ភ្នំពេញ ៖ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានទទួលជួបធ្វើការជាមួយ លោក Jonh Wilson ប្រធានការិយាល័យអនុព័ន្ធផ្នែកច្បាប់ FBI ប្រចាំកម្ពុជា នៅបន្ទប់សវនការ អគ្គស្នងការដ្ឋាននគរបាលជាតិ រសៀលថ្ងៃទី២៨ ខែសីហា ឆ្នាំ២០១៩នេះ។
ក្នុងជំនួបនេះ ភាគីទាំងពីរបានពិភាក្សាអំពីការរៀបចំដំណើរការក្រុមប្រតិបត្តិការ Task Force ដើម្បីធ្វើការរួមគ្នារវាងនគរបាលជាតិកម្ពុជា ជាមួយភ្នាក់ងារ FBI ក្នុងការស៊ើបអង្កេតបង្រ្កាបបទឧក្រិដ្ឋ។ ពាក់ព័ន្ធនឹងបញ្ហានេះ លោកអគ្គស្នងការនគរបាលជាតិ បានបញ្ជាក់ជូនភាគីអាមេរិក ថា៖ ទី១. ត្រូវរៀបចំពិនិត្យឡើងវិញលើសមាសភាព ដើម្បីបង្កើតនូវយន្តការសហការដោយផ្អែកតាមខ្លឹមសារអនុស្សរណៈនៃការយោគយល់គ្នា (MOU), ទី២. ប្រគល់ភារកិច្ចឲ្យអគ្គស្នងការរង ១រូប តំណាងឲ្យអគ្គស្នងការនគរបាលជាតិ ក្នុងការដឹកនាំ បញ្ជាផ្ទាល់ដល់ក្រុម Task Force របស់កម្ពុជា ដើម្បីសហការជាមួយភាគីអាមេរិក, ទី៣. គឺនឹងរៀបចំបែបបទរដ្ឋបាល ឲ្យទៅជាច្រកចេញចូលតែមួយ សំដៅដោះស្រាយសំណើ និងសំណូមពរនានារបស់ FBI ទាន់ពេលវេលា ទាំងការងារស្រាវជ្រាវស៊ើបអង្កេត ការចាប់ខ្លួន និងការបញ្ជាក់ព័ត៌មានផ្សេងៗ ជាពិសេស ការទំនាក់ទំនងប្រតិបត្តិការ តាមផែនជំនាញនិងរាជធានីខេត្ត។ លោកអគ្គស្នងការ បញ្ជាក់ទៀតថា ក្រុមការងារនេះ មានភារកិច្ច និងមានសិទ្ធិស៊ើបអង្កេតផ្ទាល់ ឬចាប់ខ្លួនដោយផ្អែកលើឯកសារច្បាស់លាស់សំណើរបស់អាមេរិក និងអនុលោមតាមច្បាប់នៅកម្ពជា។ ក្រុមនេះមានសិទ្ធិទំនាក់ទំនងផ្ទាល់ ជាមួយនាយកដ្ឋាន អង្គភាព និងស្នងការរាជធានី ខេត្ត ដើម្បីបំបែកករណី។
លោកអគ្គស្នងការនគរបាលជាតិ ក៏បានសំណូមពរឲ្យ FBI ជួយគាំទ្រទាំងមធ្យោបាយ សម្ភារៈនិងថវិកាតាមលទ្ធភាពជាក់ស្តែង ដើម្បីឲ្យក្រុមប្រតិបត្តិការនេះ ដំណើរការទៅបានរលូន ជាពិសេសស្នើឲ្យ FBI ឧទ្ទេសនាមមន្រ្តីស៊ើបអង្កេតរបស់ខ្លួនមកភាគីកម្ពុជាឲ្យបានដឹងផងដែរ។
ក្នុងជំនួបដែរនេះ តំណាងFBI បានថ្លែងអំណរគុណចំពោះការបញ្ជាក់របស់លោកអគ្គស្នងកានគរបាលជាតិ និងសន្យានាំនូវលទ្ធផល នៃកិច្ចសហការជាមួយនគរបាលកម្ពុជា រាយការណ៍ទៅថ្នាក់ដឹកនាំ FBI នៅសហរដ្ឋអាមេរិក៕ដោយ៖បញ្ញាស័ក្តិ
