ខេត្តស្វាយរៀងៈ មន្ទីរពាណិជ្ជកម្មខេត្តស្វាយរៀង នៅព្រឹកថ្ងៃទី២៧ ខែសីហា ឆ្នាំ២០១៩នេះ បានធ្វើការរៀបចំនូវពិធីតាំងបង្ហាញផ្សព្វផ្សាយ និងប្រឹក្សាយោបល់ លើផលិតផលខ្មែរសំខាន់ៗ ដែលមានសក្តានុពលនៅខេត្តស្វាយរៀង។ ពិធីនេះបានប្រារព្ធធ្វើឡើងក្រោមអធិបតីភាពលោក អួង សុខន អគ្គនាយករងនៃអគ្គនាយកដ្ឋាន ជំរុញពាណិជ្ជកម្ម នៃក្រសួងពាណិជ្ជកម្ម លោក ចិន សាធាន នាយករដ្ឋបាលសាលាខេត្តស្វាយរៀង រួមនិងអស់លោក លោកស្រី ដែលជាតំណាងមន្ទីរ អង្គភាពនានាជុំវិញខេត្ត សភាពាណិជ្ជកម្មខេត្ត សហគមន៍ ពាណិជ្ជករ ផលិតករ និងប្អូនៗជានិស្សិតនៃសកលវិទ្យាល័យស្វាយរៀងផងដែរ។
លោក មាក ឆវណ្ណារុន ប្រធានមន្ទីរពាណិជ្ជកម្មខេត្តស្វាយរៀង បានឱ្យដឹងថាៈ ការដាក់តាំងបង្ហាញផលិតផលសំខាន់ៗរបស់ខេត្ត ដែលបានជ្រើសរើសយកមកធ្វើការតាំងបង្ហាញ ផ្សព្វផ្សាយនិងប្រឹក្សាយោបល់ នៅពេលនេះ រួមមាន ផលិតផល សហគមន៍សិប្បកម្ម សហគ្រាសមានជាអាទិ៍: ១.សហគមន៍ផ្គត់ផ្គង់កសិផលខេត្ត ២.សហគមន៍កសិកម្មស្រូវស្មាច់កំពង់រោទិ៍
៣.រចនាសិប្បកម្មសាខាខេត្តស្វាយរៀង ៤.ផ្ទះសិប្បកម្មខ្មែរ ៥.ផ្កាំស្រីមុំកែច្នៃសណ្តែកដី ៦.សិប្បកម្មរបស់ស្ត្រីនិងជនពិការឃុំតាសួស ៧.សិប្បកម្មត្បាញក្រមាភូមិដំណាក់កន្ទួតឃុំស្វាយយា ៨.សិប្បកម្មទឹកត្រីសញ្ញារូបបង្កងបង់សំណាញ់រមាសហែក និងទី៩ សហគ្រាសសំអនហ្វមប្រូដាក់អ៊ីនធើប្រាយ។
លោកប្រធានមន្ទីរបានបន្តទៀតថាៈ នាពេលកន្លងមក ខាងមន្ទីរក៏បានយកចិត្តទុកដាក់ ចុះសិក្សាស្រាវជ្រាវ និងក្តាប់នូវផលិតផលថ្មីៗ ដែលមានសក្តានុពល នៅក្នុងខេត្តដើម្បីជួយជំរុញផ្សព្វផ្សាយ និងស្វែងរកទីផ្សារជូនផងដែរ តាមរយៈការផ្តល់លទ្ធភាព ក្នុងការនាំយកផលិតផលខ្មែរ ទៅចូលរួមតាំងពិព័រណ៍ នៅក្នុងព្រឹត្តិការណ៍នានាផងដែរ ក្នុងគោលបំណងជំរុញ ការលើកស្ទួយនូវផលិតផលខ្មែរ ឱ្យមានការចាប់អារម្មណ៍ ក៏ដូចជា ការទទួលស្គាល់ និងការងាកមកនិយមប្រើប្រាស់ ផលិតផលខ្មែរ កាន់តែច្រើនឡើង ពីអតិថិជនជាតិ និងអន្តរជាតិ។
លោក អួង សុខន អគ្គនាយករង នៃអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម បានមានប្រសាសន៍លើកឡើងថា រាជរដ្ឋាភិបាលកម្ពុជាបានដាក់ឱ្យអនុវត្តន៍នូវយុទ្ធសាស្ត្រចតុកោណដំណាក់កាលទី៤ ក្នុងនោះ វិស័យពាណិជ្ជកម្ម ជាតួអង្គមួយដ៏សំខាន់ ក្នុងការជំរុញកំណើនសេដ្ឋកិច្ចជាតិ ក្នុងគោលបំណងជំរុញការគាំទ្រផលិតផលរបស់ជាតិយើង ឱ្យរីកចម្រើន ក្រសួងបានខិតខំចរចាបើកទីផ្សារ ទាំងក្នុងអាស៊ាន អង្គការពាណិជ្ជកម្មពិភពលោក តំបន់ អនុតំបន់ និងទីផ្សារដទៃទៀតផងដែរ។
លោកបានមានប្រសាសន៍បន្តទៀតថាៈ ការដាក់តាំងបង្ហាញ និងប្រឹក្សាយោបល់នាពេលនេះ មានទំហំតូច ក៏ពិតមែន ប៉ុន្តែក្រុមការងាររបស់ក្រសួង បានចុះធ្វើគ្រប់ខេត្ត ដើម្បីប្រមែប្រមូល និងចងក្រងទៅជាព្រឹត្តិការណ៍ដ៏ធំមួយ ដូច្នេះលោកសង្ឃឹមថាៈ នឹងទទួលបាននូវចំណេះដឹងផ្សេងៗបន្ថែមទៀត ដូចជា ព័ត៌មានទីផ្សារ ការបង្ហាញនូវផលិតផល សក្តានុពល ការទំនាក់ទំនងគ្នា ដើម្បីផ្លាស់ប្តូរបច្ចេកទេស ទំនិញផងដែរ ហើយក៏សូមសំណូមពរដល់ប្រជាពលរដ្ឋទាំងអស់ ងាកមកប្រើប្រាស់នូវផលិតផលខ្មែរ ដើម្បីលើកស្ទួយដល់ជីវភាពប្រជាជន និងកំណើនសេដ្ឋកិច្ចជាតិយើង៕ដោយ៖ វ៉ៃកូ
