(ភ្នំពេញ) ៖ រដ្ឋលេខាធិការក្រសួងពាណិជ្ជកម្ម លោក ឱក ប៊ុង បានលើកទឹកចិត្តមន្ត្រី ខិតខំប្រឹងប្រែងសិក្សាមុខជំនាញច្បាប់ពាណិជ្ជកម្មអន្តរជាតិ និងស្វែងយល់អំពីការវិវត្តសំខាន់ៗពាក់ព័ន្ធវិស័យពាណិជ្ជកម្ម នៅក្នុងពិភពលោក ដើម្បីក្លាយទៅជាអ្នកចរចាដ៏ឈ្លាសវៃ និងប៉ិនប្រសព្វ ជាពិសេសការស្វែងរកទីផ្សារ និងការទាញយកអត្ថប្រយោជន៍ពីកិច្ចព្រមព្រៀងទ្វេភាគី និងពហុភាគី ជូនរាជរដ្ឋាភិបាល និងប្រទេសជាតិ។
ការលើកឡើងរបស់ លោករដ្ឋលេខាធិការ បានធ្វើឡើងនាឱកាសអញ្ជើញជាអធិបតីភាព ពិធីបើកវគ្គបណ្តុះបណ្តាលស្តីពី «ច្បាប់ពាណិជ្ជកម្ម និងកិច្ចព្រមព្រៀងពាណិជ្ជកម្មក្នុងក្របខណ្ឌពាណិជ្ជកម្មអន្តរជាតិ» ដែលរៀបចំឡើងដោយវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ នៃក្រសួងពាណិជ្ជកម្ម កាលពីព្រឹកថ្ងៃចន្ទ ទី១៩ ខែសីហា ឆ្នាំ២០១៩ ដោយមានការចូលរួមពីមន្ត្រីអន្តរក្រសួង ប្រមាណជាង ១០០នាក់។
នៅក្នុងឱកាសនោះ លោកឱក ប៊ុង បានគូសបញ្ជាក់ពីសារៈសំខាន់នៃកសាងសមត្ថភាពមន្ត្រី ដើម្បីដឹកនាំការចរចារបៀបវារៈពាណិជ្ជកម្ម សំដៅជំរុញការអភិវឌ្ឍសង្គមសេដ្ឋកិច្ច ព្រមទាំងកិច្ចប្រឹងប្រែងរបស់ក្រសួងពាណិជ្ជកម្ម ក្នុងការចូលរួមអនុវត្តយុទ្ធសាស្ត្រចតុកោណ ដំណាក់កាលទី៤ និងកំណែទម្រង់នានា របស់ប្រមុខរាជរដ្ឋាភិបាល ដើម្បីលើកកម្ពស់បរិយាកាសធុរកិច្ច, វិនិយោគ និងកិច្ចសម្រួលពាណិជ្ជកម្ម នៅក្នុងប្រទេសកម្ពុជា។
«កម្ពុជា ត្រូវមានកាតព្វកិច្ចចូលរួមអនុវត្តវិធានចាំបាច់នានា របស់អង្គការពាណិជ្ជកម្មពិភពលោក (WTO) ដើម្បីគាំទ្រគោលនយោបាយសាកលភាវូពាណិជ្ជកម្ម និងទាញយកអត្ថប្រយោជន៍ ពីការធ្វើសមាហរណកម្មទាំងក្នុងតំបន់ និងពិភពលោក ហើយបច្ចុប្បន្នក្រសួងពាណិជ្ជកម្ម កំពុងជំរុញការអនុវត្តច្បាប់ និងបទប្បញ្ញត្តិដែលមានស្រាប់ និងកសាងច្បាប់ថ្មីៗថែមទៀត ដើម្បីបម្រើការអភិវឌ្ឍវិស័យពាណិជ្ជកម្មជាតិ» លោក ឱក ប៊ុង បានគូសបញ្ជាក់។
សូមជម្រាបថា វគ្គបណ្តុះបណ្តាលថ្ងៃនេះ ធ្វើឡើងក្នុងគោលបំណងពង្រឹងសមត្ថភាពមន្ត្រីរាជរដ្ឋាភិបាល ដើម្បីដឹកនាំចរចាផ្នែកពាណិជ្ជកម្មអន្តរជាតិ ដោយផ្តោតលើប្រធានបទសំខាន់ៗចំនួន ៨ មានដូចជា៖ (១) អង្គការពាណិជ្ជកម្មពិភពលោក (WTO) និងកិច្ចព្រមព្រៀងទូទៅស្តីពីទំនិញ និងពន្ធគយ (២) កិច្ចព្រមព្រៀងពាណិជ្ជកម្មក្នុងតំបន់ (៣) កម្មសិទ្ធិបញ្ញា (៤) គោលនយោបាយពាណិជ្ជកម្ម (៥) ច្បាប់វិនិយោគអន្តរជាតិ (៦) ច្បាប់សហគ្រាសពាណិជ្ជកម្មកម្ពុជា (៧) មូលដ្ឋានគ្រឹះនៃប្រតិបត្តិការពាណិជ្ជកម្មអន្តរជាតិ និងពន្ធដារកម្ពុជា (៨) នីតិវិធីនាំចេញ-នាំចូល៕ ដោយ៖កូឡាប
