ខេត្តស្វាយរៀង ៖ ស្ថិតក្នុងឱកាសនៃការជួបសំណេះសំណាលជាមួយមន្ត្រីរាជការ និងមន្ដ្រីជាប់កិច្ចសន្យា នៃមន្ទីរវប្បធម៌ និងវិចិត្រសិល្បៈខេត្ត ស្វាយរៀងនាសៀលថ្ងៃទី១៥ ខែសីហា ឆ្នាំ២០១៩ នេះ លោក ម៉ែន វិបុល អភិបាលខេត្តស្វាយរៀងបានផ្តល់អាទិភាពឲ្យមន្ត្រីរាជការនៃមន្ទីរវប្បធម៌លើកជាសំណួរ សំណូមពរ ពាក់ព័ន្ធក្ដីកង្វល់ បញ្ហាប្រឈម ក្នុងអនុវត្តការងារប្រចាំថ្ងៃរបស់មន្ទីរ ។
អញ្ជើញចូលរួមក្នុងពិធីនេះមានលោកស្រី ឯក សុវណ្ណភារៈ អភិបាលរងខេត្ត លោកស្រីនាយករងរដ្ឋបាលសាលាខេត្ត លោកនាយកទីចាត់ការធនធាន មនុស្សសាលាខេត្ត និងលោកប្រធានមន្ទីរមន្ទីរមុខងារសាធារណៈព្រមទាំងមន្ត្រីររាជការនៃមន្ទីរវប្បធម៌ជាច្រើនរូបទៀត។
ជាការឆ្លើយតបលោកអភិបាលខេត្តបានផ្តល់ការឆ្លើយតប និងដោះស្រាយជូន តាមនិតិវិធីច្បាប់ និងស្ថានភាពជាក់ស្តែង ជាមួយនោះបានក្រើនរំឭកអំពីរបៀបរបបធ្វើការងារ ដូចជាពង្រឹងចំណេះ ជំនាញ និងតួនាទីភារៈកិច្ចរបស់ខ្លួនឲ្យបានល្អប្រសើរ ដើម្បីជាស្ពានមួយឆ្ពោះទៅកាន់ការរីកចម្រើនក្នុងវិស័យវប្បធម៌ និងសិល្បះក្នុងខេត្តស្វាយរៀងបន្ថែមទៀត។
ចុងបញ្ចប់នៃពិធីនេះលោកអភិបាលខេត្តបានឧបត្ថមថវិកាដល់មន្ត្រីរាជការ និងមន្ត្រីជាប់កិច្ចសន្យាសរុបចំនួន៥៥នាក់ ក្នុងម្នាក់ៗ ទទួលបាន១០០,០០០ រៀល។
បន្ទាប់ពីចប់ពិធីសំណេះសំណាលលោកអភិបាលខេត្តបានអញ្ជើញពិនិត្យមើលទីតាំងដាក់វត្ថុបុរាណ ដែលគ្រោងរៀបចំឲ្យទៅជាសារៈមន្ទីរ នៃមន្ទីរវប្បធម៌និងវិចិត្រសិល្បះខេត្តស្វាយរៀងនាពេលខាងមុខផងដែរ ៕ ដោយ ៖ វ៉ៃកូ