ខេត្តស្វាយរៀងៈ លោកស្រីភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមការងារថ្នាក់ជាតិ ចុះមូលដ្ឋានស្រុកស្វាយទាប កាលពីថ្ងៃទី១៨ ខែសីហា ឆ្នាំ២០១៩ អញ្ជើញចូលរួមក្នុងការពិនិត្យព្យាបាលជំងឺដោយឥតគិតថ្លៃ ជូនដល់ប្រជាពលរដ្ឋនៅស្រុកស្វាយទាប ពីសំណាក់ក្រុមគ្រូពេទ្យស្ម័គ្រចិត្តលោក ហ៊ុន ម៉ានី ។ ពិធីនេះក៏មានការអញ្ជើញចូលរួមផងដែរពីសំណាក់លោកតូច ប៉ូលីវ៉ា និងលោកស្រី ឯក សុវណ្ណភារៈ អភិបាលរងខេត្តស្វាយរៀង តំណាងលោកអភិបាលខេត្ត ក្រុមការងារថា្នក់កណ្តាលចុះជួយស្រុកស្វាយទាប ក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី មន្ទីរ អង្គភាព ក្នុងខេត្ត និងក្រុមគ្រូពេទ្យស្ម័គ្រចិត្តប្រមាណ ៤៣៩ នាក់ ។
តាមការឱ្យដឹងពីសំណាក់មន្ត្រីសុខាភិបាលខេត្តស្វាយរៀង បានឱ្យដឹងថាៈ សម្រាប់ការព្យាបាលជំងឺជូនប្រជាពលរដ្ឋរួមមាន៖ ជំងឺទូទៅ មានវះកាត់ខ្នាតតូច ជំងឺផ្លូវចិត្ត ជំងឺទូទៅផ្នែកកុមារ ជំងឺរោគស្ត្រី ជំងឺឬសដូងបាត ជំងឺសួត ក្រពះ ពោះវៀន ជំងឺផ្លូវដង្ហើម ជំងឺប្រដាប់រំលាយអាហារ ជំងឺសើស្បែក ជំងឺព្រូន ជំងឺស្លេកស្លាំង ជំងឺសន្លាក់ឆ្អឹង ជំងឺរលាកថ្លើម ជំងឺកាមរោគ ជំងឺគ្រុនចាញ់ ជំងឺគ្រុនឈាម ជំងឺភ្នែក សុខភាពមាត់ធ្មេញ ជំងឺទឹកនោមផ្អែម ជំងឺបេះដូង លើសឈាម ជំងឺត្រចៀក ច្រមុះ បំពង់ករ ជំងឺតម្រងនោម អេកូសាស្ត្រ ព្យាបាលរបួស វាស់ចង្វាក់បេះដូង មន្ទីរពិសោធន៍(វិភាគឈាម)។
ក្រុមការងារគ្រូពេទ្យស្ម័គ្រចិត្ត លោក ហ៊ុន ម៉ានី បានពិនិត្យព្យាបាលជំងឺ និងចែកថ្នាំពេទ្យ រួមទាំងមានអាហារចែកជូនអាហារសម្រន់ជានំបុ័ង និងទឹកសុទ្ធផងដែរ ។ ការចុះពិនិត្យ និងព្យាបាលជំងឺនេះពិតជាសារប្រយោជន៍យ៉ាងច្រើន ដល់ប្រជាពលរដ្ឋដែលនៅតំបន់ដាច់ស្រយាល និងផ្ដល់សេវាសុខភាព តាមបែបបច្ចេកវិទ្យាទំនើបដល់មូលដ្ឋាន ៕ ដោយ៖វ៉ៃកូ