ស្រុកអន្លង់វែង៖ គ្រោះថ្នាក់អគ្គិភ័យដោយភ្លើងឆេះផ្ទះកើតឡើងនៅភូមិអូរជញ្ជៀន ឃុំ-ស្រុកអន្លង់វែង ដែលមានជនរងគ្រោះឈ្មោះ គួយ គឹមលេញ ភេទប្រុស អាយុ៥៧ ឆ្នាំ រស់នៅភូមិឃុំខាងលើ មុខរបរ លក់ចាប់ហួយ ប្រពន្ធឈ្មោះ អ៊ឹង មួយប៉ ភេទស្រី អាយុ ៤៩ ឆ្នាំ ជាម្ចាស់ផ្ទះ បណ្តាលឱ្យមានការខូចខាត ផ្ទះថ្ម ១ ខ្នង ទំហំ ៩ ម៉ែត្រ គុណ ១២ ម៉ែត្រ កម្ពស់ ២ ជាន់ ដំបូលស័ង្កសី និងទ្រព្យសម្បត្តិរបស់របរប្រើប្រាស់មួយចំនួន ដោយមូលហេតុទុសេខ្សែភ្លើង។
ស្នងការដ្ឋាននគរបាលខេត្តឧត្តរមានជ័យ បានឲ្យដឹងថា ករណីខាងលើនេះ កម្លាំងនគរបាលខេត្ត ស្រុកអន្លង់វែង ស្រុកត្រពាំងប្រាសាទ វរៈ ៩០៥ និងកម្លាំងយោធា កងរាជអាវុធហត្ថ ទាំងអាជ្ញាធរ និងប្រជាពលរដ្ឋ ជួយអន្តរាគមន៍ ដោយប្រើរថយន្តពន្លត់អគ្គិភ័យ សរុប ៥ គ្រឿង ម៉ូតូដឹកទឹកជាច្រើនគ្រឿងផងដែរ បាញ់ពន្លត់គិតមកដល់ម៉ោង៥ ព្រឹក ដោយប្រើប្រាស់ទឹកសរុប ចំនួន ៤០ ឡាន ។
ក្នុងហេតុការណ៍អគ្គិភ័យឆាបឆេះបណ្តាលឱ្យផ្ទុះធុងហ្គាស ប៉ើងកញ្ចក់ទ្វា និងបង្អួច បង្កឲ្យរងរបួស អ្នកកំពុងជួយអន្តរាគមន៍ សរុប ចំនួន ៩ នាក់ ស្រី ៤ នាក់ ក្នុងនោះ នគរបាលស្រុកចំនួន ៤ នាក់ ៕ដោយ៖កូឡាប
