ប្រធានាធិបតីអាមេរិច ដូណាល់ ត្រាំ បានជំរុញឲ្យមេដឹកនាំចិន លោក ស៊ី ជីនពីង ជួបជាមួយនឹងក្រុមបាតុករនៅក្នុងទីក្រុងហុងកុង ដែលបានទាមទារឲ្យមានប្រជាធិបតេយ្យអស់រយៈពេលជាច្រើនសប្តាហ៍មកហើយ។
ទីក្រុងហុងកុង កំពុងត្រូវញាំញីដោយការតវ៉ាអស់រយៈពេលជាង ១០សប្តាហ៍មកហើយ ដែលក្រុមបាតុករបង្កឲ្យមានភាពចលាចលនៅព្រលានយន្តហោះកាលពីដើមសប្តាហ៍នេះ។
លោក ត្រាំ ធ្លាប់និយាយខាងដើមថា លោកចង់ជួបពិភាក្សាផ្ទាល់ខ្លួនជាមួយនឹងមេដឹកនាំចិន ដើម្បីនិយាយពីបញ្ហាវិបត្តិនៅហុងកុង។
កាលពីថ្ងៃព្រហស្បតិ៍ម្សិលមិញនេះ ឯកអគ្គរដ្ឋទូតចិនប្រចាំអស់គ្លេស បានធ្វើការព្រមានថា ទីក្រុងប៉េកាំងនឹងធ្វើអន្តរាគមន៍នៅទីក្រុងហុងកុង ប្រសិនស្ថានការណ៍កាន់តែយ៉ាប់យ៉ឺន។ លោកថ្លែងថា ទីក្រុងហុងកុងកំពុងប្រឈមនឹងស្ថានភាពដ៏លំបាកខ្លាំង ចាប់តាំងពីវាត្រូវបានអង់គ្លេសប្រគល់មកឲ្យចិនវិញក្នុងឆ្នាំ ១៩៩៧។
លោក ដូណាល់ ត្រាំ កាលពីពេលថ្មីៗនេះ បានថ្លែងក្នុងបណ្តាញសង្គមថា លោក ស៊ី ជីនពីងអាចនឹងដោះស្រាយបញ្ហាតវ៉ានៅហុងកុង បានយ៉ាងលឿន និងតាមគោលការណ៍មនុស្សធម៌។ “លោក ស៊ី គឺជាមេដឹកនាំដ៏អស្ចារ្យដែលមានការគោរពខ្លាំងបំផុតចំពោះប្រជាជនរបស់គាត់”។
សូមរំលឹកថា ការផ្ទុះការតវ៉ាដ៏ធំដែលមិនធ្លាប់មាន កើតឡើងដើម្បីឆ្លើយតបទៅនឹងច្បាប់ធ្វើបត្យាប័ន ដែលច្បាប់នេះត្រូវបានរដ្ឋាភិបាលហុងកុង ធ្វើការព្យូរហើយនាពេលបច្ចុប្បន្ន។ ទោះយ៉ាងណា ក្រុមបាតុករ បានទាមទារឲ្យរដ្ឋាភិបាលបោះបង់វាចោលទាំងស្រុង និងទាមទារឲ្យមេដឹកនាំហុងកុងដែលគាំទ្រទីក្រុងប៉េកាំង ចុះចេញពីដំណែង។
រដ្ឋាភិបាលចិនបានថ្កោលទោសចំពោះការតវ៉ារបស់ក្រុមបាតុករនៅហុងកុង និងបានហៅសកម្មភាពរបស់ពួកគេថា ជាសកម្មភាពភេរវកម្ម៕