ភ្នំពេញ ៖ រដ្ឋបាលរាជធានីភ្នំពេញ បន្តពិភាក្សាដោះស្រាយជូនអាជីវករលក់ដូនៅផ្សារសិនជូរីផ្លាហ្សានា បច្ចុប្បន្នជាបន្តទៀត ដើម្បីផ្តល់ភាពយុត្តិធម៌ដល់ពួកគាត់ អោយមានទីតាំងលក់បន្តទៀត ទោះបីផ្សារនេះត្រូវអភិវឌ្ឍន៍ជាផ្សារទំនើបក៏ដោយ។
នេះជាការលើកឡើងរបស់ លោក នួន ផារ័ត្ន អភិបាលរងរាជធានីភ្នំពេញ ក្នុងពិធីជួបស្តាប់យោបល់ជាមួយអាជីវករនៅរសៀលថ្ងៃទី១៩ ខែសីហា ឆ្នាំ២០១៩ នៅទីតាំងផ្សារសិនជូរីផ្លាហ្សា តាមបណ្តោយផ្លូវសហព័ន្ធរុស្សី ក្នុងខណ្ឌពោធិសែនជ័យ រាជធានីភ្នំពេញ។ លោក អភិបាលរងបញ្ជាក់ថា “ចំពោះបញ្ហានេះ នឹងត្រូវប្រជុំជាមួយគណ:អភិបាលរាជធានីភ្នំពេញ ដើម្បីធ្វើការសម្រេចជូនអាជីវករ ដែលតូបលក់ដូបច្ចុប្បន្ន គឺអោយមានតូបលក់វិញគ្រប់ៗគ្នា”។ ដោយឡែកចំពោះអ្នកលក់ដូនៅលើដងផ្លូវជុំវិញផ្សារសិនជូរីផ្លាហ្សា ក៏នឹងមានការពិភាក្សាផងដែរ។
ក្នុងជំនួបដោះស្រាយករណីលក់ដូរបស់អាជីវករនេះ លោក អភិបាលរង នួន ផារ័ត្ន បានអោយអាជីវកររើសតំណាងរបស់ខ្លួនដើម្បីជួបប្រជុំដោះស្រាយបន្តនៅថ្ងៃសុក្រក្នុងសប្តាហ៍នេះបន្តទៀត នៃចំណុចកណ្តាលណាមួយ។ លោកបន្ថែមថា ហើយអាជីវករមិនត្រូវមានអំពើហឹង្សាណាមួយកើតឡើងនោះទេ គឺចូលរួមដោយស្រាយដោយយុត្តិធម៌ជាមួយគ្នា។
អាជីវករដែលបានចូលរួមជាង១០០នាក់ លក់ដូនៅផ្សារខាងលើនេះ មានបីក្រុម គឺមានអ្នកលក់នៅផ្សារឯកជន អ្នកលក់នៅផ្សាររដ្ឋ និងអ្នកលក់ដូនៅលើទ្រូងផ្លូវជុំផ្សារ បានសំណូមពរ មិនអោយមានការអភិវឌ្ឍន៍ផ្សារ ទៅជាផ្សារទំនើបនោះទេ អោយនៅមានសភាពដើមដដែល។
ចំពោះករណីនេះ លោក ហែម ដារិទ្ធ អភិបាលខណ្ឌពោធិសែនជ័យ បានលើកឡើងថា ចំពោះការអភិវឌ្ឍន៍ផ្សារសិនជូរីផ្លាហ្សាទៅជាផ្សារទំនើប គឺថ្នាក់លើបានសម្រេចប៉ុន្មានឆ្នាំកន្លងទៅហើយ ដូច្នេះទីតាំងជៀសមិនផុតពីការសង់ផ្សារទំនើបនោះទេ។
លោក កែវ ជឺឃាង ប្រធានផ្នែកទៅផ្សារ នៃក្រុមហ៊ុនសិនជូរីផ្លាហ្សា ជាក្រុមហ៊ុនអភិវឌ្ឍន៍នេះទៅជាផ្សារទំនើបដែលមានកំពស់៥ជាន់ បានអោយដឹងថា “ក្រុមហ៊ុននឹងប្រគល់តូបចំពោះអាជីវករដែលមានតូបកំពុងលក់ដូបច្ចុប្បន្ន នូវចំនួនតូបដែលគាត់មាន ចំពោះអ្នកលក់នៅផ្សាររដ្ឋ និងផ្សារឯកជន ដោយឡែកអ្នកលក់នៅលើទ្រូងផ្លូវ គឺក្រុមមិនទទួលខុសត្រូវនោះទេ គឺទុកអោយអាជ្ញាធរជាអ្នកដោះស្រាយ”។ លោកបន្តថា នៅពេលខាងមុខនេះ ក្រុមហ៊ុនចាប់ផ្តើមធ្វើការសាងសង់ តែអាជីវករត្រូវប្តូរមកលក់បណ្តោះអាស្នននៅលើសួនកុមាររយ:ពេល២ឆ្នាំ រងចាំផ្សារសិនជូរីផ្លាហ្សាសាងសង់រួច។ ចំពោះការមកលក់នៅលើសួនកុមារខាងមុខផ្សារ គឺក្រុមហ៊ុនសង់តំបូល និងរៀបចំអោយដោយឥតគិតថ្លៃ។
