ចិនបាននិយាយនៅថ្ងៃព្រហស្បតិ៍នេះថា ខ្លួនសង្ឃឹមថា អាមេរិចនឹងឈប់កំណត់ពន្ធមិនត្រឹមត្រូវលើទំនិញនាំចូលពីខ្លួន និងបានប្តេជ្ញាថានឹងធ្វើការសងសឹក លើពន្ធថ្មីដែលកំណត់ដោយអាមេរិច។
ការប្រកាសរបស់ចិននេះ កើតឡើងក្រោយពេលអាមេរិចបានប្រកាសនៅដើមខែនេះថា ខ្លួននឹងដាក់ពន្ធថ្មីលើផលិតផលនាំចូលពីចិនដែលមានតម្លៃទឹកប្រាក់ ៣០០ពាន់លានដុល្លារ ចាប់ពីថ្ងៃទី ១ ខែកញ្ញា។
ប៉ុន្តែក្រោយមក ប្រធានាធិបតីអាមេរិច ដូណាល់ ត្រាំ បានពន្យារពេលគម្រោងរបស់គាត់ ដោយពន្យារពេលលើការយកពន្ធលើផលិតផលនាំចូលពីចិនមួយចំនួន ដូចជា ទូរស័ព្ទ កុំព្យូទ័រ និងផលិតផលិតប្រើប្រាស់ផ្សេងៗទៀត រហូតដល់ពាក់កណ្តាលខែធ្នូ។ ការពន្យារពេលយកពន្ធលើផលិតផលចិនមួយចំនួននេះ គឺដើម្បីកុំឲ្យប៉ះពាល់ដល់ប្រជាជនអាមេរិច ក្នុងរដូវបុណ្យចុងឆ្នាំនេះ។
អ្នកនាំពាក្យក្រសួងពាណិជ្ជកម្មចិនឈ្មោះ Gao Feng បានថ្លែងប្រាប់សារពត៌មានថា “ទោះបីជាអាមេរិចសម្រេចចិត្តពន្យារពេលយកពន្ធលើផលិតផលចិនមួយចំនួន …ប្រសិនជាអាមេរិចធ្វើអ្វីតាមតែចិត្តលើចិន និងកំណត់ពន្ធថ្មីលើទំនិញ ចិននឹងត្រូវបង្ខំចិត្តចាត់វិធានការបកវិញ”។
អ្នកនាំពាក្យដដែលថ្លែងថា ក្រមពាណិជ្ជកម្មនេះប្រទេសទាំងពីរនៅតែរក្សាការទាក់ទងគ្នា។ នៅពេលសួរថា តើទីក្រុងវ៉ាស៊ីនតោនមានលើកពីបញ្ហាទីក្រុងហុងកុងជាមួយចិនទេ ក្នុងអំឡុងកិច្ចចរចាពាណិជ្ជកម្ម លោក Gao Feng ថ្លែងថា លោកដូណាល់ ត្រាំ ធ្លាប់និយាយរួចមកហើយថា ហុងកុងគឺជាផ្នែកមួយរបស់ចិន ដូច្នេះវាមិនចាំបាច់សម្រាប់អាមេរិចទេ ក្នុងការអន្តរាគមន៍។
លោកបញ្ជាក់ថា “ខ្ញុំសង្ឃឹមថា ភាគីអាមេរិចនឹងចាំពាក្យសម្តីរបស់ខ្លួន”។
សូមបញ្ជាក់ថា កាលពីចុងសប្តាហ៍នេះ ប្រធានាធិបតីដូណាល់ ត្រាំ បានធ្វើការព្រមាន កុំឲ្យចិនធ្វើការបង្ក្រាបនៅហុងកុង ដូចដែលខ្លួនធ្លាប់បង្ក្រាបលើក្រុមបាតុករនីទីលាន Tiananmen កាលពីឆ្នាំ ១៩៨៩៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
