ខេត្តស្វាយរៀងៈ លោក អ៊ុយ ថន សមាជិកក្រុមប្រឹក្សាខេត្តស្វាយរៀង និងជាអនុប្រធានក្រុមការងារ ចុះមូលដ្ឋានស្រុកចន្ទ្រា នៅព្រឹកថៃ្ងទី២៦ ខែសីហា ឆ្នាំ២០១៩ បានអញ្ជើញជាអធិបតីនៅក្នុងពិធីវេទិកាសាធារណៈ របស់ក្រុមការងារថ្នាក់ជាតិ ចុះមូលដ្ឋានស្រុកចន្រ្ទា ដែលបានរៀបចំឡើងនាវត្តសុវណ្ណសាមគ្គីរង្សី ស្ថិតក្នុងភូមិកោះគោ ឃុំព្រៃគគីរ ស្រុកចន្រ្ទា ខេត្តស្វាយរៀងខេត្តស្វាយរៀង ។
អញ្ជើញចូលរួមក្នុងពិធីនោះផងដែរ មានអស់លោកជាអនុប្រធានក្រុមការងារចុះមូលដ្ឋានស្រុកចន្ទ្រា លោកប្រធានក្រុមប្រឹក្សាស្រុក លោក អភិបាលស្រុក លោក លោកស្រី ជាក្រុមការងារចុះមូលដ្ឋានស្រុកចន្ទ្រា លោក លោកស្រីអភិបាលរងស្រុក លោកនាយករដ្ឋបាលសាលាស្រុក លោក លោកស្រីប្រធាន អនុប្រធាន អង្គភាព ការិយាល័យនានាជុំវិញស្រុក ក្រុមប្រឹក្សាឃុំ ស្មៀនឃុំ មេភូមិនិងប្រជាពលរដ្ឋក្នុងភូមិកោះគោ និងភូមិត្រពាំងបុណ្យ សរុបវត្តមានចូលរួម ១៣៦ នាក់ ស្រី ៣៨ នាក់ ។
ក្នុងឱកាសនោះផងដែរ ប្រជាពលរដ្ឋបានលើកឡើងនូវបញ្ហាប្រឈម និងសំណូមពរមួយចំនួនពាក់ព័ន្ធនឹងជីវភាពរស់នៅ សេចក្តីត្រូវការជាចាំបាច់ របស់ប្រជាពលរដ្ឋនៅមូលដ្ឋាន ដូចជា ស្នើសុំតភ្ជាប់បណ្ដាញអគ្គិសនីប្រើប្រាស់នៅក្នុងភូមិកោះគោ និងភូមិត្រពាំងបុណ្យ ។ ស្នើសុំធ្វើផ្លូវកៅស៊ូ ឬ ផ្លូវបេតុងនៅភូមិកោះគោ ។ ស្នើសុំជួយជំរុញធ្វើអត្តសញ្ញាណប័ណ្ណឲ្យបានឆាប់។ ស្នើសុំជួយសាងសង់អគារសាលាបឋមសិក្សាកោះគោ ។ សុំឱ្យមេឃុំធ្វើសំបុត្រអាពាហ៍ពិពាហ៍ឲ្យបានឆាប់រហ័ស ។
ចំពោះបញ្ហាប្រឈម និងសំណូមពរខាងលើត្រូវបានគណៈអធិបតី និងក្រុមការងារធ្វើការបំភ្លឺ និងដោះស្រាយជូនរួចរាល់ ។ ចំពោះបញ្ហាប្រឈមដែលនៅសេសសល់មួយចំនួន ក្រុមការងារ នឹងធ្វើការរាយការណ៍ជូនថ្នាក់ដឹកនាំ ដើម្បីរិះរកវិធីដោះស្រាយ នៅពេលក្រោយ៕ដោយ៖ វ៉ៃកូ