ក្រុមអាជីវករផ្សារសេនជូរីផ្លាហ្សាជាង ១០០នាក់ តំណាងឱ្យជាង ៨០០នាក់ បាននាំគ្នាធ្វើការតវ៉ា រារាំងមិនឱ្យក្រុមហ៊ុនធ្វើការរុះរើផ្សារចាស់ ដើម្បីសាងសង់ផ្សារថ្មីទំនើប ដែលមានកម្ពស់ ៧ជាន់ ។ ពួកគាត់ថា ធ្វើបែបនេះ ក្រុមហ៊ុនទទួលបានប្រយោជន៍ច្រើន ប៉ុន្តែសម្រាប់ពួកគាត់ ត្រូវខាតប្រយោជន៍ទាំងស្រុង និងជួបការលំបាក គ្មានលទ្ធភាពចូលលក់នៅផ្សារទំនើប និងគ្មានលុយសម្រាប់បង់ធនាគារ ។
ជាងនេះទៅទៀត អាជ្ញាធរ ក៏បានកំពុងរៀបចំវេទិកាសាធារណៈនៅផ្សារសេនជូរីផ្លាហ្សា តែម្តង ដើម្បីជួបជាមួយអាជីវករ ដើម្បីធ្វើការពន្យល់ពួកគាត់ឱ្យបានយល់ពីការវិនិយោគនៅផ្សារមួយនេះ ។
ដោយឡែក អាជីវករលក់ដូរនៅផ្សារសេនជូរី ផ្លាហ្សា ២រូប បានបញ្ជាក់ថា ពួកគាត់ មិនចង់ឱ្យអាជ្ញាធរ និងអ្នកវិយោគកែលម្អរផ្សារនេះទេ ដោយចង់លក់ដូរបែបធម្មតាដដែល ព្រោះពួកគាត់ខ្លាចគេលែងឱ្យលក់ គ្មានលុយចិញ្ចឹមកូនចៅ ។
សូមបញ្ជាក់ថា ដោយសារតែធ្វើការតវ៉ាច្រើនថ្ងៃកន្លងមក ហើយគ្មានដំណោះស្រាយ ទើបនៅថ្ងៃទី១៩ ខែសីហា ឆ្នាំ២០១៩នេះ ក្រុមអាជីវករ បាននាំគ្នាបិទមហាវិថីសហព័ន្ធរុស្ស៊ី ត្រង់ចំណុចមុខផ្សារសេនជូរីផ្លាហ្សា សង្កាត់កាកាប១ ខណ្ឌពោធិ៍សែនជ័យ បង្កឱ្យមានការកកស្ទះចរាចរយ៉ាងខ្លាំង រហូតមានការចុះទៅសម្របសម្រួល ពីសំណាក់អាជ្ញាធរ ទើបពួកគាត់ព្រមដកថយវិញ ។
គួររំលឹកថា កាលពីថ្ងៃទី៨ ខែសីហា ឆ្នាំ២០១៩ បន្ទាប់ពីទទួលបានដំណឹងថា ខាងក្រុមហ៊ុន មានគម្រោងរុះរើផ្សារ ដើម្បីសាងសង់ថ្មីនោះ ក្រុមអាជីវករ ពិតជាមានការភ្ញាក់ផ្អើលខ្លាំងណាស់ ហើយក៏បានប្រមូលផ្ដុំគ្នាធ្វើការតវ៉ាភ្លាមៗដែរ ដើម្បីសុំកុំឱ្យមានការរុះរើ និងសុំឱ្យអាជ្ញាធរជួយដោះស្រាយ ប៉ុន្តែដោយសារតែគ្មានការដោះស្រាយ ទើបពួកគាត់សម្រេចចិត្តនាំគ្នាបិទផ្លូវក្នុងបំណងពន្លឿន ឱ្យមានការដោះស្រាយបានឆាប់ ។
អាជីវករ បាននិយាយថា ពួកគាត់ជាអ្នកលក់តាមកញ្ច្រែង អត់មានស្តង់ និងតូបនោះ ដែលងាយនឹងរងគ្រោះ ជួបការលំបាកបំផុត ប្រសិនបើក្រុមហ៊ុនរុះរើផ្សារ ដែលកំពុងលក់ដូរដោយសុខសាន្តនាពេលនេះ ។ ពួកគាត់សុទ្ធ តែខ្ចីលុយធនាគារមករកស៊ី បើរុះរើផ្សារចាស់ចោល សាងសង់ផ្សារទំនើបថ្មីឡើងវិញ ពួកគាត់គ្មានលទ្ធភាព និងចូលលក់ដូរក្នុងផ្សារថ្មីទំនើបនោះទេ ដូច្នេះពួកគាត់នឹងបាត់បង់កន្លែងលក់ដូរហើយ ជួបការលំបាកគ្មានលទ្ធភាពរកលុយបង់ធនាគារឡើយ។
បើតាមអាជីវករ សព្វថ្ងៃអ្នកលក់ចល័តគ្មានតូប និងស្តង់ដូចជាពួកគាត់ ដែលកំពុងតវ៉ានេះ មានចំនួន ៨០២កន្លែង រីឯអ្នកមានតូបត្រឹមត្រូវមានចំនួន ៣៤១តូប និងអ្នកមានស្តង់ចំនួន ៣២៦ស្តង់ ហើយសរុបការលក់ដូរ បូករួមទាំងអស់ចំនួន១៤៦៩កន្លែង ។
ពួកគាត់ព្រមានថា ប្រសិនបើគ្មានដំណោះស្រាយ ពួកគាត់នឹងប្រមូលផ្ដុំគ្នាជាថ្មី ហើយលើកគ្នាទៅកាន់មុខភូមិគ្រឹះរបស់សម្ដេចតេជោ ដើម្បីឱ្យសម្ដេចឃើញ និងជ្រាបពីទុក្ខលំបាកពួកគាត់ដោយផ្ទាល់តែម្ដង ៕ ដោយកូឡាប
