទាញមួកសុវត្ថិភាពគប់ទៅលើជនរងគ្រោះ ហើយជិះម៉ូតូដេញតាមវាយពីក្រោយរហូតដល់ចំងាយប្រហែល៣០០ម៉ែត្រខាងមុខទៀត ប្រហែល២០នាទីឃើញមានសមត្ថកិច្ចមកសួរនាំ ទើបគាត់ដឹងថា ជនរងគ្រោះស្លាប់។
តាមការបំភ្លឺពីស្ត្រីម្នាក់ទៀត មានមុខរបរលក់ដូរ បានឲ្យដឹងថា នៅថ្ងៃទី១៤ ខែ សីហា ឆ្នាំ ២០១៩ វេលាម៉ោង ១យប់ គាត់កំពុងក្នុងក្នុងផ្ទះ ស្រាប់តែឮសំឡេងមនុស្សស្រែកថា ម៉ែអើយជួយផងៗ និងឮសូរសំឡេងភូសៗពីកន្លែងកើតហេតុ គាត់ក៏ដើរចេញមកក្រៅឃើញមានក្មេងប្រុសចំនួន៦នាក់ ជិះម៉ូតូចំនួន៣គ្រឿង មិនដឹងម៉ាកជិះទៅទិសខាងត្បូង បន្ទាប់មកគាត់ក៏មកមើលឃើញជនរងគ្រោះដេកស្លាប់នៅលើថ្លុកឈាមតែម្តង។
ករណីនេះ សមត្ថកិច្ចបានធ្វើការសន្និដ្ឋានថា ជនរងគ្រោះស្លាប់ដោយវាយក្បាល (បែកក្បាលចេញខួរ) ៕ដោយ៖កូឡាប
