តាកែវ៖ ថ្លែងក្នុងសិក្ខាសាលាស្តីពី កិច្ចការពារវិនិយោគិនក្នុងវិស័យមូលបត្រ នៅសាលមហោស្រពខេត្តតាកែវ នាព្រឹកថ្ងៃទី២៤ ខែសីហា ឆ្នាំ២០១៩ នេះ លោក សូ សុជាតិ អគ្គនាយកនៃគណៈកម្មការមូលបត្រកម្ពុជា បានមានប្រសាសន៍ថា មានមនុស្សមិនតិចទេ ដែលបានចាញ់កលល្បិច របស់អ្នកលក់មូលបត្រ ដែលពួកគាត់ជា (អតិថិជន) តែងតែសម្លឹងឃើញពីផលចំណេញជាភាគលាភខ្ពស់ ហើយបានយកលុយរបស់ខ្លួនទៅប្តូរយកក្រដាស់ មួយសន្លឹកមកវិញ ដែលធ្វើឲ្យមានការខាតបង់ប្រាក់ជាច្រើន ។
លោកអគ្គនាយកនៃគណៈកម្មការមូលបត្រកម្ពុជា បានបញ្ជាក់ថា នាពេលបច្ចុប្បន្ននេះមានក្រុមហ៊ុនសរុបចំនួន ៧ បានចុះបញ្ជីបោះផ្សាយលក់មូលបត្រ ក្នុងនោះមានក្រុមហ៊ុនចំនួន ៥បានចុះបញ្ជីបោះផ្សាយលក់មូលបត្រកម្មសិទ្ធិ និងក្រុមហ៊ុនចំនួន ២ ទៀតបានចុះបញ្ជីបោះផ្សាយលក់មូលបត្របំណុលជាសាធារណៈ ហើយក្នុងពេលឆាប់ៗនេះ និងមានក្រុមហ៊ុនសក្តានុពលធំៗមួយចំនួនទៀត និងចុះបញ្ជីបោះផ្សាយលក់មូលបត្រកម្មសិទ្ធិ និងមូលបត្របំណុលនៅ ផ.ម.ក ផងដែរ ។
លោកបន្តថា នៅរយៈពេល ១ឆ្នាំចុងក្រោយនេះ វឌ្ឍនភាពវិស័យមូលបត្រនៅកម្ពុជា មានសន្ទុះគួរឲ្យកត់សម្គាល់ បើយើងក្រឡេកមើលទៅលើថ្លៃភាគហ៊ុន សន្ទស្សន៍ភាគហ៊ុន ទំហំនៃការជួយដូរ បរិមាណនៃវិនិយោគិន និងមូលធនទីផ្សារ គឺមានការកើនឡើងជាលំដាប់ទាំងនេះ សឲ្យឃើញពីទំនុកចិត្តសាធារណជន ចំពោះទីផ្សារមូលបត្រនៅកម្ពុជា មានការកើនឡើង ។
ឆ្លៀតក្នុងឱកាសនោះដែរ លោក ញ៉ែម សាមុត នាយកសាខាសាកលវិទ្យាល័យបៀលប្រាយខេត្តតាកែវ បានមានប្រសាសន៍ថា ចំពោះការរៀបចំឲ្យមានសិក្ខាសាលានេះឡើង គឺក្នុងគោលបំណងចង់លើកកម្ពស់ ការយល់ដឹងឲ្យកាន់តែស៊ីជម្រៅអំពីកិច្ចគាំពារវិនិយោគិន ការផ្តល់ការអប់រំ ការផ្សព្វផ្សាយ និងការចែករំលែកព័ត៌មានចំណេះដឹងថ្មីៗ ពីវិស័យមូលបត្រទៅដល់គ្រប់បណ្តាតួអង្គពាក់ព័ន្ធនានា ក៏ដូចជាវិនិយោគិន និងសាធារណជន សិស្សនិសិត្ស ឲ្យពួកគាត់បានយល់ដឹងកាន់តែច្បាស់លាស់ និងសភាពទូលំទូលាយ ។
សូមបញ្ជាក់ផងដែរថា ក្នុងសិក្ខាសាលានេះដែរ គឺមានសហគ្រិន អ្នកវិនិយោគ និងសិស្សនិសិត្សនៃសាកលវិទ្យាល័យចូលរួមស្តាប់ យ៉ាងច្រើន ដើម្បីបញ្ជ្រាបពីការយល់ដឹងនានា ពាក់ព័ន្ធនឹងទីផ្សារមូលបត្រនៅក្នុងប្រទេសកម្ពុជា នាពេលបច្ចុប្បន្ននេះ ៕ដោយ៖ តាកែវ