ភ្នំពេញ ៖ លោកបណ្ឌិត ឆាយ ថន បានណែនាំ និងផ្តល់អនុសាសន៍៤ចំនុច ដល់មន្ត្រីក្រោមឱវាទ ក្នុងពិធីកិច្ចប្រជុំផ្សព្វផ្សាយយុទ្ធនាការប្រយុទ្ធប្រឆាំងគ្រឿងញៀន ដល់មន្ត្រីរាជការក្រោមឱវាទក្រសួងផែនការ ។
នៅទីស្តីការក្រសួងផែនការ)៖ នារសៀលថ្ងៃទី២០ ខែសីហា ឆ្នាំ២០១៩លោកកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានអញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំផ្សព្វផ្សាយប្រយុទ្ធប្រឆាំងគ្រឿងញៀន ដល់មន្ត្រីរាជការក្រោមឱវាទក្រសួងផែនការ។
លោក វង្ស សាម៉ុន រដ្ឋលេខាធិការ ជាសមាជិកក្រុមការងារអន្តរក្រសួង នៃអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារប្រយុទ្ធប្រឆាំងគ្រឿងញៀន នៃក្រសួងផែនការ បានឡើងថ្លែងពីគោលបំណងនៃការរៀបចំប្រជុំនាថ្ងៃនេះ គឺដើម្បីផ្សព្វផ្សាយលើយន្តការប្រយុទ្ធប្រឆាំងគ្រឿងញៀនរបស់ក្រសួង និងបទបញ្ជាស្តីពីការពង្រឹងវិធានការណ៍ប្រយុទ្ធប្រឆាំងគ្រឿងញៀនរបស់រាជរដ្ឋាភិបាល ផែនការស្តីពីយុទ្ធសាស្ត្រប្រយុទ្ធប្រឆាំងគ្រឿងញៀនខុសច្បាប់លើកទី៤ របស់រាជរដ្ឋាភិបាល និងផ្សព្វផ្សាយសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រី នៃព្រះរាជាណាចក្រកម្ពុជា ក្នុងយុទ្ធនាការប្រយុទ្ធប្រឆាំងគ្រឿងញៀនខុសច្បាប់ទូទាំងប្រទេស ឆ្នាំ២០១៩។
លោក វង្ស សាម៉ុន បានបន្ថែមថា តបតាមអនុសាសន៍របស់លោកកិត្តិសេដ្ឋាបណ្ឌិត ទេសរដ្ឋមន្ត្រី រដ្ឋមន្ត្រីក្រសួងផែនការ ក្រុមការងារប្រយុទ្ធប្រឆាំងគ្រឿងញៀនត្រូវបានបង្កើតឡើងនៅថ្នាក់ក្រសួងមានមួយក្រុម និងក្រុមការងារតាមបណ្តារាជធានី ខេត្ត មាន២៥ក្រុម ដែលមានសមាជិកសរុប ចំនួន៣១២នាក់ ជាជនបង្គោល ដើម្បីធ្វើការងារលើយន្តការប្រយុទ្ធប្រឆាំងគ្រឿងញៀនក្នុងវិស័យផែនការ ដោយបានដាក់ចេញនូវវិធានការណ៍ប្រជុំផ្សព្វផ្សាយ ណែនាំ បំពាក់បំប៉នស្មារតី និងបញ្ជ្រាបការយល់ដឹងជាប្រចាំលើបញ្ហាគ្រឿងញៀន ជូនដល់ថ្នាក់ដឹកនាំ និងមន្ត្រីរាជការទាំងអស់ឱ្យបានជ្រាប និងផ្សព្វផ្សាយបន្តជូនដល់មន្ត្រី និងអ្នកពាក់ព័ន្ធគ្រប់លំដាប់ថ្នាក់។
