ភ្នំពេញ៖ នៅព្រឹកថ្ងៃទី២០ ខែសីហា ឆ្នាំ២០១៩ កម្លាំងនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ បានបង្ហាញមុខជនសង្ស័យ២នាក់ ពាក់ព័ន្ធករណីលួចមានស្ថានទម្ងន់ទោសដោយសារការប្រើអំពើហិង្សា កាន់កាប់អាវុធដោយគ្មានការអនុញ្ញាត និងប្រើប្រាស់ដោយខុសច្បាប់នូវសារធាតុ។
មន្ត្រីនគរបាលព្រហ្មទណ្ឌកំរិតស្រាល បានឱ្យដឹងថាកាលពីថ្ងៃទី១៤ ខែសីហា ឆ្នាំ២០១៩ វេលាម៉ោង០៦និង៣០នាទី មានករណី អំពើលួចមានស្ថានទម្ងន់ទោសដោយសារការប្រើអំពើហិង្សា (ឆក់កាបូបស្ពាយប្រដាប់អាវុធមិនបានសម្រេច) នៅចំណុចមុខផ្ទះលេខ៤៩៤អឺ០ ផ្លូវព្រះសីហនុ ក្រុម៤៧ ភូមិ១១ សង្កាត់ទួលស្វាយព្រៃ២ ខណ្ឌចំការមន រាជធានីភ្នំពេញ បង្កឡើងដោយជនសង្ស័យ ឈ្មោះ សុច ច័ន្ទរិន ហៅនិន ជិះម៉ូតូម៉ាកហុងដាហ្សូមមើអ៊ិច ពណ៌សលាយខ្មៅ ពាក់ស្លាកលេខ ភ្នំពេញ 1BR-3436 ម្នាក់ឯង និងមានដាក់អាវុធខ្លីមួយដើមម៉ាក K៥៩ លេខ៥១៧៣ បង់ចំនួន០១គ្រាប់ចំនួន០៨គ្រាប់ នៅក្នុងហោប៉ៅខោ នៅពេលជនសង្ស័យជិះម៉ូតូមកដល់ចំណុចកើតហេតុខាងលើ ក៏បានឃើញជនរងគ្រោះកំពុងឈរនៅជិតម៉ូតូម៉ាកហុងដា PCX ពណ៌ស ពាក់ស្លាកលេខ ភ្នំពេញ 1GN-5136 មានកាន់កាបូបស្ពាយដាក់លើកែបម៉ូតូ ភ្លាមនោះជនសង្ស័យ ឈ្មោះ សុច ច័ន្ទរិន ហៅនិន បានឃើញ ក៏ជិះម៉ូតូចូលទៅជិតជនរងគ្រោះ ហើយធ្វើសកម្មភាពឆក់យកកាបូបស្ពាយពីជនរងគ្រោះបានសម្រេចរួចជិះម៉ូតូគេចខ្លួន ភ្លាមនោះជនរងគ្រោះ បានស្រែកឆោឡោឡើង ហើយរត់តាមជនសង្ស័យ ពេលនោះប្តីជនរងគ្រោះដែលនៅជិតនោះបានឮ ក៏បានបើកម៉ូតូដេញតាមជនសង្ស័យពីក្រោយ រហូតដល់ចំណុចមុខផ្ទះលេខ១៦៩អឺ០ ផ្លូវលេខ៣៣៦ ភូមិ៨ សង្កាត់វាលវង់ ខណ្ឌ៧មករា រាជធានីភ្នំពេញ ក៏តាមទាន់ជនសង្ស័យ ហើយយកជើងធាក់ម៉ូតូរបស់ជនសង្ស័យបណ្តាលឲ្យដួលម៉ូតូទាំងអស់គ្នា ភ្លាមនោះប្ដីរបស់ជនរងគ្រោះក៏ដណ្តើមបានកាបូបស្ពាយពីជនសង្ស័យវិញ ជនសង្ស័យឈ្មោះ សុច ច័ន្ទរិន ហៅ និន ក៏បានទុកម៉ូតូរបស់ខ្លួនចោល ហើយរត់ទៅលើកម៉ូតូរបស់ជនរងគ្រោះម៉ាកហុងដាPCX ជិះចេញគេចខ្លួនបន្តបានប្រហែល៣០ម៉ែត្រ ជនរងគ្រោះក៏បានចុចតេលេបញ្ជាធ្វើឲ្យម៉ូតូរលត់ម៉ាស៊ីន ជនសង្ស័យដួលម៉ូតូជ្រុះអាវុធខ្លីម៉ាកK៥៩ ទៅលើថ្នល់ភ្លាមនោះជនសង្ស័យឈ្មោះ សុច ច័ន្ទវិន ហៅនិន រត់ទៅរើសអាវុធខ្លីរួចបាញ់សំដៅទៅលើជនរងគ្រោះ ចំនួន០២គ្រាប់ផ្ទុះមួយគ្រាប់ ប៉ុន្តែមិនត្រូវជនរងគ្រោះឡើយ។
បន្ទាប់ពីបាញ់សំដៅជនរងគ្រោះរួចជនសង្ស័យ ក៏បានកាន់អាវុធខ្លីនៅដៃរត់តាមផ្លូវលេខ២១៥ គេចខ្លួនបន្តទៀតរហូតដល់ចំណុចមុខភោជនីយដ្ឋាន ប៉ៃ ហ៊ី ទីតាំងលេខ៤២ ផ្លូវលេខ២១៥ ភូមិ៧ សង្កាត់វាលវង់ ខណ្ឌ៧មករា រាជធានីភ្នំពេញ ក៏បានឃើញជនរងគ្រោះចំនួន០២នាក់ ប្រុសម្នាក់ ស្រីម្នាក់ កំពុងជិះម៉ូតូឌុបគ្នាម៉ាកហុងដា MOOVE ពណ៌ ខ្មៅផ្ទៃមេឃ ផលិតឆ្នាំ២០១៨ ពាក់ស្លាកលេខ ភ្នំពេញ 1GY-2324 ភ្លាមនោះ ជនសង្ស័យឈ្មោះ សុច ច័ន្ទរិន ហៅ និន បានយកអាវុធខ្លីម៉ាកK៥៩ ភ្ជង់ទៅលើជនរងគ្រោះយកម៉ូតូបានសម្រេច រួចជិះគេចខ្លួនបាត់។
ក្រោយពីមានសភាពការណ៍ខាងលើកើតឡើងនៅថ្ងៃទី១៨ ខែសីហា ឆ្នាំ២០១៩ វេលាម៉ោង០៧និង៣០នាទី កម្លាំងការិយាល័យស្រាវជ្រាវ សហការជាមួយកម្លាំងប៉ុស្តិ៍នគរបាលរដ្ឋបាលផ្សារថ្មី១ ឃាត់ខ្លួនជនសង្ស័យចំនួន០២នាក់ រួមមានទី១-ឈ្មោះ សំ បណ្ឌិត ភេទប្រុស អាយុ៣៣ឆ្នាំ និងទី២-ឈ្មោះ កែវ វណ្ណៈ ភេទប្រុស អាយុ៣១ឆ្នាំ ជនជាតិខ្មែរ នៅចំណុចកន្លែងផ្ញើម៉ូតូក្នុងមន្ទីរពេទ្យព្រះអង្គឌួង សង្កាត់ផ្សារថ្មី១ ខណ្ឌដូនពេញ រាជធានីភ្នំពេញ។
ដកហូតវត្ថុតាងៈម៉ូតូម៉ាកហុងដាMOOVE ពណ៌ខ្មៅ ផ្ទៃមេឃ លេខតួ៥២១០២៧២ លេខម៉ាស៊ីន ១២១០២៧២ ផលិតឆ្នាំ២០១៨ ពាក់ស្លាកលេខ ភ្នំពេញ 1GY-2324 ដែលពាក់ព័ន្ធករណីខាងលើ បញ្ជូនមកការិយាល័យដើម្បីធ្វើការសាកសួរ ចាត់ការតាមនីតិវិធី។
មន្ត្រីនគរបាលដដែលបន្តថា ក្រោយពីឃាត់ខ្លួនជនសង្ស័យឈ្មោះ សំ បណ្ឌិត និងឈ្មោះ កែវ វណ្ណៈ និងមានចម្លើយសារភាពនៅថ្ងៃទី១៨ ខែសីហា ឆ្នាំ២០១៩ វេលាម៉ោងប្រហែល១១និង១០នាទី កម្លាំងការិយាល័យបន្តស្រាវជ្រាវឃាត់ខ្លួនបានជនសង្ស័យឈ្មោះ សុច ច័ន្ទវិន ហៅនិន នៅចំណុចផ្ទះគ្មានលេខ ផ្លូវលំ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ និងចាប់យកវត្ថុតាងអាវុធខ្លីម៉ាក K៥
