ក្រុមហ៊ុនអាកាសចរណ៍ Qantas របស់អូស្រ្តាលី នឹងធ្វើការសាកល្បងសេវាកម្មមួយដោយធ្វើការហោះហើររយៈពេល ១៩ម៉ោងដោយមិនមានការចុះចត ដើម្បីដឹងថា តើអ្នកដំណើរ និងបុគ្គលិកយន្តហោះអាចស៊ូបាននឹងការធ្វើដំណើរដ៏ឆ្ងាយនោះដែរឬយ៉ាងណា។
ក្រុមហ៊ុនអាកាសចរណ៍ខាងលើ ចង់ធ្វើការហោះហើរពីទីក្រុងស៊ីតនី ទៅកាន់ទីក្រុងឡុង និងញូវញ៉ក ក្នុងឆ្នាំ ២០២២ខាងមុខ។
ប្រសិនជាមានការហោះហើរនោះកើតឡើងមែន វានឹងក្លាយទៅជាការហោះហើរដ៏វែងបំផុតក្នុងលោក។
ការហោះហើរសាកល្បងនឹងច្បាប់ផ្តើមក្នុងឆ្នាំនេះ ហើយការហោះហើរនឹងមានដឹកអ្នកដំណើរចំនួន ៤០នាក់ ដែលអ្នកទាំងនោះនឹងត្រូវបានពិនិត្យសុខភាពរហូតក្នុងពេលធ្វើដំណើរ។
ក្រុមហ៊ុន Qantas បានថ្លែងថា ការហោះហើរត្រង់ពីញូវញ៉ក និងទីក្រុងឡុងទៅកាន់ ស៊ីតនី នឹងត្រូវប្រើរយៈពេល ១៩ម៉ោង។
សូមបញ្ជាក់ថា បច្ចុប្បន្ន ការហោះហើរដែលមានរយៈពេលវែង និងឆ្ងាយបំផុតក្នុងលោកគឺ ការហោះហើរពីប្រទេសិង្ហបុរីទៅកាន់ទីក្រុងញូវញ៉ក ដែលមានចំងាយ ១៥.៣៤៤គីឡូម៉ែត្រ និងត្រូវប្រើរយៈពេល ១៨ម៉ោង និង ២៥នាទី៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