មានប្រសាសន៍សំណេះសំណាលក្នុងពិធីនេះ លោកកិត្តិសេដ្ឋាបណ្ឌិត ទេសរដ្ឋមន្ត្រី បានមានប្រសាសន៍ថា យើងបានរួមគ្នាប្រារព្វពិធី ប្រជុំផ្សព្វផ្សាយយុទ្ធនាការជាតិប្រយុទ្ធប្រឆាំងគ្រឿងញៀន ដែលដាក់ចេញដោយរាជរដ្ឋាភិបាល ដើម្បីបំផុសដាស់តឿន និងក្រើនរំលឹកដល់ជនគ្រប់រូបឱ្យគាំទ្រ និងចូលរួមក្នុងគ្រប់សកម្មភាពប្រយុទ្ធប្រឆាំងគ្រឿងញៀន យល់ដឹងពីផលប៉ះពាល់ និងគ្រោះថ្នាក់នៃគ្រឿងញៀនខុសច្បាប់គ្រប់ប្រភេទ។
លោកកិត្តិសេដ្ឋាបណ្ឌិត បានបញ្ជាក់ថា គ្រឿងញៀន គឺជាបញ្ហាសង្គមដ៏ស្មុគស្មាញមួយ សម្រាប់សង្គមមនុស្សជាតិទាំងមូល។ស្ថានភាពនៃការផលិត ការចរាចរណ៍ និងការប្រើប្រាស់គ្រឿងញៀនវាវិវត្តន៍ស្របទៅតាមចរន្ត នៃភាពរីកចម្រើនបច្ចេកវិទ្យា វិទ្យាសាស្ត្រសង្គម និងសេដ្ឋកិច្ច ដែលនិន្នាការបែបនេះ គឺជាការប្រឈមដ៏លំបាកមួយសម្រាប់ការអនុវត្តច្បាប់ចំពោះបណ្តាប្រទេសនានា។ ជាមួយនេះការកើនឡើងនូវផលិតផល ការចរាចរណ៍ និងការប្រើប្រាស់គ្រឿងញៀនសំយោគ និងសារធាតុញៀនប្រភេទថ្មី ប៉ះពាល់ប្រព័ន្ធប្រសាទ គឺជាការព្រួយបារម្ភ ដែលប្រទេសនានា នៅលើពិភពលោកកំពុងជួបប្រទះ និងផ្តោតការយកចិត្តទុកដាក់។
លោកបានបន្តថាបើទោះបីកន្លងមករាជរដ្ឋាភិបាល អាជ្ញាធរជាតិប្រយុទ្ធប្រឆាំងគ្រឿងញៀន បានបន្តដាក់ចេញនូវគោលនយោបាយ បទបញ្ជា និងវិធានការណ៍នានាជាបន្តបន្ទាប់ដើម្បីផ្តល់ភាពកក់ក្តៅជូនប្រជាពលរដ្ឋ ដូចជា គោលនយោបាយភូមិ ឃុំ/សង្កាត់ មានសុវត្ថិភាព បទបញ្ជាលេខ០១ ស្តីពីការពង្រឹងវិធានការណ៍ប្រយុទ្ធប្រឆាំងគ្រឿងញៀន និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ជាបន្តបន្ទាប់ក្តី ក៏ក្រុមឧក្រិដ្ឋជននៅតែបន្តព្យាយាមធ្វើចរាចរណ៍គ្រឿងញៀនឆ្លងកាត់ ប្រជាពលរដ្ឋយើងមួយចំនួននៅតែបន្តរងផលប៉ះពាល់ពីការជួញដូរ និងការប្រើប្រាស់គ្រឿងញៀនខុសច្បាប់ សន្តិសុខ និងសណ្តាប់ធ្នាប់នៅតាមគោលដៅខ្លះត្រូវបានប៉ះពាល់រងគ្រោះ។
តាមរយៈសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលមានខ្លឹមសារបញ្ជាក់យ៉ាងច្បាស់លាស់ និងហ្មឺងម៉ាត់ពីគោលជំហរ និងឆន្ទះយ៉ាងប្តូរផ្តាច់ក្នុងការប្រយុទ្ធប្រឆាំងគ្រឿងញៀន និងបានពីការយកចិត្តទុកដាក់របស់រាជរដ្ឋាភិបាលកម្ពុជា ដើម្បីលុបបំបាត់ បង្ការទប់ស្កាត់ បង្ក្រាប និងប្រយុទ្ធប្រឆាំងនឹងបទល្មើសគ្រឿងញៀន អោយអស់ពីដែនដីនៃព្រះរាជាណាចក្រកម្ពុជា ។ ក្នុងន័យនេះ ដើម្បីចូលរួមចំណែកគាំទ្រដល់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងគ្រឿងញៀន លោកកិត្តិសេដ្ឋាបណ្ឌិត បានណែនាំ និងផ្តល់អនុសាសន៍មួយចំនួន ដល់មន្ត្រីរាជការ នៃក្រសួងផែនការទាំងអស់ ដូចខាងក្រោម៖ ១-គ្រប់អង្គភាពទាំងអស់ ត្រូវរៀបចំ និងពង្រឹងយន្តការសម្រាប់ការងារប្រយុទ្ធប្រឆាំងគ្រឿងញៀននៅក្នុងអង្គភាពឱ្យបានសមស្រប តាមតួនាទីពាក់ព័ន្ធ និងការទទួលខុសត្រូវរបស់ខ្លួន។ ២-ក្រុមជនបង្គោលរបស់ក្រសួង និងមន្ទីរផែនការរាជធានី-ខេត្តទាំងអស់ ត្រូវយកចិត្តយកចិត្តទុកដាក់អនុវត្តឱ្យមានប្រសិទ្ធភាពនូវបទបញ្ជាលេខ០១ ស្តីពីការពង្រឹងវិធានការណ៍ប្រយុទ្ធប្រឆាំងគ្រឿងញៀន និងគោលនយោបាយគ្មានគ្រឿងញៀន ព្រមទាំងផែនការ និងវិធានការណ៍ផ្សេងៗទៀតរបស់រាជរដ្ឋាភិបាល ដោយត្រូវរៀបចំឱ្យមានយន្តការច្បាស់លាស់ និងមានផែនការសកម្មប្រចាំឆមាស និងឆ្នាំច្បាស់លាស់ ហើយធ្វើការអនុវត្តឱ្យបានជាប្រចាំ ដើម្បីផ្សព្វផ្សាយ បញ្ហាគ្រឿងញៀនទៅដល់មន្ត្រី ក្រុមគ្រួសារ និងសហគមន៍ ឱ្យមានប្រសិទ្ធភាព។ ៣-ថ្នាក់ដឹកនាំ មន្ត្រីរាជការគ្រប់អង្គភាពទាំងអស់ ត្រូវធ្វើការគាំទ្រ បំផុសឱ្យគ្រប់សមាសភាពទាំងអស់ ចូលរួមក្នុងចលនាអប់រំផ្សព្វផ្សាយស្តីពីផលប៉ះពាល់ ទប់ស្កាត់គ្រឿងញៀនក្នុងមូលដ្ឋានដែលខ្លួនទទួលខុសត្រូវ តាមរយៈការប្រជុំ ដឹកនាំការងារក្នុងអង្គភាព ក្រុមការងារថ្នាក់ជាតិ-ថ្នាក់កណ្តាលចុះមូលដ្ឋានរាជធានីខេត្តទាំងអស់។ និង៤-វិធានការណ៍អនុវត្តច្បាប់ គឺជាកិច្ចការដ៏សំខាន់ និងមានប្រសិទ្ធភាពបំផុតក្នុងការទប់ស្កាត់ លុបបំបាត់បញ្ហាគ្រឿងញៀន ដូច្នេះគ្រប់អង្គភាពទាំងអស់ ត្រូវស្រាវជ្រាវ ស៊ើបអង្កេត ប្រមូល និងផ្តល់ព័ត៌មាន ដើម្បីបង្ការទប់ស្កាត់ និងបង្រាបបទល្មើសគ្រឿងញៀនឱ្យមានប្រសិទ្ធភាពក្នុងដែនសមត្ថកិច្ចរបស់ខ្លួន៕ ដោយ៖កូឡាប