៩ លេខ ៥១៧៣ បង់ចំនួន០១និងគ្រាប់ចំនួន០៧ គ្រាប់ដែលបានប្រព្រឹត្តបទល្មើសខាងលើ បញ្ជូនមកការិយាល័យ ចាត់ការតាមនីតិវិធី។
សមត្ថកិច្ចបានបញ្ជាក់ថា ជនសង្ស័យឃាត់ទី១-ឈ្មោះ សុច ច័ន្ធវិន ហៅនិន ភេទប្រុស អាយុ៣៣ឆ្នាំ ជនជាតិខ្មែរ មុខរបរសន្តិសុខ ស្នាក់នៅផ្ទះជួលគ្មានលេខ ផ្លូវលំ ភូមិទ្រា១ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញធ្លាប់ជាប់ពន្ធនាគារចំនួន០២លើក លើកទី១ ពីបទប្លន់យកទូរស័ព្ទដៃ (ប្រើអាវុធភ្ជង់គំរាម) កាលពីឆ្នាំ២០០៥ បន្ទាប់ពីចាប់ពន្ធនាគារ ម១ រយៈពេល០៨ឆ្នាំ ត្រូវបានដោះលែងវិញនៅឆ្នាំ២០១៣ លើកទី២ ពីបទឆក់ទូរស័ព្ទដៃ កាលពីថ្ងៃទី ១៩ ខែកញ្ញា ឆ្នាំ២០១៦ បន្ទាប់ពីជាប់ពន្ធនាគារម១ រយៈពេល០១ឆ្នាំ ត្រូវបានដោះលែងវិញនៅថ្ងៃទី១៩ ខែកញ្ញា ឆ្នាំ២០១៧, ទី២-ឈ្មោះ សំ បណ្ឌិត ភេទប្រុស អាយុ៣៣ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះលេខ១១អី២ ផ្លូវលេខ១៤២ សង្កាត់ផ្សារថ្មី១ ខណ្ឌដូនពេញ រាជធានីភ្នំពេញ និងទី៣-ឈ្មោះ វណ្ណៈ ភេទប្រុស អាយុ៣១ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួលគ្មានលេខ ផ្លូវមិនចាំលេខ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
វត្ថុតាងចាប់យកៈសំបកគ្រាប់ចំនួន០១គ្រាប់ មានលេខ PMG ៣៨០AUTO, ក្បាលគ្រាប់បាញ់រួច ចំនួន ០១ គ្រាប់, អាវុធខ្លីចំនួន០១ដើមម៉ាកK៥៩ លេខ ៥១៧៣ បង់ចំនួន ០១ គ្រាប់ចំនួន០៧គ្រាប់, ម៉ូតូម៉ាកហុងដាមមើអ៊ិច ពណ៌សលាយខ្មៅ ពាក់ស្លាកលេខ ភ្នំពេញ 1BR-3436 (ម៉ូតូជនសង្ស័យឈ្មោះ សុច ច័ន្ទរិន ហៅនិន ជិះធ្វើសកម្មភាព),ម៉ូតូម៉ាក ហុងដាឃ្លីក ពណ៌ប្រផេះ លេខតួ-លេខម៉ាស៊ីន ០០១៧៩៧៦ គ្មានផ្លាកលេខ(ចាប់យកពីឈ្មោះ សំ បណ្ឌិត), ម៉ូតូម៉ាកហុងដា MOOVE ពណ៌ខ្មៅផ្ទៃមេឃ ផលិតឆ្នាំ២០១៨ ពាក់ផ្លាកលេខ ភ្នំពេញ 1GY-2324។
បច្ចុប្បន្នជនសង្ស័យត្រូវបានកម្លាំងជំនាញនៃការិយាល័យព្រហ្មទណ្ឌកំរិតស្រាលរាជធានីភ្នំពេញ បញ្ជូនទៅតុលាការដើម្បីចាត់ការតាមនីតិវិធី ៕ដោយ៖កូឡាប