ប្រព័ន្ធផ្សព្វផ្សាយរដ្ឋចិន នៅថ្ងៃចន្ទនេះ បានធ្វើការវាយបកខ្លាំងវិញ ទៅកាន់សហរដ្ឋអាមេរិច ក្រោយពេលប្រធានាធិបតី ដូណាល់ ត្រាំ បានប្រកាសពីការយកពន្ធបន្ថែមលើផលិតផលនាំចូលពីចិន និងបានបញ្ជាឲ្យក្រុមហ៊ុនអាមេរិចទាំងចាកចេញពីប្រទេសចិន។
បច្ចុប្បន្ន មហាអំណាចសេដ្ឋកិច្ចទាំងពីរកំពុងតែដំឡើងសាច់ដុំដាក់គ្នា ក្នុងសង្រ្គាមពាណិជ្ជកម្ម ដោយការព្រមានសងសឹកគ្នាទៅវិញទៅមក លើការកំណត់ពន្ធនាំចូលផលិតផល នៃប្រទេសទាំងពីរ។
កាលពីថ្ងៃសុក្រកន្លងទៅនេះ លោក ត្រាំ បានប្រកាសកំណត់ពន្ធបន្ថែម លើទំនិញចិន ដែលមានតម្លៃជាទឹកប្រាក់ប្រមាណ ៥៥០ពាន់លានដុល្លារ។ ការប្រកាសរបស់លោក ត្រាំ កើតឡើងតែប៉ុន្មានម៉ោងប៉ុណ្ណោះ ក្រោយពេលចិនបានធ្វើការសងសឹក ដោយប្រកាសពីការយកពន្ធលើផលិតផលអាមេរិច ដែលមានតម្លៃជាទឹកប្រាក់ ៧៥ពាន់លានដុល្លារ។
ទោះយ៉ាងណា លោកត្រាំ នៅថ្ងៃអាទិត្យម្សិលមិញនេះ ទំនងជាបានដកពាក្យរបស់លោក ដែលបញ្ជាឲ្យក្រុមហ៊ុនអាមេរិចចេញពីចិន។
ជុំវិញការព្រមានរបស់ដូណាល់ ត្រាំនេះ ប្រព័ន្ធផ្សព្វផ្សាយចិន បានធ្វើការវាយបកវិញយ៉ាងខ្លាំង។ នៅក្នុងសារព័ត៌មាន China Daily បានចុះផ្សាយថា “ចិននឹងមិនអនុញ្ញាតឲ្យអាមេរិចគ្រប់គ្រងវាសនាបានឡើយ”។
“វាបានក្លាយច្បាស់ថា សង្រ្គាមពន្ធរបស់អាមេរិចប្រឆាំងនឹងចិន គឺជារឿងនយោបាយ។ វ៉ាស៊ីនតោនបានចាត់វិធានការម្តងទៀត ដើម្បីប្រយុទ្ធឲ្យខ្លាំង ដោយសង្ឃឹមថា ទីក្រុងប៉េកាំងនឹងបោះចោលការតស៊ូមុនពេល ប៉ុន្តែប៉េកាំងបានចាត់ទុកសង្រ្គាមពាណិជ្ជកម្ម គឺជាការសាកល្បងដែលមិនអាចចៀសផុតបាន ដែលវានឹងធ្វើឲ្យចិនកាន់តែខ្លាំងជាងមុន។”
ចំណែកប្រព័ន្ធផ្សព្វផ្សាយចិនមួយទៀតឈ្មោះថា The Global Times បានចេញផ្សាយវាយបកលើអាមេរិចថា “ការចាកចេញពីទីផ្សាររបស់ចិន នឹងក្លាយជាការធ្វើអត្តឃាត របស់ក្រុមហ៊ុនអាមេរិច ជាពិសេសសម្រាប់ក្រុមហ៊ុនរថយន្ត”។
កាសែតខាងលើបន្ថែមទៀតថា “ក្រុមហ៊ុនអាមេរិចត្រូវបានស្វាគមន៍ឲ្យធ្វើការវិនិយោគ និងប្រតិបត្តិនៅក្នុងទីផ្សារចិន ប៉ុន្តែប្រសិនជាក្រុមហ៊ុនខ្លះ ចង់អនុវត្តន៍តាមការបញ្ជារបស់ ដូណាល់ ត្រាំ និងចូលរួមសង្រ្គាមពាណិជ្ជកម្ម របស់វ៉ាស៊ីនតោនលទ្ធផល គឺនឹងអាប់អ៊ួរ។ ការសម្រេចចិត្តបោះបង់ចោលទីផ្សារចិន គឺជាការធ្វើអត្តឃាត”។
សូមបញ្ជាក់ថា សង្រ្គាមពាណិជ្ជកម្មរវាងមហាអំណាចសេដ្ឋកិច្ចទាំងពីរ បានធ្វើឲ្យប៉ះពាល់ដល់ការរីកចម្រើនសេដ្ឋកិច្ចទូទាំងពិភពលោក ប៉ះពាល់ដល់សម្ព័ន្ធមិត្ត និងធ្វើឲ្យប៉ះពាល់ដល់ទីផ្សារពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia