អ្នកឡើងអគារខ្ពស់ៗជនជាតិបារាំង ដែលត្រូវគេស្គាល់ថាជាមនុស្សពីងពាង បានឡើងអគារដ៏ខ្ពស់មួយខ្នងកម្ពស់ ៦៨ជាន់នៅទីក្រុងហុងកុង និងបានដាក់បដា ដើម្បីជំរុញឲ្យមានសន្តិភាពនៅក្នុងទីក្រុងដែលញាំញីដោយការបាតុកម្មអស់រយៈពេលជាច្រើនសប្តាហ៍។
មនុស្សពីងពាងឈ្មោះ Alain Robert បានដាក់បដានៅលើជញ្ជាំងអគារនោះនៅថ្ងៃសុក្រម្សិលមិញនេះ ដែលបដានោះបង្ហាញពីការចាប់ដៃគ្នា និងទង់ជាតិតំណាងទីក្រុងហុងកុង និងប្រទេសចិន។
ទីក្រុងហុងកុង ដែលជាអតីតទឹកដីអាណានិគមន៍របស់អង់គ្លេស កំពុងជួបវិបត្តិធ្ងន់ធ្ងរ ដោយសារតែផ្ទុះការតវ៉ាប្រឆាំងរដ្ឋាភិបាល ជុំវិញការបង្កើតច្បាប់ធ្វើបត្យាប័ន។
មនុស្សពីងពាងវ័យ ៥៧ឆ្នាំខាងលើ ដែលត្រូវបានគេស្គាល់ថា បានឡើងអគារខ្ពស់ៗជាច្រើនជុំវិញពិភពលោក បាននិយាយថា សកម្មភាពដ៏គ្រោះថ្នាក់របស់គាត់ គឺជាការអំពាវណាវយ៉ាងបន្ទាន់ដើម្បីឲ្យមានសន្តិភាព។
លោកថ្លែងប្រាប់ប្រព័ន្ធផ្សព្វផ្សាយថា “អ្វីដែលខ្ញុំបានធ្វើប្រហែលជាអាចបញ្ចុះកម្តៅ និងប្រហែលជាបង្កើតស្នាមញញឹមបាន។ វាគឺជាក្តីសង្ឃឹមរបស់ខ្ញុំ”។
សូមរំលឹកថា កាលពីដើមឆ្នាំនេះ មនុស្សពីងពាងខាងលើត្រូវបានចាប់ខ្លួននៅក្នុងប្រទេសហ្វីលីពីន ក្រោយពេលគាត់បានឡើងអគារកម្ពស់ ៤៧ជាន់នៅក្នុងទីក្រុងម៉ានីល។
រូបលោកធ្លាប់បានឡើងអគារខ្ពស់ៗជាច្រើនជុំវិញពិភពលោក ដូចជាឡើងអគារ Burj Khalifa នៅទីក្រុងឌូបៃ ដែលវាគឺជាអគារខ្ពស់បំផុតក្នុងលោក ព្រមទាំងអគារ Petronas Towers នៅទីក្រុងកូឡាឡាំពួរ និងអគារ Heron នៅទីក្រុងឡុងជាដើម៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC