ខេត្តឧត្តរមានជ័យ ៖ មន្ត្រីមន្ទីធនធានទឹកនិងឧតុនិយមខេត្តបានអះអាងថា ខណៈបច្ចុប្បន្ននេះមានភ្លៀងធ្លាក់ជាបន្តបន្ទាប់នៅផ្នែកខាងលើនៃជួរភ្នំព្រំដែនក្នុងភូមិសាស្ត្រស្រុកត្រពាំងប្រាសាទ និងស្រុកអន្លង់វែង មន្ត្រីបានសម្រេចបើកទ្វាបញ្ចេញប្រភពទឹកចេញខ្លះការពារកើតមានផលប៉ះពាល់។
លោកញឺន កួន ប្រធានមន្ទីរធនធានទឹកនិងឧតុនិយមខេត្តឧត្តរមានជ័យបានឱ្យដឹងថា អាងរក្សាប្រភពទឹកចំំនួនពីរ គឺអាងរក្សាប្រភពទឹក៥ និងអាងរក្សាប្រភពទឹកតាម៉ុក ក្នុងភូមិសាស្ត្រខាងលើ មានកម្ពស់ទឹកហក់ឡើងលើសពីតម្រូវការ ក្រុមការងារនៃមន្ទីរធនធានទឹក និងឧតុនិយមខេត្ត បានសម្រេចបើកទ្វារទឹកបញ្ចេញក្នុងគោលបំណងរុញទឹកឲ្យបានលឿនតាមរយៈអាងទឹកទំនប់ថ្មីមកស្តុកទុកនៅអាងទឹកស្ទឹងស្រែងទី២ និងបន្តទម្លាក់មកអាងទឹកស្ទឹងស្រែងទី១ ដើម្បីចែកចាយទៅខេត្តបន្ទាយមានជ័យ និងខេត្តសៀមរាប។
លោកបានបញ្ជាក់ថា រដូវវស្សាឆ្នាំនេះអាកាសធាតុមានការប្រែប្រួល ប្រព័ន្ធធារាសាស្ត្រខ្នាតតូចធំមួយចំនួននៅក្នុងបណ្តា ស្រុក ក្រុងនៃខេត្តនេះ មកដល់ពេលនេះ មិនទាន់មានប្រភពទឹកហូរចូលដើម្បីរក្សាទុកនៅឡើយទេ។
សូមរំលឹកថា ខេត្តឧត្តរមានជ័យមានប្រព័ន្ធធារាសាស្ត្ររក្សាប្រភពទឹកតូចធំចំនួន៨១ទីតាំង ក្នុងនោះប្រព័ន្ធធារាសាស្ត្រខ្នាតធំចំនួន៣កន្លែង និងខ្នាតមធ្យមនិងតូចចំនួន៧៨កន្លែង៕ ដោយ៖កូឡាប
