ប្រធានាធិបតីអាមេរិច ដូណាល់ ត្រាំ បាននិយាយថា អាមេរិច និងចិននឹងវិលទៅរកតុចរចាវិញ ក្នុងពេលឆាប់ៗនេះ ដើម្បីបន្តការចរចាលើបញ្ហាពាណិជ្ជកម្ម ក្រោយពេលមានភាពតានតឹងជាមួយគ្នាយ៉ាងខ្លាំង កាលពីចុងសប្តាហ៍កន្លងទៅ។
លោកបាននិយាយដូច្នេះថា “ចិនបានតេមកយប់មិញ ហើយនិយាយថា តោះយើងត្រឡប់ទៅកាន់តុចរចាវិញ ដូច្នេះពួកយើងនឹងត្រឡប់ទៅកាន់តុចរចាវិញ”។
កាលពីថ្ងៃសុក្រកន្លងទៅ លោកត្រាំ បានប្រកាសដំឡើងពន្ធយ៉ាងខ្ពស់ ទៅលើផលិតផលនាំចូលពីចិន ដែលមានតម្លៃជាទឹកប្រាក់រាប់ពាន់លានដុល្លារ ដើម្បីជាការសងសឹកទៅនឹងចិន ដែលប្រកាសដំឡើងពន្ធលើមុខទំនិញអាមេរិច។
រហូតមកដល់ពេលនេះ ចិនមិនទាន់បានប្រកាសពីគម្រោងវិលទៅរកតុចរចានៅឡើយទេ ប៉ុន្តែធ្លាប់ប្រកាសថា ខ្លួននឹងមិនឱនក្បាលជាដាច់ខាតចំពោះការគំរាម។
នៅក្នុងកិច្ចប្រជុំកំពូល G7 លោកដូណាល់ ត្រាំថ្លែងថា មន្រ្តីចិនបានតេមកគាត់ចំនួន ២ដងកាលពីថ្ងៃអាទិត្យ ហើយប្រាប់ថា ប៉េកាំងចង់បង្កើតកិច្ចព្រមព្រៀង។
លោកបញ្ជាក់ថា ការដាក់សម្ពាធរបស់លោក បានធ្វើឲ្យចិនត្រឡប់មកកាន់តុចរចាវិញ។
លោកថ្លែងថា “ពួកគេរងផលប៉ះពាល់យ៉ាងខ្លាំង ប៉ុន្តែពួកគេបានយល់ថា នេះគឺជារឿងត្រឹមត្រូវក្នុងការធ្វើវា (ចរចា)”។
“ពួកយើងនឹងធ្វើការចាប់ផ្តើមចរចាឲ្យបានលឿន ប៉ុន្តែខ្ញុំគិតថា ពួកយើងនឹងអាចបង្កើតកិច្ចព្រមព្រៀងបាន”។
សូមបញ្ជាក់ថា កាលពីថ្ងៃសុក្រកន្លងទៅនេះ អាមេរិចបានប្រកាសថា ខ្លួននឹងចាប់ផ្តើមធ្វើការដំឡើងពន្ធពី ២៥ ទៅ ៣០ភាគរយលើមុខទំនិញនាំចូល ពីចិនដែលមានតម្លៃជាទឹកប្រាក់ប្រមាណ ២៥០ពាន់លានដុល្លារ ដែលការអនុវត្តពន្ធនោះ នឹងចាប់ផ្តើមពីថ្ងៃទី ១ ខែតុលាទៅ។
ចំណែកផលិតផលនាំចូលពីចិនផ្សេងទៀត ដែលមានតម្លៃជាទឹកប្រាក់ ៣០០ពាន់លានដុល្លារ នឹងត្រូវជាប់ពន្ធ ១៥ភាគរយ ដែលកាលពីមុន អាមេរិចប្រកាសថាយកពន្ធតែ ១០ភាគប៉ុណ្ណោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
