ប្រទេសអូស្រ្តាលីមានក្តីកង្វល់ចំពោះការព្យបាទអ្នកនិពន្ធសញ្ជាតិអូស្រ្តាលីម្នាក់ ដែលត្រូវបានចាប់ខ្លួននៅក្នុងប្រទេសចិន ពីបទសង្ស័យថាបានធ្វើចារកម្ម។ អូស្រ្តាលីនឹងគាំទ្រដល់សិទ្ធិរបស់គាត់ ទោះបីជាចិនបានប្រាប់ថាកុំឲ្យលូកដៃ។ នេះបើតាមការបញ្ជាក់របស់នាយករដ្ឋមន្រ្តីអូស្រ្តាលី Scott Morrison ថ្លែងនៅថ្ងៃព្រហស្បតិ៍នេះ។
លោក Yang Hengjun ដែលជាអតីតអ្នកការទូតចិន និងបានប្រែខ្លួនជាអ្នកនិពន្ធ និងសរសេរលើប្លុក ត្រូវបានអាជ្ញាធរចិន ចាប់ខ្លួនជាផ្លូវការ កាលពីសប្តាហ៍មុន រយៈពេល ៧ខែបន្ទាប់ពីគាត់ត្រូវបានឃុំខ្លួន ក្នុងប្រទេសចិន។
លោក Scott Morrison បានថ្លែងដូច្នេះថា “ពួកយើងនឹងគាំទ្រដល់ប្រជាជនរបស់យើង ហើយពួកយើងរំពឹងថា គាត់នឹងត្រូវបានគេប្រព្រឹត្តសមរម្យដាក់ ហើយសិទ្ធិរបស់គាត់នឹងត្រូវបានគេគោរព”។
នៅពេលសួរថា តើលោក Yang Hengjun ជាចារកម្មរបស់ប្រទេសអូស្រ្តាលីមែនឬទេ លោកនាយករដ្ឋមន្រ្តីអូស្ត្រាលីបានឆ្លើយថា វាមិនមែនជាការពិតនោះទេ។
សូមបញ្ជាក់ថា ការចាប់ខ្លួនជនជាតិអូស្រ្តាលី មានដើមកំណើតចិន បានកើតឡើងក្រោយមានភាពតានតឹងផ្នែកការទូតរវាងទីក្រុងប៉េកាំង និងកងប៉េរ៉ា។
លោក Yang Hengjun ត្រូវបានចាប់ខ្លួនជាផ្លូវការកាលពីថ្ងៃទី ២៣ ខែសីហានេះ។ ចារកម្មគឺជាបទល្មើសធ្ងន់ធ្ងរខ្លាំង និងជាបទល្មើសមានទោសប្រហារជីវិតនៅក្នុងប្រទេសចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia