ភ្នំពេញ៖ ដោយសង្កេតឃើញថាភាគច្រើន នៃឪពុកម្តាយក្នុងពេលបច្ចុប្បន្ន ត្រូវចេញប្រកបអាជីវកម្មឬធ្វើការទាំងអស់គ្នា ដែលជាហេតុធ្វើឲ្យពួកគាត់មានការប្រឈមនិងបញ្ហាកង្វះពេលវេលាថែទាំកូនតូចៗ ដូចនេះសាលាអន្តរជាតិអាស៊ាន សម្រេចដាក់បើកដំណើរការសេវាកម្មអប់រំ និងថែទាំកុមារតូចចាប់ពីអាយុ២ឆ្នាំ ឬ២៤ខែ ដោយមិនត្រឹមតែជាកន្លែងស្នាក់នៅប៉ុណ្ណោះទេសាលាផ្តោតទៅលើការអប់រំ និងថែទាំកុមារតូចឲ្យមានការអភិវឌ្ឍទាំងផ្នែកភាសា ស្មារតី ទំនាក់ទំនងសង្គម គំនិតច្នៃប្រឌិត បញ្ញាវាងវៃ កាយសម្បទានិងសុខភាព។
អ្នកស្រី សូយ សុមានិត នាយិការង សាលាអន្តជាតិអាស៊ាន បានថ្លែងថា សាលាអន្តរជាតិអាស៊ានមិនត្រឹមជាសាលារៀន តែគឺជាផ្ទះដែលកុមារតូចគ្រប់រូបទទួលបាននូវការអប់រំ ថែទាំយ៉ាងម៉ត់ចត់និងកក់ក្តៅ ដូចមានឪពុកម្តាយនៅក្បែរ។ សេវាកម្មនេះនឹងចាប់ផ្តើមពីថ្ងៃទី២ ខែកញ្ញា ឆ្នាំ២០១៩នេះទៅ ។
អ្នកស្រី នាយិការង បានលើកឡើងបន្ថែមទៀតថា ឆ្លៀតក្នុងឱកាសជួបជុំជាមួយមាតាបិតាសិស្សក្នុងវេលាព្រឹកថ្ងៃទី២៥ ខែសីហា ឆ្នាំ២០១៩នោះដែរ សាលាក៏ធ្វើការបញ្ជ្រាបដំណើរការThe Leader InMe ដែលទទួលបានសិទ្ធិបង្ហាត់បង្រៀន និងបណ្តុះបណ្តាលពីFranklinCoveyសហរដ្ឋអាមេរិក ដើម្បីទទួលបានការសហការពីសំណាក់អ្នកអាណាព្យាបាលសិស្ស ក្នុងការចូលរួមជំរុញសិស្សានុសិស្ស ឲ្យក្លាយជាបុគ្គលឆ្នើមមានចំណេះ ជំនាញនិងគោលដៅជីវិតច្បាស់លាស់៕ ដោយ៖ស្រីនាថ
