ប្រទេសចិនបានថ្កោលទោសចំពោះការប៉ះទង្គិចហឹង្សានៅទីក្រុងហុងកុង និងចាត់ទុកឥរិយាបទរបស់ក្រុមបាតុករថាដូចភេរវកម្ម។ នេះបើតាមការចុះផ្សាយរបស់ BBC។
ការប៉ះទង្គិចហឹង្សារវាងក្រុមបាតុករ និងប៉ូលីសបានកើតឡើងនៅព្រលានយន្តហោះហុងកុងយប់ថ្ងៃអង្គារ តែប៉ុន្មានថ្ងៃប៉ុណ្ណោះ ក្រោយពេលការតវ៉ា បានដំណើរការទៅដោយសន្តិវិធី។
ក្នុងការប៉ះទង្គិចគ្នា គេឃើញមានប៉ូលីសបង្ក្រាបកុប្បកម្មធ្វើការបាញ់ឧស្ម័នបង្ហូរទឹកភ្នែក និងការបាញ់គ្រាប់កាំភ្លើងជ័រ ចំណែកក្រុមបាតុករក៏បានធ្វើការគប់ឥដ្ឋតបតវិញផងដែឬ។
នេះគឺជាលើកទី ២ហើយក្នុងរយៈពេល ១សប្តាហ៍ដែលមន្ត្រីចិនបាន ធ្វើការប្រដូចជាសាធារណៈនូវសកម្មភាពរបស់ក្រុមបាតុករថា ជាសកម្មភាពភេរវកម្ម។
អ្នកសង្កេតការមួយចំនួន បានសម្តែងការជឿជាក់ថា ការប្រើប្រាស់ភាសាដដែលពីសំណាក់មន្ត្រីចិន បានបង្ហាញថា ចិនកំពុងបាត់បង់ការអត់ធ្មត់ជាមួយនឹងក្រុមបាតុករហើយ ហើយវាអាចនឹងមានការអន្តរាគមន៍ពីសំណាក់ក្រុងប៉េកាំង។
ចំណែកភាគីអាមេរិចវិញ បាននិយាយថា ខ្លួនមានការកង្វល់យ៉ាងខ្លាំងចំពោះសេចក្តីរាយការណ៍នៃការចល័តយោធាប៉ារ៉ាចិននៅតាមបណ្តោយព្រំដែនហុងកុង និងបានជំរុញឲ្យភាគីខាងចិន គោរពស្វ័យភាពរបស់ហុងកុង។
ទោះយ៉ាងណា ការវិភាគភាគច្រើនបាននិយាយថា នៅតំណាក់កាលនេះ អន្តរាគមន៍យោធាហាក់មិនអាចកើតមានឡើងនោះទេ។
សូមបញ្ជាក់ថា អតីតដែនដីអនានិគមន៍របស់អង់គ្លេសកំពុងត្រូវញាំញីដោយការតវ៉ា និងភាពចលាចលអស់រយៈពេល ១០សប្តាហ៍មកហើយ ហើយមិនមានបង្ហាញសញ្ញាស្រាកស្រាន្តសោះ។
ការផ្ទុះការតវ៉ាដ៏ធំដែលមិនធ្លាប់មាន កើតឡើងដើម្បីឆ្លើយតបទៅនឹងច្បាប់ធ្វើបត្យាប័ន ដែលច្បាប់នេះត្រូវបានរដ្ឋាភិបាលហុងកុងធ្វើការព្យូរហើយនាពេលបច្ចុប្បន្ន។ ទោះយ៉ាងណា ក្រុមបាតុករ បានទាមទារឲ្យរដ្ឋាភិបាលបោះបង់វាចោលទាំងស្រុង និងទាមទារឲ្យមេដឹកនាំហុងកុងដែលគាំទ្រទីក្រុងប៉េកាំងចុះចេញពីដំណែង។
ទីក្រុងហុងកុង ត្រូវបានអង់គ្លេសប្រគល់ត្រឡប់ទៅអោយចិនវិញនៅឆ្នាំ ១៩៩៧ ក្រោមកិច្ចព្រមព្រៀង “ប្រទេសមួយ ប្រព័ន្ធដឹកនាំពីរ” ដែលធ្វើឲ្យហុងកុងមានសេរីភាពក្នុងការបញ្ចេញមតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC