កងទ័ពជើងទឹកអាមេរិច បានបើកនាវាចំបាំងរបស់ខ្លួមមួយគ្រឿងមកក្បែរដែនកោះមានជម្លោះនៅក្នុងសមុទ្រចិនខាងត្បូង កាលពីថ្ងៃពុធម្សិលមិញនេះ ដែលការធ្វើនាវាចរណ៍នោះ ត្រូវបានទ័ពអាមេរិចហៅថា សេរីភាពនៃការធ្វើនាវាចរណ៍។
នាវាពិឃាតអាមេរិចឈ្មោះ USS Wayne E. Meyer បានបើកមកក្បែរ ដែលមានចម្ងាយប្រមាណជិត ២០គីឡូម៉ែត្រប៉ុណ្ណោះ ពីកោះ Fiery Cross និង Mischief Reef ដើម្បីការពារការអាចធ្វើនាវាចរណ៍ បាននៅតំបន់ទឹកដែលកំណត់ដោយច្បាប់អន្តរជាតិ។ នេះបើតាមការបញ្ជាក់របស់អ្នកនាំពាក្យរបស់កងនាវាទី ៧ របស់អាមេរិចឈ្មោះ Reann Mommsen ថ្លែងប្រាប់ CNN ក្នុងសេចក្តីប្រកាស។
អ្នកស្រីថ្លែងថា “អាមេរិចនឹងធ្វើការហោះហើរ និងនាវាចរណ៍ និងធ្វើប្រតិបត្តិការនៅកន្លែងណា ដែលច្បាប់អន្តរជាតិអនុញ្ញាត។ សេរីភាពការធ្វើនាវាចរណ៍មិនមែនសម្រាប់ប្រទេសណាមួយឡើយ ហើយក៏មិនមែនសម្រាប់ពួកធ្វើនយោបាយដែរ”។
អាមេរិចបានចោទប្រកាន់ចិនថា បានសាងសងមូលដ្ឋានយោធានៅលើកោះសិប្បនិម្មិត នៅកោះ Fiery Cross និង Mischief Reef។
មន្រ្តីនៃក្រសួងការពារជាតិអាមេរិច បានថ្លែងប្រាប់ CNN ថា នាវាយោធារបស់ចិនបានបើកតាមនាវាចំបាំងអាមេរិច កំពុងពេលធ្វើប្រតិបត្តិការ។
សូមបញ្ជាក់ថា កងនាវាអាមេរិចតែងតែធ្វើប្រតិបត្តិការនាវាចរណ៍ជាប្រចាំនៅសមុទ្រចិនខាងត្បូង។ កាលពីចុងខែ ឧសភាកន្លងទៅ នាវាចំបាំងអាមេរិច ២គ្រឿង ក៏បានធ្វើប្រតិបត្តិការនៅក្បែរដែលកោះដែលគ្រប់គ្រងដោយចិនផងដែរ ស្ថិតនៅក្រុមកោះប៉ារ៉ាសែល នៅភាគខាងជើងនៃសមុទ្រចិនខាងត្បូង។
ភាគីខាងចិន ជាធម្មតា បានធ្វើការឆ្លើយតបទៅនឹងការធ្វើប្រតិបត្តិការនាវាចរណ៍របស់អាមេរិច តាមរយៈការចេញសេចក្តីថ្លែងការណ៍ ដោយបានស្នើឲ្យអាមេរិច បញ្ឈប់សកម្មភាពបង្ករឿងភ្លាមៗ ដែលគំរាមកំហែងដល់សន្តិសុខចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN