សៀមរាប៖កម្លាំងការិយាល័យនគរបាលព្រហ្មទណ្ឌកម្រិតស្រាល ខេត្តសៀមរាប បានឃាត់ខ្លួនជនសង្ស័យចំនួន៥នាក់ ពាក់ព័ន្ធករណីអំពើលួចមានស្ថានទម្ងន់ទោស (លួចរ៉ូត ឬឆ្កឹះសោវ៉ាលិសរបស់ប្រជាពលរដ្ឋ និងភ្ញៀវទេសចរ) កាលពីថ្ងៃទី២៥ និងទី ២៦ ខែសីហា ឆ្នាំ២០១៩ វេលាម៉ោង១៥នឹង២០នាទី នៅចំណុចក្នុងប្រអប់យន្តហោះកន្លែងដាក់សម្ភារព្រលានយន្តហោះសៀមរាប ភូមិគោកដូង សង្កាត់ទឹកវិល ក្រុង/ខេត្តសៀមរាប កាលពីថ្ងៃទី២៧ ខែសីហា ឆ្នាំ២០១៩ ។កម្លាំងសមត្ថកិច្ច បានកសាងសំណុំរឿងបញ្ជូនទៅសាលាដំបូងខេត្ត និងកំពុងបន្តស្រាវជ្រាវរកមុខសញ្ញាដែលនៅសល់ចំនួន៤នាក់ទៀត។
មន្ត្រីនគរបាលខេត្តសៀមរាប បានឱ្យដឹងថា ជនសង្ស័យទាំង៥នាក់នោះ រួមមានៈ ទី១.ឈ្មោះ សុខ សុខន ភេទប្រុស អាយុ៤០ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផត ទីលំនៅភូមិថ្នល់ សង្កាត់ស្រង៉ែ ក្រុង/ខេត្តសៀមរាប, ទី២-ឈ្មោះ សុវណ្ណ វីរៈ ភេទប្រុស អាយុ៣២ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផត ទីលំនៅ ភូមិរកា សង្កាត់ក្របីរៀល ក្រុង/ខេត្តសៀមរាប, ទី៣-ឈ្មោះ រុណ រ៉ា ភេទប្រុស អាយុ៣៧ឆ្នាំ ទីលំនៅភូមិគោកត្នោត ឃុំគោកចក ក្រុង/ខេត្តសៀមរាប, ទី៤-ឈ្មោះ ឌុល សុវណ្ណ ភេទប្រុស អាយុ៣១ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផតទីលំនៅ ភូមិបន្ទាយចាស់ សង្កាត់គោកចក ក្រុង/ខេត្តសៀមរាប និងទី៥-ឈ្មោះ រិទ្ធ សារៃ ភេទប្រុស អាយុ២៩ឆ្នាំ មុខរបរបុគ្គលិកក្រុមហ៊ុនខេមបូឌាអ៊ែរផត ទីលំនៅភូមិគោកដូង សង្កាត់ទឹកវិល ក្រុង/ខេត្តសៀមរាប។
មន្ត្រីនគរបាលដដែលបន្តថា ការឃាត់ខ្លួនក្រុមជនសង្ស័យខាងលើ សមត្ថកិច្ចបានស្រាវជ្រាវលើកាមេរ៉ាសុវត្ថិភាព របស់ព្រលានយន្តហោះខេត្តសៀមរាប បានរកឃើញនិងថតយកបាននូវសកម្មភាពកាលពីថ្ងៃទី២៥ ខែសីហា ឆ្នាំ២០១៩ វេលាម៉ោង១៥នឹង១០នាទី មានឈ្មោះសុខ សាខន ឈ្មោះរិទ្ធ សារៃ ឈ្មោះឌុល សុវណ្ណ ធ្វើសកម្មភាពលួចរ៉ូតកាបូបវ៉ាលិសយកទ្រព្យសម្បត្តិរបស់ភ្ញៀវ និងនៅថ្ងៃទី២៦ ខែសីហា ឆ្នាំ២០១៩ វេលាម៉ោង៣និង២០នាទី ឃើញ ឈ្មោះ រុណ រ៉ា ឈ្មោះ សុវណ្ណ វីរៈ និងបក្ខពួកម្នាក់ទៀតពុំស្គាល់ឈ្មោះកំពុងធ្វើសកម្មភាពដូចគ្នា។ ទើបនៅថ្ងៃទី២៧ ខែសីហា ឆ្នាំ២០១៩ វេលាម៉ោង១៣នឹង៣០នាទី ខាងក្រុមហ៊ុនខេមបូឌាអ៊ែរផត បាននាំខ្លួនអ្នកទាំងប្រាំខាងលើយកមកប្រគល់ឲ្យសមត្ថកិច្ចសួរនាំ។
តាមចម្លើយសារភាពរបស់អ្នកទាំង៥ បានសារភាពថា ពិតជាបានធ្វើសកម្មភាពពិតមែន ហើយឈ្មោះសុវណ្ណ វីរៈ ធ្វើសកម្មភាពបានចំនួន១០០លើក, ឈ្មោះ រុណ រ៉ា ធ្វើសកម្មភាពចំនួន៤០លើក, ឈ្មោះ រិទ្ធ សារៃ ធ្វើសកម្មភាពបានចំនួន១០០លើក, ឈ្មោះ សុខ សុខន ចូលរួមធ្វើសកម្មភាព បានចំណែក និងឈ្មោះឌុល សុវណ្ណ ចូលរួមធ្វើសកម្មភាពបានចំណែក។
ជនសង្ស័យទាំង៥នាក់ខាងលើ បានសារភាពបញ្ជាក់បន្ថែមថា នៅសល់បក្ខពួកចំនួន៤នាក់៖១.ឈ្មោះជឹម ភក្តី ភេទប្រុស, ២.ឈ្មោះអេង ផៃ ភេទប្រុស, ៣.ឈ្មោះហ៊ន ហត្ថា ភេទប្រុស និង៤.ពុំស្គាល់ឈ្មោះ។
សមត្ថកិច្ចដកហូតវត្ថុតាងសំខាន់ ក្នុងការធ្វើសកម្មភាពមាន ប៊ិចមានចុងស្រួចរឹងសម្រាប់ប្រើប្រាស់ចាក់ឆ្កឹះកូនសោ ឬ រ៉ូតកាបូបវ៉ាលិសយកលុយនិងទ្រព្យសម្បត្តិ ចំនួន៤ដង។ កម្លាំងសមត្ថកិច្ច បានកសាងសំណុំរឿងបញ្ជូនទៅសាលាដំបូងខេត្ត និងកំពុងបន្តស្រាវជ្រាវរកមុខសញ្ញាដែលនៅសល់៕ដោយ៖បញ្ញាស័ក្តិ
