ខេត្តស្វាយរៀង ៖ សមត្ថកិច្ចនគរបាលនាយកដ្ឋានអន្តោប្រវេសន៍កាលពីថ្ងៃទ២១ ខែសីហា ឆ្នាំ២០១៩បានសហការជាមួយស្នងការដ្ឋាន នគរបាលខេត្តស្វាយរៀង ព្រះរាជអាជ្ញាអយ្យការអមសាលាដំបូងខេត្តស្វាយរៀង បានចុះធ្វើការត្រួតពិនិត្យជនបរទេស នៅទីតាំងអគារគ្មានលេខ មានកម្ពស់៨ជាន់មួយកន្លែង ស្ថិតនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង បានធ្វើការត្រួតពិនិត្យលើជនបរទេសចំនួន៣៦៦នាក់ ក្នុងនោះមានស្ត្រី៨២នាក់ និងវៀតណាមម្នាក់ ។
ប្រភពព័ត៌មានពីសមត្ថកិច្ចបានឱ្យដឹងថា ជាលទ្ធផល សមត្ថកិច្ចកម្ពុជាបានរកឃើញមានបុរស ស្ត្រីជនជាតិចិនចំនួន២៧នាក់ចូលមកស្នាក់នៅនិងធ្វើការដោយពុំមានឯកសារផ្លូវច្បាប់ ក្នុងនោះមានស្ត្រីចំនួន៦នាក់ផងដែរ ដែលមានឈ្មោះក្នុងបញ្ជីមុខសញ្ញាស្វែងរកចាប់ខ្លួនរបស់សមត្ថកិច្ចនគរបាលប្រទេសចិន ហើយបានឃាត់ខ្លួនបញ្ជូនមកនាយកដ្ឋាន ដើម្បីធ្វើការសាកសួរ និងអនុវត្តន៍តាមនីតិវិធី ។
ប្រភពដដែលបានបន្តថា ជនបរទេស(ចិន) ចំនួន៣៣៩នាក់ (ស្រី ៧៦នាក់) ដែលមិនមានឈ្មោះជាប់ពាក់ព័ន្ធក្នុងបញ្ជីរបស់សមត្ថកិច្ចចិន ក្រុមប្រតិបត្តិការចម្រុះ បានសម្រេចទុករយៈពេលមួយសប្តាហ៍ ឲ្យអ្នកទទួលខុសត្រូវក្រុមហ៊ុនយកឯកសារមកបង្ហាញសមត្ថកិច្ចកម្ពុជាឲ្យទាន់ពេលកំណត់។
ក្រោយមក សមត្ថកិច្ចក៏បានបញ្ចូនជនសង្ស័យជនជាតិចិន ដែលសមត្ថកិច្ចចិនតាមរកនោះ មកកាន់អគ្គនាយកដ្ឋានអន្តោប្រវេសន៍រាជធានីភ្នំពេញ កាលពីយប់មិញដល់ក្នុងវេលាម៉ោង១២យប់ ៕ ដោយ៖វ៉ៃកូ