ភ្នំពេញ ៖ ក្រសួងសាធារណការនិងដឹកជញ្ជូន បាននចេញនូវគោលការណ៍ ៧ ចំណុច របស់មន្ត្រីផ្តល់សេវាសាធារណៈ ក្នុងវិស័យសាធារណការ និងដឹកជញ្ជូន ដេីម្បីអនុវត្តតួនាទី ភារកិច្ច និងសីលធម៌ ក្រោមឱវាទក្រសួងសាធារណការ និងដឹកជញ្ជូន ក្នុងការបម្រើបងប្អូនប្រជាពលរដ្ឋ បានកាន់តែប្រសេីរឡេីង។
តាមរយៈសេចក្តីណែនាំ ការពង្រឹងការអនុវត្តតួនាទី ភារកិច្ច និងក្រមសីលធម៌របស់មន្ត្រីផ្តល់សេវាសាធារណៈ ក្រោមឱវាទក្រសួងសាធារណការ និងដឹកជញ្ជូន លោកទេសរដ្ឋមន្ត្រីក្រសួងសាធារណការ និងដឹកជញ្ជូន ស៊ុន ចាន់ថុល បានបញ្ជាក់ថា ដើម្បីធានានិងចូលរួមចំណែកពង្រឹងការបំពេញតួនាទីភារកិច្ច ប្រកបដោយក្រមសីលធម៌ខ្ពស់របស់មន្ត្រីរាជការ ក្នុងការផ្តល់សេវាសាធារណៈឲ្យកាន់តែមានប្រសិទ្ធភាព និងតម្លាភាពប្រសើរឡើងថែមទៀត ជូនប្រជាពលរដ្ឋ ក្រសួងសាធារណការ និងដឹកជញ្ជូន សូមធ្វើការណែនាំដល់ថ្នាក់ដឹកនាំ និងមន្ត្រីរាជការក្រោមឱវាទ គ្រប់ជាន់ថ្នាក់ដូចខាងក្រោម៖
១. ត្រូវបំពេញតួនាទីជាអ្នកបម្រើប្រជាពលរដ្ឋ ប្រកបដោយក្រមសីលធម៌វិជ្ជាជីវៈ ភាពស្មោះត្រង់
សេចក្តីថ្លៃថ្នូរ និងទំនួលខុសត្រូវខ្ពស់។
២. ត្រូវប្រកាន់ខ្ជាប់នូវឥរិយាបថជាមន្ត្រីល្អ ជាអ្នកបម្រើ និងផ្តល់សេវាសាធារណៈល្អជូនប្រជាពលរដ្ឋ
ប្រកបដោយវិជ្ជាជីវៈ និងការយកចិត្តទុកដាក់ខ្ពស់ ដើម្បីផ្តល់នូវភាពកក់ក្តៅ ទំនុកចិត្ត និងការគោរពស្រឡាញ់ ជូនប្រជាពលរដ្ឋទូទៅ។
៣. ត្រូវកែសម្រួលរបៀបរបបធ្វើការងារ ដើម្បីឆ្លើយតបទៅនឹងសេចក្តីត្រូវការជាក់ស្តែង ជូនប្រជា
ពលរដ្ឋ ដែលមកទទួលសេវា ឲ្យបានល្អបំផុត។
៤. ត្រូវផ្តល់ព័ត៌មានឲ្យបានច្បាស់លាស់អំពីនីតិវិធី និងបែបបទផ្សេងៗ ស្របតាមបទប្បញ្ញត្តិច្បាប់ដែលពាក់ព័ន្ធ និងត្រូវដោះស្រាយបញ្ហានានាជូនប្រជាពលរដ្ឋ ឲ្យបានទាន់ពេលវេលា និងមានប្រសិទ្ធភាពខ្ពស់បំផុត។
៥. ត្រូវចូលរួមអនុវត្តយន្តការកាត់បន្ថយនីតិវិធីស្មុគស្មាញនិងភាពស៊ាំញ៉ាំ ដើម្បីបង្កភាពងាយស្រួល
ដល់ប្រជាពលរដ្ឋក្នុងការទទួលសេវាសាធារណៈ។
៦. មិនត្រូវប្រើប្រាស់តួនាទី និងមុខតំណែងរបស់ខ្លួន ទៅគំរាមកំហែង ឬបង្កការលំបាកដល់
ប្រជាពលរដ្ឋឡើយ ។
៧. ត្រូវចេះសម្របសម្រួលនិងមានការទំនាក់ទំនងល្អជាមួយក្រសួង ស្ថាប័នមានសមត្ថកិច្ច និងអាជ្ញាធរពាក់ព័ន្ធគ្រប់ជាន់ថ្នាក់ ដើម្បីបំពេញតួនាទីបម្រើប្រជាពលរដ្ឋឲ្យបានល្អបំផុត ។
ទទួលបានសេចក្តីណែនាំនេះ គ្រប់អគ្គនាយកដ្ឋាន អគ្គាធិការដ្ឋាន នាយកដ្ឋាន អង្គភាពក្រោមឱវាទក្រសួង និងមន្ទីរសាធារណការ និងដឹកជញ្ជូនរាជធានី ខេត្ត ត្រូវចូលរួមអនុវត្តប្រកបដោយស្មារតីទទួលខុសត្រូវ និងមានប្រសិទ្ធភាពខ្ពស់ ចាប់ពីថ្ងៃចុះហត្ថលេខាតទៅ ៕ ដោយ៖កូឡាប