ភ្នំពេញ ៖ ក្រសួងសាធារណការ និងដឹកជញ្ជូន និងធនាគារកម្ពុជាសាធារណៈ បានចុះហត្ថលេខាលើអនុស្សរណៈនៃការយោគយល់ ទាក់ទងនឹងការប្រមូលកម្រៃសេវាសាធារណៈ ដែលកម្មវិធីនេះ គឺជាកិច្ចសហប្រតិបត្តិការ លើការប្រមូលសេវាសាធារណៈ ដើម្បីបង្កើនចំណូលរដ្ឋ ក៏ដូចជាការបង្កើតជម្រើសទូទាត់សេវាសាធារណៈតាមប្រព័ន្ធអនឡាញសម្រាប់សាធារណជន។
នៅថ្ងៃទី២១ ខែសីហា ឆ្នាំ២០១៩ ឯកឧត្តម ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងពិធីចុះហត្ថលេខាលើអនុស្សរណៈនៃការយោគយល់រវាងក្រសួងសាធារណការ និងដឹកជញ្ជូន និងធនាគារកម្ពុជាសាធារណៈ ទាក់ទងនឹងការប្រមូលកម្រៃសេវាសាធារណៈ ដោយមានការចូលរួមពីថ្នាក់ដឹកនាំក្រសួង ប្រធានធនាគារប្រចាំតំបន់ប្រតិបត្តិការឥណ្ឌូចិននៃធនាគារកម្ពុជាសាធារណៈ និងមន្ត្រីជំនាញពាក់ព័ន្ធនៃក្រសួងសាធារណការ និងដឹកជញ្ជូនផងដែរ។
កម្មវិធីនេះគឺជាកិច្ចសហប្រតិបត្តិការលើការប្រមូលសេវាសាធារណៈដើម្បីបង្កើនចំណូលរដ្ឋ ក៏ដូចជាការបង្កើតជម្រើសទូទាត់សេវាសាធារណៈតាមប្រព័ន្ធអនឡាញសម្រាប់សាធារណជន ប្រកបដោយភាពងាយស្រួល ប្រសិទ្ធភាព រហ័ស ចំណេញពេលវេលា និងតម្លាភាព។
ឆ្លៀតក្នុងឱកាសនោះដែរ លោករដ្ឋលេខាធិការ បានគូសបញ្ជាក់ថា៖ អនុស្សរណៈយោគយល់នេះ មានគោលបំណងផ្តល់សេវាសាធារណៈដែលរួមមាន៖ ការចុះបញ្ជីយានយន្ត ការប្រឡងយកប័ណ្ណបើកបរ អាជីវកម្មដឹកជញ្ជូន និងសេវា ផ្សេងៗទៀតសំដៅធានា ឱ្យបាននូវប្រសិទ្ធភាព និងតម្លាភាព នៃសេវាសាធារណៈរបស់រដ្ឋ ជាពិសេសជួយកាត់បន្ថយចំណាយក្រៅផ្លូវការនានា ដែលអាចកើតមានឡើង។
លោករដ្ឋលេខាធិការ បានថ្លែងអំណរគុណយ៉ាងជ្រាលជ្រៅ ចំពោះធនាគារកម្ពុជាសាធារណៈដែលបាន ចូលរួមសហការជាមួយក្រសួងសាធារណការ និងដឹកជញ្ជូនក្នុងការប្រមូលកម្រៃសេវាសាធារណៈសំដៅ លើកកម្ពស់ប្រសិទ្ធភាពនៃការប្រមូលពន្ធជូនរដ្ឋ និងសង្ឃឹមយ៉ាងមុតមាំថា៖ សេវានេះនឹងមានដំណើរការល្អ និងទទួលបានការគាំទ្រច្រើនពីសាធារណជន ក្រោមកិច្ចសហការប្រកបដោយការទទួលខុសត្រូវខ្ពស់ពីធនាគារ៕ ដោយ៖បញ្ញាស័ក្តិ
