ប្រធានាធិបតីអាមេរិច ដូណាល់ ត្រាំ បានស្នើសុំជួបដោយផ្ទាល់ជាមួយនឹងមេដឹកនាំចិន ស៊ី ជីនពីង ដើម្បីពិភាក្សាពីបញ្ហាវិបត្តិនយោបាយដ៏ក្តៅនៅទីក្រុងហុងកុង។
នៅក្នុងបណ្តាញសង្គម Twitter លោក ត្រាំថ្លែងថា គាត់មានជំនឿជាតិយ៉ាងខ្លាំងថា លោក ស៊ី ជីនពីងអាចនឹងដោះស្រាយបញ្ហាតវ៉ានៅហុងកុងបានយ៉ាងលឿន និងតាមគោលការណ៍មនុស្សធ៌ម។
លោកត្រាំ បានសរសេរនៅលើ Twitter របស់លោកដូច្នេះថា “លោក ស៊ី គឺជាមេដឹកនាំដ៏អស្ចារ្យដែលមានការគោរពខ្លាំងបំផុតចំពោះប្រជាជនរបស់គាត់”។
ការសុំជួបពិភាក្សាជាមួយនឹងមេដឹកនាំចិន កើតឡើងក្រោយពេលទីក្រុងហុងកុង ត្រូវញាំញីដោយការតវ៉ា និងភាពចលាចលអស់រយៈពេល ១០សប្តាហ៍មកហើយ ហើយមិនមានបង្ហាញសញ្ញាស្រាកស្រាន្តសោះ។
ការផ្ទុះការតវ៉ាដ៏ធំដែលមិនធ្លាប់មាន កើតឡើងដើម្បីឆ្លើយតបទៅនឹងច្បាប់ធ្វើបត្យាប័ន ដែលច្បាប់នេះត្រូវបានរដ្ឋាភិបាលហុងកុងធ្វើការព្យូរហើយនាពេលបច្ចុប្បន្ន។ ទោះយ៉ាងណា ក្រុមបាតុករ បានទាមទារឲ្យរដ្ឋាភិបាលបោះបង់វាចោលទាំងស្រុង និងទាមទារឲ្យមេដឹកនាំហុងកុងដែលគាំទ្រទីក្រុងប៉េកាំងចុះចេញពីដំណែង។
រដ្ឋាភិបាលចិនបានថ្កោលទោសចំពោះការតវ៉ារបស់ក្រុមបាតុករនៅហុងកុង និងបានហៅសកម្មភាពរបស់ពួកគេថា ជាសកម្មភាពភេរវកម្ម។
ចំណែកទីប្រឹក្សាសន្តិសុខជាតិអាមេរិច លោក John Bolton បាមព្រមានចិនឲ្យដើរដោយមានការប្រុងប្រយ័ត្នខ្ពស់ចំពោះបញ្ហាហុងកុង ពីព្រោះប្រជាជននៅអាមេរិចបានចង់ចាំប្រវត្តិសាស្ត្រ នៃការបង្ក្រាបដ៏ឃោរឃៅនៅទីលាន Tiananmen ដែលសម្លាប់បាតុករចិនរាប់ពាន់នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
