ខេត្តព្រះសីហនុ៖ អាជ្ញាធរក្រុងព្រះសីហនុ សហការគ្នាជាមួយមន្ត្រីជំនាញមន្ទីរស្ថាប័នពាក់ព័ន្ធមួយចំនួនទៀត បានឲ្យដឹងថា នៅព្រឹកថ្ងៃចន្ទ ទី២៦ ខែសីហា ឆ្នាំ២០១៩នេះ អាជ្ញាធររដ្ឋបាលក្រុងព្រះសីហនុ បានបន្តចុះរៀបចំសណ្តាប់ធ្នាប់នៅជុំវិញផ្សារលើក្រុងព្រះសីហនុ និងចាប់បានម៉ូតូចំនួន ១៨គ្រឿង យកទៅរក្សាទុកនៅបរិវេណសាលាក្រុងជាបណ្តោះអាសន្ន ដើម្បីបន្តនីតិវិធីច្បាប់។
ទាក់ទិនបញ្ហានេះ លោក លឹម ដែលបានសហការដឹកនាំក្រុមការងារចម្រុះចុះរៀបចំសណ្តាប់ធ្នាប់តាមផ្លូវសាធារណៈ នាក្រុងព្រះសីហនុ បញ្ជាក់ថា ការឃាត់ចាប់ម៉ូតូ ដែលម្ចាស់ចតចោលគ្មានរបៀបរៀបរយនាំឲ្យប៉ះពាល់ដល់ការធ្វើចរាចរណ៍នេះ គឺនឹងត្រូវអនុវត្តន៍រាល់ថ្ងៃ។ ហើយថា ទាំងម៉ូតូ និងរថយន្តដែលអាជ្ញាធរឃាត់ទុកជាបន្តបន្ទាប់មកនេះ នឹងតម្រូវឲ្យម្ចាស់ធ្វើកិច្ចសន្យា និងផាកពិន័យតាមច្បាប់។
ត្រង់ចំណុចនេះ អាជ្ញាធររដ្ឋបាលក្រុងព្រះសីហនុ បានសំណូមពរដល់ ប្រជាពលរដ្ឋ ជាពិសេសម្ចាស់យានយន្តគ្រប់ប្រភេទ មិនត្រូវនាំយកយានជំនិះ របស់ខ្លួន មកចតអនាធិបតេយ្យលើចិញ្ចើមផ្លូវ បង្កឲ្យមានការកកស្ទះចរាចរណ៍ទៀតទេ។
ជាងនេះ អាជ្ញាធររដ្ឋបាលក្រុងព្រះសីហនុ បានសំណូមពរនិង ក៏បានរំលឹកដល់បងប្អូនប្រជាពលរដ្ឋ ឲ្យចូលរួមរក្សាសណ្តាប់ធ្នាប់តាមផ្លូវសាធារណៈ ឲ្យបានទាំងអស់គ្នា ជាមួយរដ្ឋបាលក្រុងព្រះសីហនុ ប្រយោជន៍ដើម្បីឈានទៅកាត់បន្ថយអត្រាគ្រោះថ្នាក់ចរាចរ នៅតាមដងផ្លូវ និងកាត់បន្ថយការកកស្ទះចរាចរណ៍នាទីប្រជុំជនក្រុងព្រះសីហនុ ឲ្យបានប្រសើរនាថ្ងៃអនាគត៕ ដោយ៖ ដែន សីមា