មេដឹកនាំហុងកុង អ្នកស្រី Carrie Lam បានថ្លែងនៅថ្ងៃអង្គារនេះថា អ្នកស្រីសង្ឃឹមថា ការតវ៉ាដោយអហឹង្សាកាលពីចុងសប្តាហ៍កន្លងទៅនេះ គឺការចាប់ផ្តើមនៃកិច្ចប្រឹងប្រែង ក្នុងការស្តារសន្តិភាពនៅក្នុងទីក្រុង។
កាលពីចុងសប្តាហ៍នេះ ប្រជាជនហុងកុងរាប់ម៉ឺននាក់បានធ្វើការតវ៉ាដោយប្រមូលផ្តុំគ្នានៅតាមដងផ្លូវ ហើយវាគឺជាការតវ៉ាដ៏ស្ងៀមស្ងាត់បំផុត។
មេដឹកនាំហុងកុងខាងលើ ថ្លែងថា អ្នកស្រីនឹងធ្វើការរៀបចំវេទិកាភ្លាមៗមួយ ដើម្បីធ្វើការពិភាក្សាជាមួយនឹងប្រជាជនគ្រប់ស្រទាប់វណ្ណៈទាំងអស់។
សូមបញ្ជាក់ថា ទីក្រុងហុងកុង ដែលជាអតីតដែនដីអាណានិគមន៍របស់អង់គ្លេស ត្រូវបានញាំញីដោយការតវ៉ាអស់រយៈពេលជាង ១០សប្តាហ៍មកហើយ។ ការផ្ទុះការតវ៉ាដ៏ខ្លាំងក្លា ដែលមិនធ្លាប់មានពីមុនមក គឺដើម្បីប្រឆាំងទៅនឹងច្បាប់ធ្វើបត្យាប័ន ដែលច្បាប់នេះអនុញ្ញាតឲ្យមានការបញ្ជូនជនសង្ស័យពីហុងកុង ទៅធ្វើការកាត់ទោសនៅចិនបាន។
ទោះបីរដ្ឋាភិបាលរបស់អ្នកស្រី Carrie Lam បានប្រកាសផ្អាកច្បាប់នោះទៅហើយក្តី ក្រុមបាតុករក៏នៅតែទាមទារឲ្យរដ្ឋាភិបាល ធ្វើការបោះបង់វាចោលទាំងស្រុង ហើយពួកគេទាមទារឲ្យមេដឹកនាំរូបនោះ ដែលគាំទ្រដោយរបបប៉េកាំង ធ្វើការចុះចេញពីដំណែង។
ទីក្រុងហុងកុង ត្រូវបានអង់គ្លេសប្រគល់ត្រឡប់ទៅឲ្យចិនវិញនៅឆ្នាំ ១៩៩៧ ក្រោមកិច្ចព្រមព្រៀង “ប្រទេសមួយ ប្រព័ន្ធដឹកនាំពីរ” ដែលធ្វើឲ្យហុងកុងមានសេរីភាពក្នុងការបញ្ចេញមតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia