បាត់ដំបង៖ នៅក្នុងមណ្ឌលខេត្តបាត់ដំបងត្រឹមតែថ្ងៃដំបូង នៃសម័យប្រឡងទុតិយភូមិ២០១៩ មានបេក្ខជនចំនួន១០០នាក់អវត្តមានមិនចូលរួមប្រឡងដោយមិនមានមូលហេតុច្បាស់លាស់។
តាមការគូសបញ្ជាក់របស់លោក យី សុងគី ប្រធានមន្ទីរអប់រំ យុវជន និងកីឡាខេត្តបាត់ដំបងបានឲ្យដឹងនៅថ្ងៃទី១៩ ខែសីហាកន្លងមកនេះថា សម័យប្រឡងទុតិយភូមិប្រចាំឆ្នាំ២០១៨-២០១៩ មានបេក្ខជនបេក្ខនារីចូលរួមប្រឡងសរុបមានចំនួន៧២៧៤នាក់ ឆ្លងតាមការប្រឡងពេញមួយព្រឹកនៅក្នុងថ្ងៃទីដំបូងគឺមានបេក្ខជនអវត្តមានកើនរហូតដល់ចំនួន១០០នាក់ដែលមានស្ទើរតែនៅគ្រប់មណ្ឌលប្រឡងទាំង១១។
នៅក្នុងចំណោមសិស្សានុសិស្សជាបេក្ខជនហើយអវត្តមានមិនបានចូលរួមប្រឡងទាំងចំនួន១០០នាក់ក៏នៅមានកូនសិស្សចំនួន២នាក់ផងដែរ មានអាការៈសុខភាពមិនស្រួលខ្លួនដែលចាំបាច់ត្រូវក្រុមគ្រូពេទ្យប្រចាំការបានជួយសង្គ្រោះភ្លាមៗនៅនឹងកន្លែងទាន់ពេលវេលា ក្រោយការធូរស្រាលឲ្យចូលប្រឡងធម្មតាវិញ រីឯបេក្ខជន១នាក់ទៀតបានមានបញ្ហាសុខភាពធ្ងន់ធ្ងរចាំបាច់ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តដែលអាក់ខានក្នុងការប្រឡងរបស់ខ្លួន។
មន្ត្រីខាងលើបានបន្ថែមបន្តថា នៅក្នុងសម័យប្រឡងឆ្នាំ២០១៨ កន្លងមកបេក្ខជនដែលអវត្តមានមិនចូលរួមប្រឡងមានត្រឹមតែចំនួន៥១នាក់ប៉ុណ្ណោះខុសគ្នាជិតពាក់កណ្តាលនឹងដំណើរការប្រឡងឆ្នាំ២០១៩នេះបេក្ខជនអវត្តមានមិនបានចូលប្រឡងកើនរហូតដល់១០០នាក់។
គួររម្លឹកដែរថា សម័យប្រឡងដែលប្រព្រឹត្តទៅនៅថ្ងៃទី១៩ ខែសីហា ឆ្នាំ២០១៩នេះសិស្សានុសិស្សជាបេក្ខជន បេក្ខនារីចូលរួមប្រឡងសរុបចំនួន៧២៧៤នាក់ ក្នុងនោះស្រីចំនួន៤០៧៤នាក់ រីឯមណ្ឌលប្រឡងមានចំនួន១១មណ្ឌល បែងចែកជា២ផ្នែក មានផ្នែកវិទ្យាសាស្ត្រចំនួន៥មណ្ឌល និងផ្នែកវិទ្យាសាស្ត្រសង្គមចំនួន៦មណ្ឌល ឈ្មោះសិស្សត្រូវប្រឡងកើនឡើងក្នុងចំនួនតិចតួចបើប្រៀបធៀបនឹងឆ្នាំចាស់២០១៨ ៕ ដោយ៖កូឡាប