ភ្នំពេញ ៖ តុលាការ បានប្រកាសផ្តន្ទាទោសអតីតឧកញ៉ា ហូរ ចំរើនមួយ ករណីទៀត ពីបទឆបោក ដោយសម្រេចដាក់ពន្ធនាគារចំនួន ២ឆ្នាំ ៦ខែ និងសងលុយទៅដើមបណ្តឹង (ជនជាតិកូរ៉េ) ជាង៩៧លានដុល្លារ។ អតីតឧកញ៉ានេះ ក៏ធ្លាប់ត្រូវបានតុលាការប្រកាសផ្តន្ទាទោស ដាក់ពន្ធនាគាររឿងគំរាមបាញ់សម្លាប់ប្រពន្ធផងដែរ។
សវនាការដែលធ្វើឡើងនារសៀលថ្ងៃទី២៧ ខែសីហា ឆ្នាំ២០១៩នេះ បានសម្រេចដាក់ទោសទណ្ឌដល់អតីតឧកញ៉ារូបនេះ បានធ្វើឡើងដោយលោក ពេជ្រ វវិជ្ជាធរ ចៅក្រមជំនុំជម្រះ និងលោក កុល បុន ព្រះរាជអាជ្ញារងអមសាលាដំបូងរាជធានីភ្នំពេញ។
ក្រៅពីការដាក់ទោសទណ្ឌនៅក្នុងពន្ធនាគារ និងតម្រូវឲ្យសងលុយទៅដើមបណ្តឹងវិញនោះ តុលាការក៏បានសម្រេចឲ្យជនជាប់ចោទ សងជំងឺចិត្តជូនដើមបណ្តឹងចំនួន ២លានដុល្លារ និងពិន័យចូលរដ្ឋចំនួន៦លានរៀលផងដែរ។
សូមបញ្ជាក់ថា កាលពីព្រឹកថ្ថៃទី១៤ ខែកម្ភ: ឆ្នាំ២០១៩ សាលាឧទ្ធរណ៍បានបើកសវនាការ ប្រកាសសាលដីកាលើសំណុំរឿង អតីតឧកញ៉ា ហូរ ចំរើន ពាក់ព័ន្ធបទល្មើសចំនួន ២ករណី គឺករណីឆបោក និងចេញសែកស្អុយ ដោយសម្រេចមិនអនុញ្ញាតឱ្យអតីតឧកញ៉ារូបនេះ នៅក្រៅឃុំនោះទេ និងបន្តឃុំខ្លួនក្នុងពន្ធនាគារ តាមអំណាចសាលក្រមសាលាដំបូងរាជធានីភ្នំពេញ។
សូមរំលឹកថា អតីតឧកញ៉ា ហូរ ចំរើន ត្រូវបានតុលាការសម្រេចផ្តន្ទាទោសដាក់ពន្ធនាគារចំនួន ១៨ខែ ក្នុងបទចោទប្រកាន់ ប្រើប្រាស់អាវុធ បាញ់បោះគំរាមសម្លាប់ប្រពន្ធ ប្រព្រឹត្តនៅក្នុងភូមិគ្រឹះរបស់ខ្លួន ។
អតីតឧកញ៉ា ហូរ ចំរើន ត្រូវបាននគរបាលការិយាល័យព្រហ្មទណ្ឌកម្រិតស្រាល នៃនាយកដ្ឋានព្រហ្មទណ្ឌ ក្រសួងមហាផ្ទៃ ឃាត់ខ្លួនកាលពីរសៀលថ្ងៃទី១៥ ខែឧសភា ឆ្នាំ២០១៨ ពាក់ព័ន្ធ បាញ់បោះជិត ១០គ្រាប់ ផ្អើលសមត្ថកិច្ចមូលដ្ឋាន កាលពីថ្ងៃទី២១ ខែមេសា ឆ្នាំ២០១៨ កន្លងទៅនៅចំណុចផ្ទះវីឡាមួយកន្លែង ស្ថិតនៅភូមិព្រៃស សង្កាត់ព្រៃស ខណ្ឌដង្កោ រាជធានីភ្នំពេញ៕ ដោយ៖បញ្ញាស័ក្តិ
