បាត់ដំបង៖ ដោះស្រាយបញ្ហាចាក់ស្រេះក្នុងគ្រួសារមិនបាន បុរសម្នាក់បានសម្រេចចិត្តបញ្ចប់ជីវិតខ្លួនឯងក្រោមបន្ទះក្តារឆ្លងប្រឡាយស្រែ។
លោក ជួន សារិន អធិការនគរបាលស្រុកបវេលបានប្រាប់ឲ្យដឹងថា ករណីធ្វើអត្តឃាតនេះបានកើតឡើងនៅវេលាម៉ោង៧និង៤០នាទីព្រឹក ថ្ងៃទី២៦ ខែសីហា ឆ្នាំ២០១៩ នៅត្រង់ចំណុចក្រុមទី២ ភូមិបឹងសង្កែ ឃុំអំពិលប្រាំ ស្រុកបវេល ខេត្តបាត់ដំបង។
ជនរងគ្រោះឈ្មោះសំ វុត ភេទប្រុស អាយុ៥២ឆ្នាំ រស់នៅ ភូមិ ឃុំ កន្លែងកើតហេតុខាងលើ។ សាក្សីនៅកន្លែងកើតហេតុបានបញ្ជាក់ថា នៅអំឡុងម៉ោងប្រហែលជាង៦ព្រឹក គេឃើញជនរងគ្រោះដើរកាន់ខ្សែគោម្តុំៗកន្លែងកើតហេតុ តែពួកគាត់មិនចាប់អារម្មណ៍ ស្មានតែជនរងគ្រោះយកខ្សែទៅចងគោដូចសព្វដង មិននឹកស្មានថាមួយសន្ទុះក្រោយមកក៏អ្នកភូមិបានប្រទះឃើញហើយបង្កការភ្ញាក់ផ្អើលឡើង។
ប្រភពមួយផ្សេងទៀតបានអះអាងបន្ថែមដែរថា គ្រួសារខាងលើតែងតែផ្ទុះឡើងជាបន្តបន្ទាប់ បញ្ហាចាក់ស្រេះនេះទំនងបង្ខំចិត្តឲ្យជនរងគ្រោះគិតខ្លីសម្រេចចិត្តធ្វើអត្តឃាតសម្លាប់ខ្លួនតែម្តង។
ភ្លាមៗសមត្ថកិច្ចបានចុះទៅដល់ដើម្បីពិនិត្យជាក់ស្តែង និងបានធ្វើកោសល្យវិច័យលើសាកសពរួមបញ្ជាក់ថា ជនរងគ្រោះពិតស្លាប់ដោយសារការធ្វើអត្តឃាតមែន៕ដោយ៖កូឡាប
