ភ្នំពេញ៖ គណៈបញ្ជាការឯកភាពខណ្ឌដូនពេញ បន្តចុះប្រមូលស្ត្រីរកស៊ីផ្លូវភេទ និងអ្នកចាប់ម៉ូយជាង១០នាក់ ដែលឈរនៅតាមរបង និង ក្រោមដើមឈើ រួមទាំងអ្នកកួកជេរ(អ្នកចាប់ម៉ូយ) ជុំវិញរមណីយដ្ឋាន វប្បធម៌ប្រវត្តិសាស្ត្រវត្តភ្នំ។ ប៉ុន្តែទោះយ៉ាងណា គេសង្កេតឃើញថា អាជ្ញាធរមានសមត្ថកិច្ចខណ្ឌដូនពេញ បានចាប់ពួកនាងៗដែលរកស៊ីបោយដៃនេះជាច្រើនលើកមកហើយ ហើយក្នុងមួយរយៈចុងក្រោយពួកនាងមករកស៊ីនៅកន្លែងដដែលវិញ ។
ដោយអនុវត្តតាមបទបញ្ជាដ៏ម៉ឺងម៉ាត់របស់លោក សុខ ពេញវុធ អភិបាលនៃគណៈអភិបាលខណ្ឌដូនពេញ នៅថ្ងៃព្រហស្បតិ៍ ទី២២ ខែសីហាឆ្នាំ ២០១៩ វេលាម៉ោង ៩ និង ៣០ នាទីព្រឹក កម្លាំងគណៈបញ្ជាការឯកភាពខណ្ឌដូនពេញ បានបើកប្រតិបត្តិការចុះប្រមូលស្ត្រី រកស៊ីផ្លូវភេទ រួមទាំងអ្នកកួកជេរ(អ្នកចាប់ម៉ូយ) នៅ ជុំវិញរមណីយដ្ឋាន វប្បធម៌ប្រវត្តិសាស្ត្រវត្តភ្នំ ។
ជាលទ្ធផល នៃការបង្ក្រាបនេះ គណៈបញ្ជាការឯកភាពខណ្ឌដូនពេញ បានធ្វើការប្រមូលស្ត្រីរកស៊ីផ្លូវភេទរួមទាំងអ្នកកួកជេរ(អ្នកចាប់ម៉ូយ)សរុបចំនួន១៣នាក់ ប្រុស៣នាក់ បញ្ជូនមកនៅសាលាខណ្ឌដូនពេញ ដើម្បីឯកសារ បញ្ជូនបន្តទៅ មន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ ៕ដោយ៖កូឡាប
