ប្រទេសកូរ៉េខាងត្បូង បានសម្រេចលុបចោលកិច្ចព្រមព្រៀងចែករំលែកព័ត៌មានយោធាសម្ងាត់ជាមួយនឹងជប៉ុន ដែលការបោះបង់ចោលកិច្ចព្រមព្រៀងនេះ គឺជាការសងសឹកទៅនឹងជប៉ុន ដែលបានដកកូរ៉េខាងត្បូងចេញពីបញ្ជីពាណិជ្ជកម្ម។
លោក Kim You-geun អនុប្រធានទី ១ នៃការិយាល័យសន្តិសុខជាតិរបស់វិមានខៀវ បានថ្លែងថា វិធានការរបស់កូរ៉េខាងត្បូងនេះ គឺជាការសងសឹកទៅនឹងជប៉ុនដែលបានសម្រេចចិត្តដកកូរ៉េខាងត្បូង ចេញពីបញ្ជីដៃគូពាណិជ្ជកម្មគួរឲ្យទុកចិត្តបាន។
លោក Kim You-geun បានថ្លែងដូច្នេះថា “ក្នុងកាលៈទេសៈនេះ រដ្ឋាភិបាលបានវាយតម្លៃថា វានឹងមិនមែនជាផលប្រយោជន៍ជាតិទៀតទេ ក្នុងការរក្សាកិច្ចព្រមព្រៀងនោះ”។ កិច្ចព្រមព្រៀងចែករំលែកព័ត៌មានយោធាសម្ងាត់រវាងកូរ៉េខាងត្បូង និងជប៉ុន ត្រូវបានបង្កើតឡើង ដើម្បីការផ្លាស់ប្តូរព័ត៌មានយោធាដើម្បីសន្តិសុខ។
ការមិនចុះសម្រុងគ្នារវាងកូរ៉េខាងត្បូង និងជប៉ុន ដែលសុទ្ធតែជាសម្ព័ន្ធមិត្តដ៏ស្និទ្ធរបស់អាមេរិច បានធ្វើឲ្យមានការព្រួយបារម្ភទូទាំងពិភពលោក។
អ្នកនាំពាក្យមន្ទីរបញ្ចកោណអាមេរិច លោក Dave Eastburn បានជំរុញឲ្យកូរ៉េខាងត្បូង និងជប៉ុនដោះស្រាយបញ្ហាជាមួយគ្នាឲ្យបានលឿន។
“ពួកយើងសូមលើកទឹកចិត្តជប៉ុន និងកូរ៉េខាងត្បូងឲ្យធ្វើកិច្ចការជាមួយគ្នា ដើម្បីដោះស្រាយបញ្ហាមិនស៊ីសង្វាក់គ្នា។ ខ្ញុំសង្ឃឹមថា ពួកគេអាចដោះស្រាយវាបានលឿន”។
“ពួកយើងទាំងអស់គ្នានឹងរឹតតែខ្លាំង ហើយអាស៊ីឧត្តរនឹងកាន់តែមានសុវត្ថិភាព នៅពេលអាមេរិច កូរ៉េខាងត្បូង និងជប៉ុនធ្វើការជាមួយគ្នាដោយសាមគ្គី និងមិត្តភាព”។
លោកក៏បានបន្ថែមថា ការចែករំលែកព័ត៌មានចារកម្មគឺជាគន្លឹះសំខាន់ក្នុងការអភិវឌ្ឍន៍គោលនយោបាយ និងយុទ្ធសាស្រ្តការពារ។
សូមបញ្ជាក់បញ្ហាប្រឈមរវាងតូក្យូ និងសេអ៊ូល បានចាប់ផ្តើមកាលពីខែមុន នៅពេលជប៉ុនបានដាក់កំហិតលើការនាំចេញវត្ថុធាតុដើមគីមីចំនួន ៣ទៅកាន់កូរ៉េខាងត្បូង។ វត្ថុធាតុដើមទាំងនោះត្រូវបានប្រើប្រាស់ក្នុងការផលិតបន្ទះរបស់កុំព្យូទ័រ ដែលវាគឺជាផ្នែកមួយដ៏សំខាន់ក្នុងការជំរុញសេដ្ឋកិច្ចកូរ៉េខាងត្បូង៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
