សារព័តមាន CBS បានដកស្រង់សេចក្តីប្រកាសរបស់លេខាធិការសារព័ត៌មានសេតវិមាន Sarah Huckabee Sanders នៅថ្ងៃទី ៤/១ ឲ្យដឹងថា ៖ បញ្ហាសន្តិសុខ និងការឯកភាពបណ្តាប្រព័ន្ធបច្ចេកវិទ្យានៅសេតវិមាន ជាអាទិភាពលំដាប់ដំបូងរបស់រដ្ឋការ ត្រាំ ។ ហេតុនេះ ចាប់តាំងពីសប្តាហ៍ ក្រោយការប្រើប្រាស់រាល់បរិក្ខារឯកជនចំពោះបណ្តាបុគ្គលិក ក៏ដូចជាភ្ញៀវដែលមកទស្សនា ត្រូវហាមឃាត់នៅស្លាបខាងលិចវិមាន។
ស្លាបខាងលិចសេតវិមាន រួមមានបន្ទប់ពងក្រពើ Oval ដែលជាបន្ទប់ធ្វើការរបស់ប្រធានាធិបតីត្រាំ និងជាកន្លែងដែលលោកធ្វើបដិសណ្ឋារកិច្ចមេដឹកនាំបរទេស ហើយរួមទាំងការិយាល័យរបស់បណ្តាជំនួយការជិតដិតរបស់លោកត្រាំ។
មុននោះប្រធានាធិបតីត្រាំ ធ្លាប់បានរអ៊ូរទាំជុំវិញបញ្ហាព័ត៌មានដែលពុំទាន់ត្រូវអនុញ្ញាតឲ្យប្រកាសផ្សាយនៅសេតវិមាន បែរជាបែកធ្លាយចេញក្រៅ រួចមានវត្តមានលើទំព័រកាសែតទៅវិញ។
ឥរិយាបថខាងលើរបស់សេតវិមាន ត្រូវបានបង្ហាញឡើងបន្ទាប់ពីការដកស្រង់ខ្លឹមសារមួយចំនួនៃសៀវភៅ មានចំណងជើងថា “Fire and Fury: Inside the Trump White House” របស់អ្នកសារព័ត៌មាន Michael Wolff។ សម្រង់ខ្លឹមសារខ្លះៗនៃសៀវភៅនេះ បានបង្ហាញឲ្យសារធារណជនបានដឹងនូវរឿងរ៉ាវមួយចំនួន ដែលជា “អាថ៌កំបាំងក្រោយឆាក” របស់ប្រធានាធិបតីត្រាំ និងរដ្ឋការអាមេរិក។
តាម CBS អ្នកនិពន្ធ Michael Wolff បានប្រាស្រ័យទាក់ទងធ្វើកិច្ចសម្ភាសន៍ជាមួយបុក្គលិក ក្នុងកងកម្លាំងដណ្តើមសន្លឹកឆ្នោតរបស់លោកត្រាំ ហើយបច្ចុប្បន្នកំពុងធ្វើការនៅស្លាបខាងលិចសេតវិមាន។ តាមអ្នកស្រី Sanders ដែលជាលេខាធិការិនីសារព័ត៌មាន ប្រាប់ទៅអ្នកសារព័ត៌មានកាលពីថ្ងៃ ៣/១ មានការសន្ទនាប្រមាណ ១២លើក ជាមួយអ្នកនិពន្ធ Wolff និងមន្ត្រីនៃសេតវិមាន។ សេតវិមានក៏បានធ្វើការស្តីបន្ទោសសៀវភៅដែលទម្លាយចេញរឿងរ៉ាវ “អាថ៌កំបាំង” ក៏ដូចជាអ្នកដែលបានសហការជាមួយអ្នកនិពន្ធសៀវភៅនេះ៕ ចន្ទ្រា