ភ្នំពេញ ៖ ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យនៅថ្ងៃទី ២៤ ខែសីហា ឆ្នាំ ២០១៩ បញ្ចប់តំណែងលោក សេង សុវណ្ណារ៉ា ពីអនុរដ្ឋលេខាធិការក្រសួងយុត្តិធម៌ ។
ព្រះរាជក្រឹត្យបញ្ចប់តំណែងលោក សេង សុវណ្ណារ៉ា នេះ បានធ្វើឡើង ក្រោយពេលសម្តេចក្រឡាហោម ស ខេង អនុប្រធាន គណបក្សប្រជាជនកម្ពុជា ក៏បានចេញសេចក្តីសម្រេចបញ្ចប់តំណែងលោក សេង សុវណ្ណារ៉ា ពីសមាជិកក្រុមការងារ ថ្នាក់ជាតិចុះជួយខេត្តមណ្ឌលគិរី កាលពីថ្ងៃទី ១៣ ខែសីហា ឆ្នាំ ២០១៩ ។
អភិបាលខេត្តមណ្ឌលគិរី បានចេញលិខិតដកហូតដីជិត១ពាន់ហិកតា ស្ថិតនៅភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី ស្ថិតនៅក្នុងដែនជម្រកសត្វព្រៃភ្នំព្រេច ពីលោកសេង សុវណ្ណារ៉ា ប្រគល់ឲ្យមន្ទីរ បរិស្ថានគ្រប់គ្រងជាសម្បត្តិរដ្ឋ ។
ព្រះរាជក្រឹត្យលេខ នស/រកត/០៨១៩/១៣៥៨ ចុះថ្ងៃទី២៤ ខែសីហា ឆ្នាំ២០១៩ ត្រាស់បង្គាប់បញ្ចប់មុខតំណែងលោក សេង សុវណ្ណារ៉ា ពីអនុរដ្ឋលេខាធិការក្រសួងយុត្តិធម៌ ៕ ដោយ៖កូឡាប
