អនុប្រធានាធិបតីអាមេរិច លោក Mike Pence បានថ្លែងប្រាប់ចិនខ្លាំង នៅថ្ងៃច័ន្ទថា កិច្ចព្រមព្រៀងពាណិជ្ជកម្មជាមួយនឹងចិននឹងថយចុះ ប្រសិនជាច្បាប់របស់ហុងកុងត្រូវបានរំលោភបំពាន ហើយលោកក៏បានរិះគន់ទៅលើការរំលោភសិទ្ធិមនុស្សរបស់ចិនផងដែរ។
លោកថ្លែងដូច្នេះថា “ពួកយើងមិនចង់ឲ្យទីផ្សាររបស់ចិនត្រូវខាតបង់នោះទេ ហើយជាការពិតណាស់យើងចង់ឲ្យទីផ្សារពួកគេរីកចម្រើន”។
លោកបន្តទៀតថា ”ដើម្បីឲ្យអាមេរិចបង្កើតកិច្ចព្រមព្រៀងជាមួយចិន ទីក្រុងប៉េកាំងត្រូវតែអនុវត្តន៍ការប្តេជ្ញាចិត្តរបស់ខ្លួនដែលបានធ្វើឡើងក្នុងឆ្នាំ ១៩៨៤ ក្នុងការគោរពបូរណភាពច្បាប់របស់ហុងកុង តាមរយៈសេចក្តីប្រកាសរួមឈ្មោះ Sino-British”។
“ដូចដែលប្រធានាធិបតី (ដូណាល់ ត្រាំ) បានថ្លែងកាលពីថ្ងៃម្សិលមិញនេះ វានឹងមានការលំបាកខ្លាំងសម្រាប់ពួកយើងក្នុងការព្រមព្រៀងអ្វីមួយ ប្រសិនជាអំពើហឹង្សាកើតឡើងនៅហុងកុង”។
កាលពីថ្ងៃអាទិត្យកន្លងទៅនេះ ប្រធានាធិបតីអាមេរិច ដូណាល់ ត្រាំ បានថ្លែងប្រាប់អ្នកសារព័ត៌មានថា គាត់ចង់ឃើញស្ថានការនៅទីក្រុងហុងកុង កើតឡើងតាមលក្ខណៈគោលការណ៍មនុស្សធម៌។ លោកបន្តថា ប្រធានាធិបតីចិន ស៊ី ជីនពីងប្រាកដជាមានលទ្ធភាពសម្រេចបានដំណោះស្រាយ។
សង្រ្គាមពាណិជ្ជកម្មរវាងមហាអំណាចសេដ្ឋកិច្ចទាំងពីរ កំពុងបន្តនៅឡើយ ហើយកាលពីថ្មីៗនេះ អាមេរិចទើបតែបានប្រកាសដាក់បញ្ចូលក្រុមហ៊ុនដៃគូចំនួន ៤៦បន្ថែមរបស់ Huawei ចូលក្នុងបញ្ជីខ្មៅ ទោះបីអាមេរិចបានសម្រេចផ្តល់ពេលឲ្យ Huawei ៩០ថ្ងៃទៀត សម្រាប់ធ្វើជំនួយជាមួយក្រុមហ៊ុនអាមេរិច ដោយមើលឃើញថា ការពន្យារពេលផ្អាកពាណិជ្ជកម្មជាមួយនឹងក្រុមហ៊ុនយក្សចិនខាងលើ ផ្តល់ផលប្រយោជន៍ដល់អតិថិជនអាមេរិច៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN