មន្ត្រីការទូតជាន់ខ្ពស់របស់ចិន លោក Wang Yi បានថ្លែងប្រាប់គណៈប្រតិភូជំនួញហុងកុងថា រដ្ឋាភិបាលហុងកុងគួរទទួលបានការគាំទ្របន្ថែមដើម្បីបញ្ចប់អំពើហឹង្សាដែលធ្វើឲ្យទីក្រុងជួបវិបត្តិដ៏ធ្ងន់ធ្ងន់បំផុត ចាប់តាំងពីវាត្រូវបានប្រគល់អោយមកចិនវិញ ក្នុងឆ្នាំ ១៩៩៧។
ហុងកុងកំពុងត្រូវញាំញីដោយការតវ៉ាដ៏ធំ មិនធ្លាប់មានពីមុនមក អស់រយៈពេលជាង ៣ខែមកហើយ។ ពេលខ្លះ ការតវ៉ាបានផ្ទុះក្លាយទៅជាអំពើហឹង្សា ដែលធ្វើឲ្យមានការប៉ះទង្គិចគ្នារវាងប៉ូលីស និងក្រុមបាតុករ។
ការតវ៉ាបានផ្ទុះឡើងក្រោយពេលរដ្ឋាភិបាលហុងកុងប្រកាសពីច្បាប់ធ្វើបត្យាប័នដែលអនុញ្ញាតិឲ្យមាន
ការបញ្ជូនអ្នកទោសពីទីក្រុងហុងកុងទៅធ្វើការកាត់ទោសនៅក្នុងប្រទេសចិនបាន។ ក្រុមបាតុករ ដែលភាគច្រើនជាយុវជន បានទាមទារឲ្យរដ្ឋាភិបានបោះបង់ចោលទាំងស្រុងនូវច្បាប់នោះ និងទាមទារឲ្យមេដឹកនាំហុងកុងគឺអ្នកស្រី Carrie Lam ចុះចេញពីដំណែង។
លោក Wang Yi បានថ្លែងកាលពីថ្ងៃអង្គារ ក្នុងទីក្រុងប៉េកាំងថា ខណៈដែលហុងកុងកំពុងប្រឈមនឹងបញ្ហាដ៏អាក្រក់ខ្លាំង វាក៏នៅមានលទ្ធភាពដោះស្រាយបញ្ហាទាំងនោះបានដែរ ដោយមានការគាំទ្រពីរដ្ឋាភិបាន និងការរួបរួមរបស់ប្រជាជនហុងកុង។
សូមរម្លឹកថា ទីក្រុងហុងកុង ត្រូវបានអង់គ្លេសប្រគល់ត្រឡប់ទៅអោយចិនវិញនៅឆ្នាំ ១៩៩៧ ក្រោមកិច្ចព្រមព្រៀង “ប្រទេសមួយ ប្រព័ន្ធដឹកនាំពីរ” ដែលធ្វើឲ្យហុងកុងមានសេរីភាពក្នុងការបញ្ចេញមតិ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia