ភ្នំពេញ៖ ករណីភ្លើងឆេះរោងចក្រផលិតពូក ដែលបានខូចខាតទាំងស្រុង និងធ្វើឲ្យអគារទាំងមូលប្រេះស្រាំប្រឈម នឹងការបាក់ស្រុត។ ករណីនេះភ្លើងបានឆេះតាំងពីរសៀលថ្ងៃទី 23 រហូតមកដល់ព្រឹកថ្ងៃទី 24 ខែសីហានេះ មិនទាន់រលត់ទាំងស្រុងឡើយ ទោះបីជាក្រុមនគរបាលពន្លត់អគ្គិភ័យ បានខ្នះខ្នែងប្រឹងប្រែងពន្លត់យ៉ាងណាក៏ដោយ ដែលប្រើប្រាស់ឡានទឹករាប់រយគ្រឿង ។
នៅព្រឹកថ្ងៃទី 24 នេះដែរ លោកទេសរដ្ឋមន្ត្រីគន់ គីម បេសកជនពិសេស និងជាអនុប្រធានទី 1 នៃអាជ្ញាធរជាតិគ្រប់គ្រងគ្រោះមហន្តរាយ អមដំណើរដោយលោកឃួង ស្រេង អភិបាលរាជធានីភ្នំពេញ បានចុះមកពិនិត្យមើលទីតាំងកន្លែងដែលឆេះនេះ។
លោកអភិបាល បានសូមថ្លែងអំណរគុណដល់កម្លាំងសរុប កម្លាំងអគ្គស្នងការនគរបាលជាតិ កម្លាំងស្នងការនគរបាលរាជធានី កម្លាំងរាជអាវុធហត្ថរាជធានី កម្លាំងអាជ្ញាធរមូលដ្ឋាន កម្លាំងពន្លត់អគ្គិភ័យចម្រុះរួមទាំងកម្លាំងក្រុមហ៊ុនOCIC ក្រុមហ៊ុនបុរីប៉េងហួត កងពលតូច ង៧០ បានចូលរួមទាំងកម្លាំង ទាំងស្មារតី និងសម្ភារ បាននិងបន្តខិតខំព្យាយាមប្រឹងប្រែង បាញ់ពន្លត់ ទប់ស្កាត់អគ្គិភ័យ និងគ្រប់គ្រងស្ថានការណ៍បាន ការពារមិនឲ្យអគ្គិភ័យឆេះរាលដាលនៅតំបន់បរិវេណជុំវិញទីតាំងសិប្បកម្មធ្វើពូកដែលបានឆាបឆេះ ស្ថិតនៅភូមិចំរើនផល សង្កាត់បឹងទំពុនទី១ ខណ្ឌមានជ័យ។
យោងតាមសេចក្តីរាយការណ៍ បានបញ្ជាក់ឲ្យដឹងថា អគាររោងចក្រផលិតពូកនេះ ត្រូវបានសម្រេចឲ្យវាយកម្ទេចចោល នៅវេលាម៉ោងប្រមាណ១២ថ្ងៃត្រង់ ថ្ងៃទី២៤ ខែសីហា ឆ្នាំ២០១៩នេះតែម្តង។
ទេសរដ្ឋមន្ដ្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្ដរាយ កំពុងតែមានវត្តមានដឹកនាំបញ្ជាផ្ទាល់ នៅកន្លែងកើតហេតុ ដើម្បីធ្វើការវាយកម្ទេចចោលអគារ ដែលត្រូវអគ្គិភ័យឆាបឆេះនេះ។ ការវាយកម្ទេចនេះ បន្ទាប់ពីលោកទេសរដ្ឋមន្ត្រី បានដឹកនាំក្រុមការងារ និងវិស្វករជំនាញ ដើម្បីសិក្សាពីផលប៉ះពាល់នានា ជុំវិញបញ្ហាឆាបឆេះអគារផលិតពូកនេះផងដែរ។
អគ្គិភ័យបាននិងកំពុងឆាបឆេះត្រឹមតែទីតាំងដដែល មិនរាលដាលដល់ផ្ទះប្រជាពលរដ្ឋជិតខាងនោះទេ។ ទោះបីជាយ៉ាងនេះក្តី សមត្ថកិច្ចក៏បានជម្លៀសប្រជាពលរដ្ឋ នៅតំបន់នោះចេញពីកន្លែងកើតហេតុជាបណ្តោះអាសន្នសិន ដើម្បីចៀសវាងរងផលប៉ះពាល់ជាយថាហេតុ៕ដោយ៖កូឡាប