ខេត្តស្វាយរៀងៈលោក យិន ម៉ារីណា អគ្គនាយករង នៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃ និងលោក រស់ ផារិទ្ធ អភិបាលរងខេត្តស្វាយរៀង នាព្រឹកថ្ងៃទី២០ ខែសីហា ឆ្នាំ២០១៩នេះ បានអញ្ជើញជាអធិបតីនៅក្នុងវគ្គបណ្ដុះបណ្ដាលរំលឹកឡើងវិញ ស្ដីពីរបៀបកត់ត្រាការងារអត្រានុកូលដ្ឋាន និងរបៀបប្រើប្រាស់សៀវភៅស្រង់ស្ថិតិកំណើត អាពាហ៍ពិពាហ៍ មរណភាព និងលិខិតបទដ្ឋាន គតិយុត្តថ្មីៗ ដែលបានប្រព្រឹត្តទៅនាសាលប្រជុំសាលាខេត្តស្វាយរៀង ព្រមទាំងមានការចូលរួមពីលោក លោកស្រី មន្ត្រីទទួលបន្ទុកការងារអត្រានុកូល ដ្ឋានសរុបចំនួន២៨០នាក់។
តាមប្រភពព័ត៌មានពីមន្ត្រីសាលាខេត្តស្វាយរៀងបានឱ្យដឹងថា ការរៀបចំឲ្យមានវគ្គបណ្ដុះបណ្ដាលឡើងវិញនេះ ធ្វើឡើងក្នុងគោលបំណង ដើម្បីពង្រឹងសមត្ថភាពមន្ត្រីឲ្យយល់ដឹងកាន់តែច្បាប់ពីបែបបទ នីតិវិធីនៃការអនុវត្តការងារអត្រានុកូលដ្ឋានឲ្យកាន់តែល្អប្រសើរថែមទៀត និងដើម្បីត្រួតពិនិត្យការអនុវត្តការងាររបស់មន្ត្រីអត្រានុកូលដ្ឋានឃុំ សង្កាត់ ស្មៀនឃុំ សង្កាត់ និងមន្ត្រីទទួលបន្ទុកការងារអត្រានុកូលដ្ឋានថ្នាក់ខេត្ត ក្រុង ស្រុក។ ក្នុងនោះក៏មានគោលបំណងជំរុញឲ្យមន្ត្រីអនុវត្តន៍ទៅតាមតួនាទី ភារកិច្ច និងអនុវត្តន៍យ៉ាងម៉ឺងម៉ាត់ តាមគោលការណ៍ណែនាំរបស់ក្រសួងមហាផ្ទៃ។ ម្យ៉ាងទៀត វគ្គបណ្ដុះបណ្ដាលនេះ ជាការសិក្សា ផ្ដល់នូវបទពិសោធន៍ និងការលើកឡើងពីបញ្ហាប្រឈមនានា និងសកម្មភាពការងារដែលសម្រេចបានក្នុងពេលអនុវត្តន៍កន្លងមក។
សូមបញ្ជាក់ថា វគ្គបណ្តុះបណ្តាលនេះមានចំនួន៤ថ្ងៃ ចែកចេញជា ២វគ្គ ចាប់ពីថ្ងៃទី២០ ដល់ថ្ងៃទី២៣ ខែសីហា ឆ្នាំ២០១៩៖
វគ្គទី១មាន ក្រុងស្វាយរៀង ស្រុករមាសហែក ស្រុកកំពង់រោទិ៍ និងស្រុកចន្ទ្រា និង វគ្គទី២មាន៖ ស្រុកស្វាយជ្រំ ស្រុកស្វាយទាប ស្រុករំដួល និងក្រុងបាវិត ៕ ដោយ៖ វ៉ៃកូ