បាត់ដំបង ៖ របរដាំដំណាំបន្លែសាឡាត់ និងគីនឆាយតាមបែបទំនើបលើទឹក ផ្តល់ផលចំណេញច្រើនទាំងពេលវេលា ទាំងប្រាក់ចំណូល។
លោក សៅ ស៊ិនហាច វ័យ៣៩ឆ្នាំជាគ្រូបង្រៀនរស់នៅក្នុងភូមិវត្តគរ បានរៀបរាប់អោយដឹងនៅថ្ងៃទី២៧ ខែសីហា ឆ្នាំ២០១៩នេះថា៖ ការចាប់យករបរដាំដុះបន្លែសាឡាត់និងបន្លែគីនឆាយនេះវាជាមុខរបរផ្សំបន្ថែមមួយទៀតដើម្បីជួយស្ទួយជីវភាពគ្រួសារអោយប្រសើរឡើងក្រៅពីមុខរបរគោលជាគ្រូបង្រៀនទាំង២នាក់ប្តី ប្រពន្ធ ។ ការប្រកាន់យករបរដាំដុះបន្លែតាមបច្ចេកទេសថ្មី នេះដោយសារលោកសម្លឹងឃើញពីចំណេញ ទាំងពេលវេលា ភាពងាយស្រួល ប្រមូលផលបានជាប្រចាំមិនប្រកាន់រដូវ និងទាំងការបង្កើនប្រាក់ចំណូលបានច្រើនជាងការដាំដុះតាមបែបបុរាណដាំដុះផ្ទាល់ដី។
បន្ទាប់ពីការដាំសាកល្បងចំនួន៤ទៅ១០រង ដំបូងនៅអំឡុង៣ឆ្នាំមុនរបរខាងលើជួបនូវការលំបាកច្រើន ទាំងបទពិសោធន៍ដាំ ក៏ដូចជាទីផ្សារផ្គត់ផ្គង់បន្លែមួយនេះដែលខុសពីដំណាក់កាលសព្វថ្ងៃលោកបានពង្រីកទំហំដាំដុះរហូតដល់១៩រងនៅលើទឹក តែផុតពីដី ដោយក្នុងមួយរងមានប្រវែង១៦ម៉ែត្រ ។ ផលបន្លែដែលហុចអោយដំណាក់កាលបច្ចុប្បន្ននេះគឺបន្លែសាឡាត់ចំនួន៥០គីឡូក្រាម គីនឆាយចំនួន១០គីឡូក្រាម ក្នុង១ថ្ងៃ ដោយសាឡាត់ក្នុង១គីឡូក្រាមលក់បានតម្លៃ៣៥០០រៀល រីឯគីនឆាយលក់បានតម្លៃ៦០០០រៀលក្នុង១គីឡូក្រាម ដូចនេះទូទាត់ទៅលើសេវាកម្មកររួចរាល់ប្រាក់ចំណូលអាចនៅប្រមាណ២០ម៉ឺនរៀលដែរក្នុងមួយថ្ងៃ។
លោកគ្រូ សៅ ស៊ិនហាច បានបញ្ជាក់បន្តថា÷ បន្លែសាឡាត់ និងគីនឆាយចាប់ពីថ្ងៃបណ្តុះពូជដល់ថ្ងៃដកប្រមូលផលមានរយះពេល៣៧ថ្ងៃងាយស្រួលថែទាំទោះជារដូវប្រាំងមេឃក្តៅ និងរដូវវស្សាមានទឹកភ្លៀងស្រោចស្រពច្រើនដោយគ្រាន់តែមើលថែទឹកក្នុងទុយោនិងរក្សាសារធាតុចិញ្ចឹមក្នុង១ខែម្តងប៉ុណ្ណោះ វាមានតម្លៃខ្ពស់ ទីផ្សារទូលាយ បច្ចុប្បន្នបន្លែដាំយកស្លឹករបស់លោកផ្គត់ផ្គង់តាមកន្លែងលក់បាញ់ឆែវ និងតាមបណ្តាភោជនីយដ្ឋានក្នុងក្រុងមួយចំនួនផងដែរ។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទបានបង្ហាញថា ទូទាំងខេត្តបាត់ដំបងបន្លែគ្រប់មុខដែលកសិករដាំដុះបានគិតត្រឹមថ្ងៃទី២៨ ខែសីហា ឆ្នាំ២០១៩នេះ សរុបចំនួន៨៦៩ហិកតា ស្មើចំនួន៥១,៧៣% នៃផែនការចំនួន១៦៨០ហិកតា៕ ដោយ៖កូឡាប
