ខេត្តព្រះសីហនុ៖ នាយកវិទ្យាល័យ ហ៊ុន សែនវាលរេញ លោក ងៀម ស៊ីដារ៉ា បានថ្លែងថា កាលពីរសៀលថ្ងៃទី១៥ សីហា ឆ្នាំ២០១៩ នៅក្នុងសាលប្រជុំវិទ្យាល័យនេះ មានកម្មវិធីផ្តល់ថវិកាអាហារូបករណ៍បន្ថែមចំនួន ៨០ ដុល្លារសហរដ្ឋអាមេរិក ជាលើកទី២ ជូនសិស្សពូកែថ្នាក់ទី១១ និង១២ ផ្នែកវិទ្យាសាស្រ្ត ក្នុងឆ្នាំសិក្សា ២០១៨ -២០១៩ ចំនួន ៣១នាក់។
កម្មវិធីនេះ ឧបត្ថម្ភដោយ ធនាគារ ADB ដោយសិស្សម្នាក់ទទួលបាន ២០០ដុល្លារ ក្នុង១ឆ្នាំ តាមរយៈក្រសួងអប់រំ ជូនដល់ វិទ្យាល័យហ៊ុន សែន វាលរេញ ដែលមានអាជ្ញាធរមូលដ្ឋាន និងអាណាព្យាបាលសិស្ស ព្រមទាំងសិស្សពូកែ ដែលត្រូវទទួលប្រាក់អាហារូបករណ៍បានចូលរួមផងដែរ។
នាឱកាសនោះ តំណាងក្រសួងអប់រំយុវជន និងកីឡា បានរំលឹកដល់សិស្សានុសិស្ស រៀននៅវិទ្យាល័យវាលរេញទាំងអស់ត្រូវខិតខំរៀនសូត្រ ដើម្បីឲ្យមានចំណេះដឹងពិតប្រាកដ នឹងអាចឈានទៅទទួលបានថវិកាអាហារូបករណ៍ពី ធនាគារ ADB ដូចសិស្សពូកែ ដែលទទួលបានថវិកាឧបត្ថម្ភប្រចាំឆ្នាំនៅពេលនេះ។
សូមបញ្ជាក់ថា ប្រឡងសញ្ញាបត្រមធ្យមសិក្សាទុតិយភូមិ នឹងចាប់ផ្ដើមនៅថ្ងៃទី១៩ ខែសីហា ឆ្នាំ២០១៩។ ហើយថា នៅស្រុកព្រៃនប់ មានពីមណ្ឌលប្រឡងស្ថិតក្នុង វិទ្យាល័យ ហ៊ុន សែន វាលរេញ ដោយក្នុងនោះថ្នាក់វិទ្យាសាស្រ្តសង្គម មានចំនួន ១៤បន្ទប់ និងថ្នាក់វិទ្យាសាស្រ្តមាន ៧បន្ទប់។
ចំពោះ បេក្ខជនប្រឡង គឺមកពីវិទ្យាល័យ ហ៊ុន សែន កំពង់សិលា, វិទ្យាល័យ ហ៊ុន សែន កែវផុស, វិទ្យាល័យហ៊ុន សែន ព្រៃនប់ និង វិទ្យាល័យ ហ៊ុន សែន វាលរេញ៕ ដោយ៖ ដែន សីមា
